Yaalika 6

1Fi nɔŋku a cheŋ ka bɛ, waai ale nala a gaam nipooba meena la? Fi nɔŋku a cheem va ka suik boa ate ti le fu a gisi wa?

2Mi nɔŋku a cheŋ siŋ ka wa kadukka, wa ŋan baai nyum ale masa gaduataŋa, ayen wa piisaŋa a dɛ abe wa tigsi wupuuta. 3Mi ka m nɔŋku ate mi nɔŋku a chim mi, wa piisaŋa a dɛ wupuutaŋa po.

4Fi nala kama, m sambuliyaa ase Tirza la, a nala ase Jerusalem la, a ta pagrim ase tugurik tɔŋdɔba ale ta tikti ba la. 5Viriŋ fi ninaŋa mi jigi, ŋa a dari mu kama. Fi zuisaŋa a nye ase bua boari ale nyini Gilead guuku zuk a siŋ la. 6Fi nyinaŋa a nye ase ka pa boari ale nyini sugrika a jueli cheen la. Kunyi meena a ta ku yibik kama. Kuui an chim ku dek ku nyiini. 7Fi tapayaasaŋa a nyaksi kama garuk nyaara nyaaraŋa po. 8Basi ate naawa a ta naab pooba pisiyuebi, nɔŋta pinaanuŋ, nipok paaluk a ka chiina. 9Alege mi a yaali ka wanyi nyiini, wa be nala ase ka nangbaŋ la. Wa nyiini ale chim wa mawa lie, wa mawa bi poosiri. Nipooba meena a nya wa kama ale suipeentik, naab pooba ale nɔŋta a lenni ka wa pimpaukku.

10Ka wana ale la a na nyini ase varivientidi la, a nye wii ase chiika la, nna cheri ase wenbinni la, a nyaksi ase chiŋmarisa ale a vi chaab la?

11Mi siŋ jam ka ti boari suŋsuŋ ayen m nya ti bulaŋa viaka po, m nya va paalitaŋa tiisaŋa nyiŋ ale yɔn gilima tiisa ale a busum la. 12Alege ate mi a miŋ la, mi kɔrisaŋa a zaani mi ka mi nuruma naam torokoma suŋsuŋ.

13Ŋman jam, ŋman jam, Sulam denɔ, ŋman jam, ŋman jam ate ti a nya fu. Ka boa ale soa ate fi a nya Sulam denɔwa ase fi a nya Mayanaim gɔgta la?

Currently Selected:

Yaalika 6: BWU

Highlight

Copy