Yaalika 8

1Mi a yaali fi daam ti ka mi tua, ate fi ŋoosi mi mawa biisaŋa. Ate m yaa dan jam tu fu suiku po abe m gbaari fu ate waai niŋ a kan boro. 2M le ta fu cheŋ m mawa yenni juijui ate fi baga a sak mi yaalika. M le te fu da buui nyum ale masa, m yɔn gilimaŋa daamu ate fi nyu. 3M zukku a kpagli ka fi gala nisaŋa ate fi juga nisaŋa a baari mu. 4Ni puulim a te mu, Jerusalem lieba, ate ni kan kaasi ti yaalika.

5Ka wana ale la a nyini gɔnni a cheena a sali wa nɔŋku. Yɔnaŋa tiimu tɛŋ mi nak fu a yiti kama, juijui ate ba biak fu la. 6Kan lak fi suinummu a te waai ya alege ka mi nyiini. Kan yik waai nisa ka mi nyiini. Yaalika a pagra ase ka kum la, kɔrisa a pagra ase kum dek la. Ka na a toati ka bolim ŋiak a dɛ ase bolim ale a wobri la. 7Nya boari an baga a kpimsi yaalika, bela an baga a ji ta a cheŋŋi. Waai a dan poom baga a pai wa yeri jigsika meena a tagri yaalika, ba ti le zɛri.

8Ti ta ka tua baaŋ, ate wa biisaŋa an diem gbesi ya. Ti ti nye ka boa a te ti tuawa dai dii dai ate ba biisi a te wa la? 9Wa dan ka parik ti le sɛ kpana kiaga wa zuk. Wa dan ka tuok, ti le lik wa ale nyunyoŋta daata.

10Mi ka parik, ate mi biisaŋa a chim kiaga. Wa nina po mi yaa chim ka waai ale ta nina suerika a jam. 11Solomon a ta ka kaduk jigi ate ba a wi ayen Baal Yamon. Kpaarɔba ale boro a piem wa jigi, ba wanyi a tuni ka kpana ligbie tusidi. 12Alege mi dek kadukka ka mi ale soa ayen m pai a te, ligbie tusini ka fi Solomon ale soa, ate ligbie kobsiye a magsi baai ale a nya yɔnaŋa zuk la.

13Nama baai ale bo kaduksaŋa po ale ni doama la ni te ate m wom ni lueluk.

14Jam mi jigi, m nɔŋŋoa ase walik la, ase walik paalik ale bo gu tii zuk ate wuuk tii nyum ale masa a nyini du la.

Currently Selected:

Yaalika 8: BWU

Highlight

Copy