Aroom 9

1Yeezu Kirisita ale soa mu. Dila nyiŋla m kan velimu. M popolaŋa ate Wen Chiika soa la mɛ a weeni mu kama ayen m le a biisi diila ka wensie ase, 2m nin weeni ayen m sui kaasi ka nna yegayega ate ku a nye nna ase nyiŋdomma ate m ta ate ŋa kan basi mu la. 3Dii nyiŋ ale soa ate m suinni kaasi la ale m dek nuruma baai ale ka m dek mabisa la. Bala nyiŋ ate mi a poli ayen ase Wen daam ate ka te ka mi a poori mi ale Yeezu Kirisita a zaani tɔgatɔga. 4Ba ka Izirali dem baai ate Wen yeeri te wadek la. Poli nya Wen ale nye dii a te Izirali demma la. Wa te ba ka suik ayen ba chim wa nidoabilisa, wa pai wadek a sak ba, wa ale ba a maa chaab puulim nye ka nɔiyeŋ, wa pai wa Sinsaŋŋa te ba, wa sak ba wensie suiku ate ba le va a puusi wa la, ba nya Wen ale puulim ayen wa nye dii a te ba la kama. 5Bala ale soa ti kokpieŋsaŋa. Nurubiik biam jigi ka bala ale biak Yeezu Kirisita. Wen dii ale soa ŋanta meena la a kasim a nya pimpauk taam wuu. Ku be nye dila.

6M be kan weeni kama ayen Wen ale pɛ ayen wa le nye diila wa an nyeya. Wa nye kama. Dii nyiŋla, ba meena ka Izirali dem alege daa ba meena ale chim Wen bisa. 7Ba meena ka Abrayam ŋaaŋbisa alege daa ba meena ale chim Wen bisa. Boan nyiŋŋa, Wen weeni Abrayam kama ayen, <<Ka Aizik ŋaaŋbisaŋa le ba chim fi bisa.>>#9:7 Piilimka 21:12 8Nya kude abe a sak kama ayen daa nidoa ale nipok ale biak bi sii la ale basi ate ku a sak waai ale waai ale ka Wen bisa la. Alege ka bi sii ate Wen puulim ale Abrayam ate ba biak ba la ale sum chim wensie bisa. 9Boan nyiŋŋa, Wen ale puulim ale Abrayam weeni diila ale nna ayen, <<Bein dii ale cheena nna po de, m le pilim ŋman jam ate Saara yaa biak nidoabili.>> (Piilimka 18:10)

10Be daa ku meena ale nna. Dii nyiŋla, Aribeka nidoabilisaŋa bayewa a jam ka ti kokpieŋka Aizik bisa. 11Diipo ate ba an diem jam biak yibisaŋa la, ate ba an nye wamaŋ yaase wakaasuŋ la, ate Wen ale poli a lueri diila a nye, daa tuima nyiŋŋa alege ka wa waai ale wi la. 12Wa jam weeni wa kama ayen, <<Kpagni ale tom te baaŋka.>> (Piilimka 25:23) 13Ase wa ale weeni wa gbaŋka po dii ayen, <<Mi ta yaalika ale Jekob kama alege kisi Iisɔ.>> (Malakai 1:2-3)

14Ti be le weeni ayen ka boa? Ti baga a weeni ayen Wen a kan nye a magsi? Aaya. 15Dii nyiŋla wa weeni Moosis ayen, <<Mi ale ta jiirim ale waai ate m le ta jiirim la, abe waai niniga ale jo mu la m le nya wa niniŋŋa zuk.>> (Nyinika 33:19) 16Nya kude abe a sak kama ayen Wen dan lueri nuru, ku daa nuruwa dek yaalika yaase wa nyeka alege ku meena a magsi chaab ale ka Wen ale ta jiirim diila. 17Ba ŋmarisi Wen gbaŋka po ayen Wen weeni Faaro ayen, <<Mi ale basi ate fi chim naab ayen m potim nye wie fi jigi ate ku a sak m pagrimu ale soa diila abe m nye ate waai meena tɛŋzuk de wom m yuenni.>> (Nyinika 9:16) 18Dila nyiŋla, m baga a weeni kama ayen Wen daa yaali ayen wa ta jiirim ale nuru waai, wa a ta kama, wa be daa yaali ayen wa nye ate nuru ta tukpari a kan maari a wom sinsaga wa a nye kama ate nuru a chim dila.

