Yakobo 2

Khuureewula khu kirombooli mu baandu

1Bebuulebe, nga ni muli babaafukiilila mu Mukasya weefwe Yesu Kristo uwe shiriifwa, mukhaba ni kirombooli mu baandu ta. 2Lwekhuuba siinga umuundu umuyiinda eetsa muntsu iye khukhwisaayilamo nga wakwaarire bulayi, nga ali ni ntsiyi iye zaabu, ni mu mbuka niyo ndweela, umuundu umutaambi nga wakwaarire tsingubo tsindabukhake naye wenjilamo. 3Ne mweesamo lukoosi umuundu ukwaarire bulayi nga mumuloma muri, “Iwe yiitsa, wikhale akhulayi ano,” ne mwaalomela umutaambi muri, “Iwe, yiima itaayi iyo,” namwe muri, “Yikhala aasi mu bikyele byase ano,” 4simubona muri muba mwareerewo ikirombooli akari enywe ta? Luundi muba mwaakhalilewo nga mwiima khu bitsilililwa biibi?

5Bebuulebe bakanwa, ni murekeerese, Wele akhurobola babaandu bataambi be mu shiibala muno, khuuba bayindifu mu khufukiilila, ni khuuba basikha be buyiinga bweesi alomela abo babamukana ta? 6Ne inywe mwaleekelesa umutaambi. Sibali bayiindifu nibo babaabamiinilisa inywe? Sibali nibo babaabakhurura baabayila mu moni tsaabo babaakhala kimisaango ta? 7Sibali nibo babaakhomyaasa lisiina lye shiriifwa lilyakila inywe mwalaangibwa ta?

8 # Lev 19.18 Shishiindu shilayi sheesi mwandikholile, shandibeele nisho khukhwoolelesa likaambila lye Buyiinga bwa Wele liliili mu byaronebwa bikhosefu liliiloma liri, “Kanaatsaka umuundu washoowo, nga iwe ni wikana wamweene.” 9Ne ni muba ni kirombooli mu baandu, muba mwakholile shishonako, luundi kumusaango kubafuura khulwe khufuniaaka likaambila. 10Lwekhuuba buli umuundu ulondelela kamakaambila koosi, ne wafuniaakakho litweela, aba wafuniaakile kamakaambila koosi. 11#Luky 20.14; Maka 5.18; Luky 20.13; Maka 5.17Lwekhuuba Wele uwaaloma ari, “Ukhayeyana ta,” niye mutweela mweene uyo uwaaloma ari, “Ukheera ta.” Nashiryo, abe wakhalekha khuyeyana ta, ne weera umuundu, shitweela busa uba uli umwonaki ufuniakile kamakaambila.

12Ni nashiryo, ni mukanikhatsake nga babaandu beesi balikhalila kumusaango, khukhwiimikha khu makaambila kakakhukangulula ifwe khukhwaama mu bubowe bwe shishonako nga ni kali. 13Lwekhuuba Wele alikhala kumusaango nga s'okesanisa shiisa isi ibo babaakhokesa shiisa isi babaandi ta. Shiisa shiwonesa umuundu abe isi kumusaango kutsya khufuura.

Khuufukiilila ni bikholwa bilayi

14Bebuulebe, shiyeeta shiina, umuundu khuloma ari, ali ni khufukiilila, n'enga buraambi bweewe sibwokesanisa shino ta? Khufukiilila ukhwo khunyala khumuwonisa? 15Ni shinyoolikhana nga iliwo uwe buulebe umusaani namwe umukhasi ukhali ni tsingubo ta, namwe nga s'ali ni she khuulya shishimumala ta, 16shiyeeta shiina umuundu uyo, nibawo mutweela khusiinywe umulomela ari, “N'utsye mu lukoosi, ukwaare bulayi, luundi ulye bulayi wikure,” ate nga siwamuweele bibikanibwa mu bulamu ta? 17Ni khufukiilila khweenywe nakhwo khuryo. Nga khuli khwonyene busa akhali buraambi bubwokesanisa, khuba khuufu.

18Ne umuundu ukuundi anyala khuuloma ari, “Iwe uli ni khuufukiilila, ne ise ndi ni buraambi bwase.” N'untsokese khuufukiilila khwoowo khuukhalikho buraambi, ni nase kane ikhwokese khuufukiilila khwase khuubirira mu buraambi bwase. 19Mufukiilila muri Wele ali mutweela. Isho shilayi. Ne ni kimisaambwa kimibi nakyo kifukiilila kiryo, naluundi kinikina ni khuurya. 20Iwe umuundu umusilu, ukana wokesanisiwe uri khuufukiilila khuukhalikho buraambi khuba mbaawo sheesi khuyeeta ta?

21 # Rak 22.1-14 Umukuuka weefwe Iburayimu s'abaliwa khuuba umukwalaafu khu lweesho sheesi akhola, nga n'awaanayo umwaana weewe Isaaka khu sheeso khumwoosha? 22Awo ubona uri, khuufukiilila khweewe khubonekhela atweela ni buraambi bweewe. Khuufukiilila khweewe khwiyokesanisila mu buraambi bweewe. 23#Rak 15.6; 2 Kim 20.7; Isay 41.8Naluundi bibyaronebwa bikhosefu byoolelesebwa bibiloma biri, “Iburayimu aafukiilila mu Wele, ni khulwe khuufukiilila khweewe, Wele aamufukiilila nga umuundu umukwalaafu.” Ni nashiryo, Iburayimu walaangibwa ari, umusaale wa Wele. 24Muryo mubona muri, shaamila khu buraambi bw'omuundu nibwo bubuukila walaangibwa khuuba umukhosefu isi Wele, ne akhuba khulwe khuufukiilila khwonyene ta.

25 # Yos 2.1-21 Nisho shitweela busa ni malaaya Rahabu. Niye s'anyoolekhana khuuba umukhosefu khulwe buraambi bweewe, nga n'akaanila baarume muungo mweewe, lwanyuma lwayo wabayeeta banyololokha busa khuubirira mu ntsila ikiindi? 26Nasho shili shiryo; nga kumubili kukukhalimo kumwoyo ni kuli kumufu, ni khufukiilila khukhalikho buraambi, nakhwo khuba khuufu.

Currently Selected:

Yakobo 2: LPE

Highlight

Copy

Compare