Yaalika 7

1Nya fi le ka nipokbili naliŋ dii. Nya fi naŋtaaŋa ale nala dii nuesaŋa po. Fi kɔsutaŋa ale ŋmeriŋ diila a nye ase ka gobrɔ tuima la. 2Taasidi a bo dula, di kan kpeeri ale da buui nyum ale masa la. Muma bobi a bo dula, ate wupuuta a gilim. 3Fi biisaŋa a nye ase ka walik doata la, ase walik yibsa la. 4Fi ŋinni a nye ase ka yauk nyina kiari la. Fi ninaŋa a nye ase ka bela ale bo Yesbon tɛŋ nummu po la, a moata tɛŋ num kpien dila nansuiŋku. Fi nyuenni a nala ase ka Lebanon kiari ale a tuk Damasikus nyiŋla.

5Fi zukku a zak ka ŋmai ase Karmel Guuku la. Fi zui bobinsaŋa a nyaksi ase ka garuk saalik la. Ku nalimu a baga a yik naab kama chappi. 6Nya fi le nye nna pɔgtɔgi, fi le nala dii, fi yaalika mariŋka ale zuak dii. 7Fi nyiŋ diokku ale niak dii ase kpinkparuk tiib la, ate fi biisaŋa a nye ase yɔna sagi la. 8Mi ale jueli kpinkparukku a gbesi yɔnaŋa. Mi jigi fi biisaŋa a nye ase yɔna sagi la, fi vuusumu a nye ase yɔna nyum masik la, 9ate fi nɔnni a nye ase da naliŋ la. Yaa be basi ate daamu a cheŋ m nɔŋku jigi yorr, a chali va wa nɔngbanvaataŋa ale wa nyinaŋa a siŋ.

10Mi nɔŋku ale soa mi, ate wa a yaali mu. 11Jam, m nɔŋŋoa, te ti cheŋ tɛŋ kpaŋka, te ti goa yokku tɛŋ kpaŋsaŋa po. 12Basi ate ti cheŋ kaduksaŋa jigini, a nya ase tiisaŋa a pusi vaata ya, ase si a busum ate yɔn gilimaŋa tiisaŋa a busum ya. Dula m le pai m yaalika a te fu. 13Fi baga a wom tiisa nyum kama, ate yɔn maŋsaŋa meena a moata ti tuoku. M nɔŋŋoa, mi dueni ka mariŋ kpak ale mariŋ paalib meena a magsi fu.

Currently Selected:

Yaalika 7: BWU

Highlight

Copy