Yakobo 3

Khuuwula Luulimi

1Bebuulebe, bakali mwiinywe bakhakhaakhana khuuba baleekeli ta, lwekhuuba mwamanya muri ifwe babaleekela, khulikhalilwa kumusaango kumusiro, khufuura babaandu babaandi. 2Lwekhuuba fweesi khukwa mu byoonako kimiluundi mikali. Ne noola umuundu yeesi s'akholakho shishiindu shiibi shoosi mu byeesi aloma ta, aba umuundu umukhosefu, naluundi aba anyala khuwula kumubili kweewe kwoosi.

3Ni khura biibya mu minwa kye tsiŋwaaŋwa, khushikhola khuri nio tsikhuwulile, ni lwe bibyeene ibyo, khunyala khuyila iŋwaaŋwa oosi isi khukana. 4Namwe ni mubonele khu meeri. Ikhaba nga tsili tsimboofu tsirye, luundi tsitimisibwa ni mbewo iye kamaani, ne iyilibwa ni khakaango khafwiiti khari, khakila imeeri yaatsya osi esi ukitimisa akana ari itsye. 5Shili shitweela busa ni luulimi. Nilwo khakhaandu khafwiiti khari mu mubili, ne lwiruuya mu biindu biboofu. Yambaasa khu shisaali shiboofu, nga ni shokhewa ni khaalilo khafwiiti busa khari. 6Ni luulimi nilwo lulureere bye bubwoonaki mu baandu basheefwe. Nilwo shiibala she kamawuusu mu mibili kyeefwe. Nilwo lulwoonakisa kumubili kwoosi. Nilwo luluwaambisa kumulilo mu bulamu bw'omuundu bwoosi, naluundi lulweene luuwaambisakho kumulilo kukukhasima ta.

7Mwamanya muri, umuundu waabaya, naluundi shaamanyikhana shiri, waabaya naluundi waawula bibuumbe bibiramile byoosi; nga bisolo bye mwiiswa, binywiinywi, bisolo bibikhuluulila aasi, ni bisolo bye mu meetsi. 8Ne mbaawo umuundu yeesi unyala khuuwula luulimi ta. Nilwo luli lulwoonaki, lwaayitsula butsiba bubwiira, naluundi luyuukayuuka busa.

9 # Rak 1.26 Luulimi lweene nilwo lweesi khuraambisa nga khuruuya Umukasya weefwe naluundi uli Paapa weefwe; ne ndi ni nalwo khwaluraambisa khutsuba babaandu babaabuumbiwa mu shifwaananyi sha Wele. 10Mukhanwa mweene mutweela nimwo mumwamamo tsikhabi atweela ni khuutsuba. Bebuulebe, bino sibyaakha byaaba biryo ta. 11Isebele ndweela inyala khuutubukhamo kameetsi kakaŋaaha ni kakakhaŋaaha mu mwanya mutweela? 12Bebuulebe, namwe iliwo kusaala ku figi kukunyala kwaamakho kimisabibu, namwe kusaala kumusabibu kwaamakho kamakhuyu? N'isebele naye iryo, irusa kameetsi kakhali kamalayi ta, s'inyala yarusa kameetsi kamalayi ta.

Kamakhula ke bubeeyi ni Kaŋali

13Naanu mus'iinywe uuli ni kamakhula ni khuumanya? Noola alimo, n'okesanise bino nga abirira mu saambo indayi iye buulamu bweewe bukhosefu ni mu buraambi bweewe bulayi bweesi akholela mu buwolu ni kamakhula. 14Ne mu myoyo kyeenywe ni muba mwetsuule libuba, lirima ni butakha, mukheruuyakho ni khukhwiwombesa nga mukhaandisa bwa ŋali ta. 15Kamakhula ke saambo nga yino sikaama mwikulu ta, ne njeeba kaama mu shiibala, ke babaandu busa naluundi ka kimimakoombe. 16Lwekhuuba buli aandu oosi ahaaba libuba, ni butakha, abweene awo niwo ahaaba khuutumbuukha ni bibiindu byoosi bye bumoyaani.

17Ne kamakhula kakaama mwikulu, khunyoowela ilala, kali ka ŋali nga si kalikho lisaanda ta, luundi ke lukoosi, kamawolu, kalimo khukhwimenielesa, kaayiitsula shiisa, naluundi kaayiitsulamo bibiindu bibiindi bilayi, nga sikalimo khuromboola namwe bubeeyi ta. 18Babaandu babareera lukoosi nibo babamiitsa mu lukoosi, ni likyesa lyaabwe lili bibyaano bye bukwalaafu.

Currently Selected:

Yakobo 3: LPE

Highlight

Copy

Compare