Arut 3
3
1Dai yeŋ ate Naomi, Arut ŋianipowa a yaa weeni wa ayen, <<Ku an magsi ayen m yaali dɔk a te fu ate ba a nya fi zuwa? 2Boazi waai ate fi bo wa jigi ale nipokbilisaŋa la, daa tama suowa? Jinla yokku wa za wa fɔbi wa ŋantaŋa a yali kama. 3Fi yaa so fi nyiŋka a sa kpa buui nyum ale masa la abe fi jo garuk tii ate fi mariŋ la. Fi dan nye dila fi yaa cheŋ ŋantaŋa yalika jigini alege kan basi ate wa seba ayen fi bo dula, se ka wa nin dɛ nueri. 4Wa yaa bɛ dan so, kpesi nya juijui ate wa doa la. Fi yaa yik jabuui ale lik wa la a zak abe fi ge wa naŋsaŋa a yaa duak. Fi dan nye dila wa yaa le weeni fi le fi nye diila.>> 5Arut yaa weeni ayen, <<M le nye dii meena ate fi weeni la.>>
6Wa yaa cheŋ ŋantaŋa fɔbika jigini a ga nye dii meena ate wa ŋianipowa a weeni wa ayen wa nye la. 7Boazi ale dɛ nueri ate wa nyiŋka a yɔk la, wa yaa ga duak wa ŋantaŋa ale vi chaab zuk dua la jigini kpeglimka. Arut yaa mak cheŋ a ga lagri alege wa naŋsaŋa a yaa duak. 8Yɔkku suŋsuŋ jaab yaa nye ate Boazi nye nna legi, a ga a labri la ale nipok ale dua wa naŋsa po. 9Boazi yaa bek ayen, <<Ka wana?>> Arut yaa tulisi ayen, <<Ka mi Arut fi tomteerɔwa.>> Arut yaa ŋman weeni ayen pai fi garukku kauk a lik mu fi le ka m da tuesirɔ la nyiŋ. 10Boazi yaa weeni ayen, <<M lie, Naawen ale niak fu. Jiirim buui ate fi sak ale mu la a poom gaam fi ale liŋ sak jiirim buui la kama. Fi an chali a vi bimbaan paaluk ŋaaŋŋa, jigsirɔba yaase ŋanjaksa. 11Yɔgyɔgla de, m lie, kan te fi kpaziim a nak. M le nye dii meena ate fi a yaali la a te fu. Mi tɛŋka nuruma meena a seba ayen fi ka nipok waai nyeka ale nala. 12Ku ka wensie ayen m ka da tuesirɔ, alege da tuesirɔ a boro a moata gaam mi. 13Be goa dela yokku de ate chum saluik wa dan da tuesi fu ku nala. Alege wa dan kan da tuesi fu, Naawen boro mi ale da tuesi fu.>> 14Dila la, wa yaa duak wa naŋsa geŋ, a yaa kpabi yiti diipo ate nuru kan nya a miŋ la, a yaa weeni ayen, <<Kan basi ate ba miŋ ayen nipok a jam ŋantaŋa fɔbika jigini.>> 15Boazi yaa ŋman weeni wa ayen, <<Ta garuk kuui ate fi pai a lik fi zukku la a jam lagri.>> Wa ale lagri la, wa yaa pai jaab magsi barli ku nɔi buyuebi a kpiiri nyoro a ji wa ate wa ta kuli. 16Arut ale ga wa ŋianipowa jigi la, wa yaa bek wa ayen, <<Fi le cheŋ la ku nye ka sɛ, m lie?>> Wa yaa weeni dii meena ate Boazi a nye te wa la, 17ale ŋman weeni wa le magsi barliwa jaamu nɔi buyuebiwa te wa ale weeni ayen, <<Kan kuli fi ŋianipowa jigi ale nikotta>> la. 18Naomi yaa weeni ayen, <<M lie limisi ate fi nya dii meena ale za ku nye la. Nuruwa kan vuusi se ka wanni a nin nye magsi jinla.>>
Currently Selected:
Arut 3: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation