Arut 4
4
1Dila la Boazi yaa cheŋ tɛŋka nansuiŋku jigini a ga kala. Ba da tuesirɔwa ate wa poom weeni wa wari la a yaa jam ate Boazi yaa weeni wa ayen, <<M doa jam kali dela.>> Ate wa ga kali. 2Boazi yaa yik tɛŋka nisɔm pi ate ba mɛ kali. 3Wa yaa weeni wa da tuesirɔwa ayen, <<Naomi ale nyini Moab jam la, a pai ti suoku Elimelek tɛŋka a da kama. 4Mi abe a poli ayen ku magsi ka fi seba ku nɔi po. Yɔgyɔgla de fi dan a yaali da nuruma de ale kali la niŋ. Fi dan da a tuesi, da tuesi. Alege fi dan kan da a tuesi, weeni mu ate m seba. Dii la nuru karo ka fi ale fi da tuesi, mi abe le a vi fi ŋaaŋ,>> Ate wa weeni ayen, <<M da tuesi.>> 5Boazi yaa weeni wa ayen, <<Ku nala, fi dan da tɛŋka Naomi jigi, se fi da Arut mɛ ale nyini Moab a chim pukɔgini la, ate kpiewa dɔkdemma a diem soa tɛŋka. 6Da tuesirɔwa yaa tulisi ayen, <<Ku dan ka dila mi ale pai mi suiku a te ate fi da tuesi dii nyiŋla mi a dan da tuesi ate m poom kpi m dek bisaŋa kan nya tɛŋka. Fi da ale mi kan da a tuesi.>>
7Dila po ba dan jam a yaali ayen ba da tuesi jaab yaase ba tagri ŋanta, ku jam ka ba kisuk ayen waai ale ta diaka la a yeeri wa nuensaŋa a te waai ale wa da ŋantaŋa la. Kude Izirali demma a sak kama ayen ba yik wanni a niak kama. 8Da tuesirɔwa yaa be le weeni Boazi ayen wa be da la, wa yaa yeeri wa nuensaŋa a te Boazi, 9Boazi yaa weeni niŋdeerɔma ale baai ale bo dula la, <<Ayen nama ka mi seerɔba jinla ayen mi da jaab meena ale bo Naomi jigi ate Elimelek ale wa bisaŋa Kilion ale Malon a soa la kama. 10Dii ale ŋman gum du la, Arut waai ale nyini Moab la, ate wa chorɔwa Malon a kpi ale ge wa la ka mi pok. Kude ale basi ate kpiewa dɔkdemma soa ŋantaŋa abe ba bo badek tɛŋka po ate wa tomini kasim a cheŋ. Nama meena ka mi seerɔba jinla.>> 11Niŋdeerɔma ale nuru mbala ale bo nansuiŋ la ku yaa weeni ayen, <<Tama meena ka seerɔba. Naawen a basi ate fi powa a nye ase Arekel ale Leya ale biak bisa yega ate Jekob la. Fi ale jigsi Efrata buuni po abe fi yuei yiti Betiliyem tɛŋka po. 12Naawen ale wa basi ate nipowa a biak biik sii a te fu la, a nye ase Juda ale Tamara biika Perezi dɔkdemma la.>>
13Dila la Boazi a yaa ta Arut a kuli a ga chim wa pok. Naawen a yaa niak wa ate wa yik lɔgi a biik nidoabili. 14Nipooma yaa weeni Naomi ayen, <<Pak Naawen ale wa te fu ka ŋaaŋ ayen wa a nya fi zuk. Naawen maari ate biika nya yuei Izirali tɛŋka po. 15Fi sampowa a yaali fu ka nna yegayega, wa be nye gaam bisa bayopɔi ale a nye diila kama. Yɔgyɔgla de wa biak ka ŋaaŋ a ta fu, waai ale wa te fu nyuvuri abe wa yik fu nna ŋmapi ale fi kpaŋsaŋa la.>> 16Naomi yaa tuesi biika a yaa ta wa nna ŋmapi a nya wa zuk. 17Nipok baai ale kali moata ba la yaa te biika yuenni ayen Obed. Ba yaa weeni waai meena ayen ba biak ka biik a te Naomi Obed yaa biak Jese ate Jese a biak Deevid.
18A zaani Perezi a ta ga paari Deevid buuni ale nna: Perezi ale jam biak Ayeziron 19ate Ayeziron biak Aram ate Aram biak Amminadab 20ate Amminadab a biak Nayson ate Nayson a biak Salimon 21ate Salimon a biak Boazi ate Boazi a biak Obed 22ate Obed a biak Jese ate Jese a biak Deevid.
Currently Selected:
Arut 4: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation