1 Samuel 1
1
1Nuru ale jam boro wa yuei ale Elkana. Wa jam nyini ka Arama tɛŋka ate ka bo Zuf, Ɛfraim tɛŋka po, kauk kuui ate guuta a boro la. Wa kowa yuei jam le Jeroyam. Wa kokpieŋka yuei jam le Eliyu. Wa kokpieŋka kowa yuei jam le Toyu. Toyu a jam ka Zuf biik. Elkana ale wa nuruma jam nyini ka Ɛfraim dɔkku po. 2Elkana jam ta ka nipooba baye. Wanyi yuei jam le Yanna, nwala yuei jam le Peninna. Peninna jam ta bisa kama alege Yanna jam ka kirik.
3Bein meena Elkana ale wa dɔkdemma a nyiem basi ba tɛŋka Arama kama alege cheŋ Siilo ayen ba puusi Naawen Dii Ale A Dɛ Tugurik Tɔŋdɔma Niŋ La abe ba nye kaabka te wa. Nuru ale jam bo Siilo ate ba a wi wa ayen Eli. Wa jam ka Naawen kaabteerɔ. Eli jam ta ka nidoabilisa baye, Yofni ale Fineyas. Ba mɛ jam ka kaabteerɔba. 4Elkana a dan jam nye kaabka wa nyiem chari wa dɔkdemma lammu kama. Wa le gebi lammu dii a te wa powa Peninna la, wa a gebi ka dila mɛ a te wa bisaŋa ale wa liema. 5Alege Yanna wa nyiem te ka ku nɔi buye dii nyiŋla wa a yaali wa ka nna yegayega, ale Naawen ale diem lik wa bisa biamu la meena. 6Peninna waai ale ka Yanna ŋaanchoa la a nye wa a la a basi ate wa sui a puuri dii nyiŋla Naawen a basi kama ate Yanna a ka bisa. 7Peninna a kasim a nye Yanna ka dila bein meena. Diipo meena ba dan cheŋ Naawen yenni ale bo Siilo la, Peninna a nye Yanna a la kama ate wa kum a zɛri ŋandiinta. 8Kude nyiem dan nye, Elkana yaa weeni wa ayen, <<Yanna, ka boa ale soa ate fi a kum? Ka boa ale soa ate fi a zɛri ŋandiinta dɛka? Ka boa ate fi sui a kaasi? Mi ale yaali fu a soa diila an gaam bisa pi?>>
9Dai yeŋ Elkana ale wa dɔkdemma ale dɛ nueri Siilo po la, Yanna yaa yiti zaani. Eli waai ale ka kaabteerɔ la a jam kali ka zukpaglik zuk Naawen yenni tuoku nɔi peelim. 10Yanna sui ale jam kaasi nna yegayega ate wa puusi a te Naawen ale kasim a kum. 11Wa puusaŋa po wa yaa puulim a weeni ayen, <<Naawen Dii Ale A Dɛ Tugurik Tɔŋdɔma Niŋ La, nya m niniga, kan baŋi. Fi dan te fi liewa nidoabili, mi a puulim kama ayen m le pai wa te fu wa boka po meena. Dii ale di sak ayen m pai wa te fu la wa kan che wa zuisaŋa.>>
12Yanna ale a puusi a te Naawen la, Eli yaa kpesi a nya wa nɔnni. 13Wa le a puusi la, Eli a poli ayen wa nyu ka daam, diila wa nɔngbanvaataŋa ale a choa alege wa an jam puusi ate ku a jueli. Wa jam a puusi ka wa suinummu po. 14Eli yaa weeni Yanna ayen, <<Ka boa ti fi buk daam a jam dela? Basi fi daamu yibaŋa.>> 15Yanna yaa weeni ayen, <<Daa di m nyɔnɔ. Mi an nyu daamoa. Mi an poom a nyu daamoa. Ka m sui ale kaasi ate mi a puusi dila. Mi a weeni ka Naawen dii ale a daani mu la. 16Mi a weeni wa ka m niniŋŋa ale ka diila. Kan poli ayen m daa nipok maŋŋa.>> 17Eli yaa weeni ayen, <<Fi baga a cheŋ kama ale suiyɔgni. Izirali Wenni ale nye dii ate fi bek wa la te fu.>> 18Yanna yaa weeni ayen, <<Mi a nye fi jiam. Be kasim poli wamaŋsa a te mu.>> Wa le biisi nueri la wa yaa basi Eli ale ga yaali ŋandiinta dɛ. Wa sui a ŋman jam kaasi ya.
19Vari ale veenti la saluik yokyokwa Elkana ale wa dɔkdemma a yaa yiti a puusi Naawen wa yenni po Siilo ale ŋman kuli ba yenni ale bo Arama la. Elkana yaa goa ale Yanna wa powa, ate Naawen a teeri wa wari. 20Ku ŋaaŋnyiŋ Yanna yaa yik lɔgi a biak nidoabili a te wa yuei ayen Samuel. Wa mawa weeni wadek ayen dii nyiŋla m bek ka Naawen ate wa te mu.
21Ku ŋman jam paari ka diipo ale magsi Elkana ale wa dɔkdemma a cheŋ Siilo a ga nye ben nuerika kaabka ate Naawen. Elkana mɛ poom jam a yaali kama ayen wa ga tuni wa pumpuulimaŋa a te Naawen. 22Yanna an jam va cheŋ ya. Wa jam weeni wa chorɔwa kama ayen, <<M kan va cheŋ yɔgyɔgla. M le limisi ate biika gaari biisiri abe m yaa ta wa cheŋ Wen yenni ale bo Siilo po la a pai wa te Naawen ate wa kasim bo dula.>>
23Wa chorɔwa Elkana yaa tulisi wa ayen, <<Ku bo ka fi jigi. Nye dii ale nala a te fu la. Wari bo yeri ate biika a gaari biisiri. Naawen a maari fu ate fi ta fi pumpuulimaŋa.>> Yanna yaa wari a nya wa biika zuk.
24Biika ale gaari biisiri la, ba yaa ta wa cheŋ Naawen yenni ale bo Siilo la. Ba jam ta ka bena ŋata lalik, ale boorik geli ale zom, ale bunlɔk ale daam a cheŋ ayen ba te Naawen. 25Wa nyama ale ko lalikka a te Naawen la, ba yaa pai Samuel a te Eli Naawen yenni po ale bo Siilo la. 26Yanna yaa bek Eli ayen, <<M koa, fi a teeri mu? Mi ale nipok waai ate fi jam nya ale wa puusi a te Naawen bena maga ale taam la. 27M jam puusi a yaali ka biika de ate Naawen a te mu mi ale bek diila. 28Dila nyiŋ yɔgyɔgla de m pai wa a te ka Naawen. Wa le kasim tom a te ka Naawen wa boka po meena.>> Wa le biisi nueri la, ba yaa puusi Naawen dula jigini.
Currently Selected:
1 Samuel 1: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