19Ni le bek mu ayen, <<Ku be dan ka dila, Wen be nye ka sɛ baga a nya kaasuŋ nuru jigiya? Be ka wana mɛ ale baga a zɛri Wen ale a yaali ayen dii nye la?>> 20Mi mɛ abe le bek ni ayen, ka boan suik ate fi nurubiik mɛ a tara ate fi le baga bek Wen dila? Samɔniŋ ka suik a bek ka mɛɛrɔ ayen, <<Ka boa ate fi mɛ mu nna?>> 21Nama dek abe seba chak kama ayen samɔniŋ mɛɛrɔ a baga kama pai yakka a mɛ wa ale a yaali jabuui la. Wa baga kama a pai yak yeŋ kala a mɛ samɔnsa siye a pai kanyi a tom tigi kpiema tuima, ale pai kanyi wa a tom daa meena tuima. 22Wen abe ale ka diila ale la. Wa jam a yaali kama ayen wa sak nuruba wa suipuurumu ale wa pagrimu ale ka diila. Alege wa yik ka wadek ale chichiiba nalimnyiini ale baai ate wa suinni a puuri a magsi wa ti kaasi ba. 23Wa ta chichiiba ale ba kama ayen ku sak zula ŋaai ale zuak nna yegayega dii ate wa le pai te baai ate wa le ta jiirim ale ba la. Wa gomsi ba kama dipo a magsi ayen ba nya zula ŋala.

24Nuru baai ate mi a weeni ayen wa gomsi ba a magsi la ale nama ale mi baai ate wa wi la. Wa an wi ti a ta nyini ka Juuma nyiini po alege wa wi ka baai mɛ ale kan daa Juuba la. 25Dii nyiŋla wa weeni ta nyini Yosea gbaŋka po ayen, <<Nuru baai ale jam kan daa mi nuruba la, mi le wi ba ayen, <M nuruba.> Tɛŋ kaai ate mi jam ka yaalika ale ka la, mi ale ayen, <Mi a yaali ka.> (Yosea 2:23) 26Juijui dek ate nuruba weeni ba ayen, <Ba daa mi nuruba la>, dula jigini dek ate nuruba le wi ba ayen ba ka Wen dii ale vua la nidoabilisa.>> (Yosea 1:10)

27Azaya mɛ weeni ka dila dekdega a magsi chaab ale Izirali ayen, <<Izirali demma a dan poom piisi ase nyakpiemu nɔi tintain busuŋ la, ka ba maga le ba nya varibasika 28boan nyiŋŋa, Naawen le bo tɛŋzuk de meena ka buusa pagrisa nna mwuli.>> (Azaya 10:22-23) 29Ku a nye ase ka Azaya ale poom liŋ weeni dii mɛ la ayen, <<Ase Naawen Dii Ale A Dɛ Tugurik Tɔŋdɔma Niŋ La a dan kan basi ŋaaŋbisa a te ti, wa daam ate kaasi ti kama a basi ase wa ale nye Sodom ale Gomora tɛŋsaŋa diila.>> (Azaya 1:9)

30Ti be le weeni ayen ka boa? Ti baga a weeni kama ayen baai ale kan daa Juuba la, an jam pii nyiŋ badek ayen ba chim wayɔrisima nyama, alege ka ba siaka nyiŋ ate ba chim wayɔrisima nyam. 31Alege Izirali demma pii nyiŋ kama ayen ba nye sinsaŋŋa ale a weeni diila ate ba chim wayɔrisima nyam, alege ba an baga a va sinsaŋŋa ale a weeni diila ate ba chim wayɔrisima nyama. 32Be ka boan nyiŋ ale soa ate ba an baga a va ŋa? Dii nyiŋla, ba jam pii ka nyiŋ badek a nye alege ka siaka. Ba goanti jam va ka tuimaŋsa tomka nyiini nyiŋ alege daa siaka. Ba a gariŋ ka tintain dii ate Wen pai dueni suiku niŋ la. 33Tain dii ate Wen gbaŋka a biisi di wari ayen, <<Ni wom de, mi pai ka tintain a dueni Zayon tɛŋka demma po ayen nuruba nak ba naŋsa a lo. Alege waai a dan ta siaka ale nuru waai ate ba a wi ayen Tanni la, m kan maa basi ate ku nyɔnɔwa nya chivie diipo diipo.>> (Azaya 8:14)

Currently Selected:

Aroom 9: BWU

Highlight

Copy