Aroom 10

1M suata, mi dek ale a yaali dii nalimnyiini ate ku chim m puusa a ta nyini m suinum po meena ate mi a puusi Wen la ale, Izirali demma ate nya varibasika. 2M baga a weeni a chak kama ayen, ba kasim a yaali Wen vaka kama ale ninmuna alege ba an diem miŋ ku kiri a chak ba le ba nye dii a va wa la. 3Ba an diem miŋ suik kuui ale a nye ate nuruba a chim wayɔrisima nyam m jigi la. Dila nyiŋla, ba yaa pii nyiŋ badek ayen ba nye ate ba chim wayɔrisima nyam. Dila abe basi kama ate ba yaa zɛri Wen suik kuui le ku basi ate ba chim wayɔrisima nyam la. 4Alege yɔgyɔgla de, Yeezu Kirisita nye kama ate Moosis Sinsaŋŋa kpeglim ayen waai ale ta siaka ale Yeezu Kirisita la, a chim ka wayɔrisima nyɔnɔ.

5Moosis ale ŋmarisi dii a magsi chaab ale waai ale a va Sinsaŋŋa ayen wa chim wayɔrisima nyɔnɔ la ale nna ayen, <<Nuru dan va Wen Sinsaŋŋa ale a weeni diila, Sinsaŋŋa a basi kama ate wa a nya vum.>> (Kaabka 18:5) 6Alege wayɔrisima siaka nyiŋ ale a weeni diila ale nna, <<Kan weeni fi suinum po ayen, <Ka wana le wa jueli wenŋmazuwa?> (Teerika 30:12) Ku kiri ale, a ta Kirisita a siŋ? 7Yaase, <Ka wana le wa siŋ kpiluŋ?> Ku kiri ale, a ta Kirisita a jueli?>> 8Ku ale a weeni diila ale nna ayen, <<Wanni a moata ni kama, a bo ni noa po ale ni suiniima po.>> (Teerika 30:14) Ka siaka de sinsaŋŋa ate tama mooli a sak ayen, 9fi dan lak fi nɔi a weeni ayen, <<Yeezu ka Naawen,>> a ta siaka fi suinum po ayen Wen nak wa a yiti kum po fi le nya varibasika kama. 10Dii nyiŋla, ku ka nuru a nin ta siaka wa suinum po ate Wen a nye ate wa a chim wayɔrisima nyɔnɔ. Nuru abe nin lak wa nɔi a weeni wa kaasuŋ ate wa nya varibasika. 11Ba ŋmarisi Wen gbaŋka po mɛ ayen, <<Waai ale ta siaka ale Yeezu la, wa kan basi ate nuru wala nya chivie.>> (Azaya 28:16) 12Ka waai meena, fi ka Juu yoo fi daa Juu yoo, Naawen ka waai meena Naawen. Waai abe ale a wi wa ayen wa vari wa basi la, wa a nye kama ale pai wa niaka a gum du nalimnyiini. 13Boan nyiŋŋa, <<Waai ale a wi Naawen ayen wa vari wa basi la, le nya varibasika kama.>> (Joel 2:32)

14Nuruba abe le nye ka sɛ a baga wi wa ayen wa vari ba basi ase ba nin kan ta siaka ale wa? Ba be le nye ka sɛ ta siaka ale waai ate ba an wom wa wie la? Ba be le nye ka sɛ mɛ wom ase nuru a nin kan karo ayen wa mooli a sak ba? 15Nuruba be le nye ka sɛ a baga mooli sak nuruba ase ba nin kan tom ba ayen ba mooli sagi? Ase Azaya ale ŋmarisi dii Wen gbaŋka po ayen, <<Nya baai ale ta wamaŋsa a jam la naŋtaata ale nala soa dii ya.>> (Azaya 52:7)

16Alege daa waai meena ale siak a te Wen wamaŋsaŋa. Ase Azaya ale ŋman bek dii ayen, <<Ka wana ale ta siaka ale ti wanni?>> (Azaya 53:1) 17Dila siaka a nyini ka womka jigi, ate womka a nyini Kirisita wanni jigi.

18Ni basi ate m bek ni wari ayen, ku sum ka wensie ayen Juuma an wom Wen ale weeni diila? Aaya. Ba wom wa ale weeni diila kama, boan nyiŋŋa, ba ŋmarisi Wen gbaŋka po ayen, <<Ba luelutaŋa a cheŋ ka nna ŋmɔŋ a paari tɛŋka meena. Ba wieŋa a cheŋ a paari tɛŋka kpeglimka.>> (Yiila 19:4) 19Alege mi a weeni ayen, Izirali an jam miŋ ya, ba miŋ ya? Moosis a weeni ayen, <<M le nye ate ni a de nyuri ale tɛŋ kaai ate ni a poli ayen ka daa tɛŋ la. Mi le basi ate ni sue a puuri ale tɛŋ kaai ale kan ta miŋka la.>> (Teerika 32:21) 20Azaya a weeni ale suinum pagrik ayen, <<Baai ale kan jam a gisi mi la, a nya mi kama. Mi pai m dek a sak baai ale kan bek mi wari la kama.>> (Azaya 65:1) 21Alege dan ka Izirali wa weeni ayen, <<Danni po meena m teeri ka m nisima a te tukpari ale a kan wom nyam.>> (Azaya 65:2)

Currently Selected:

Aroom 10: BWU

Highlight

Copy