Aroom 8

1Yɔgyɔgla de, baai ale Yeezu Kirisita ale ka bunyi la, Wen a kan te ba waalika, 2boan nyiŋŋa, biem ale kum nyeka a daam yik ti a lik kama. Alege yɔgyɔgla de, Wen Chiika nyeka vari ti basi kama. Wen Chiika de va ka Yeezu Kirisita nyiŋ a te mu vum. 3Wen nye dii ate Sinsaŋŋa an jam baga a nye la kama. Ŋa an jam baga a nye dila dii nyiŋla, tama dek nyiŋka ale a yaali diila a basi kama ate ka wobsa. Wen tom ka wadek biika ate wa siŋ jam tɛŋzuk de a neensi nurubiik a yaa nye ate biem ŋman ka pagrimoa. 4Wen nye dila kama ayen tama baai ale a va Wen Chiika ale a yaali diila, a kan a va tama nurubiik nyeka ale a yaali diila, alege ka ti a va wayɔrisima wieŋa ate Sinsaŋŋa a weeni ayen ti nye la. 5Baai ale a va badek nurubiik nyeka ale a yaali diila, a pai ba popola meena a te ka popola ŋala chaab. Baai mɛ ale a va Wen Chiika nyeka la, pai ba popola meena a te ka Wen Chiika wie. 6Waai abe dan basi ate nurubiik nyeka yaalika a soa wa popola meena, dila ku ta wa a cheŋ ka kum po. Waai mɛ abe dan basi ate Wen Chiika a soa wa popolaŋa meena, dila a ta ka vum ale suiyɔgni a jam wa jigi. 7Boan nyiŋŋa, waai abe dan basi ate wadek nurubiik nyeka yaalika a soa wa, wala choa ka Wen dachiak. Wa kan va sinsaŋŋa ale a weeni diila. Wa be an poom baga mɛ le va ŋa ale a weeni wa diila. 8Baai ale a va badek nurubiik nyeka yaalika ale a weeni ba diila, an baga a nye ate Wen sui a peenti.

9Alege nama kan va daa nurubiik nyeka yaalika ale a weeni diila. Nama va ka Wen Chiika ale a weeni ni diila, ase ku dan sum ka wensie ayen wa bo ni suiniima po. Waai ale kan ta Kirisitawa Chiika la, Kirisitawa an soa wa. 10Alege Kirisitawa a dan bo fi suinum po, nyiŋka kpi kama biem nyiŋ, alege fi chiika vua kama wayɔrisima nyiŋ. 11Ase Wen dii ale nak Yeezu a yiti kum po la, Wen Chiika a dan bo ni suiniima po, Wen mɛ le va ka wa Chiika waai ale bo ti suiniima po la nyiŋ a te ni tɛŋzuk de nyiŋsaŋa vum.

12Dila nyiŋla, m suata, nya kude a sak kama ayen ku ka fifiok, alege ku daa ayen ti va tidek nurubiik nyeka ale a yaali diila. 13Dii nyiŋla, ni dan a va dila, ni le kpi kama. Alege ni dan pai Wen Chiika pagrimu a ko nidek nurubiik nyeka yaalika, ni le vuuk kama. 14Baai ate Wen Chiika de ba niŋ a sak ba la, ka Wen bisa. 15Boan nyiŋŋa, Wen Chiika waai ate ni jam tuesi la, jam daa waai ale a basi ate ni ŋman a chim yɔm ate yɔgsum a yik ni la, alege wa jam ka waai ale a nye ate ni a chim Wen bisa ate Wen Chiika pagrim nyiŋ ate ti baga a kaari a wi Wen, ayen ti ko. 16Diipo meena, ate ti a wi Wen ayen ti ko la, ku ka Wen Chiika ale a weeni ti ti suiniima po ayen ti ka wa bisa. 17Ti be dan ka wa bisa, dai yeŋ po, ti be le jam soa ŋan baai meena ate wa puulim ayen wa le pai te ti la kama. Tama ale Kirisita abe le jam maa ka chaab a soa ŋan baai ate wa puulim ayen wa le pai te wa la. Yɔgyɔgla de, tama abe dan maara a nam Kirisita ninammu, dai yeŋ po, tama ale wa le maa chaab a nya wa zulaŋa.

18Mi a poli ayen nam kaai ate tama a nam yɔgyɔgla de la, ti an baga pai ka a magsi chaab ale Wen zula ŋaai le ŋa nyini peelim dai yeŋ ate ti nya ŋa la. 19Ŋanta meena ate Wen nye la, a kasim pii ka nyiŋ a limisi ayen Wen pai wa bisaŋa a ta nyini peelim a sak ba. 20Dii nyiŋla, Wen jam basi kama ayen ŋanta meena ate wa nye la boka kan ta kiriya.#8:20 Piilimka 3:17 Be daa ŋantaŋa dek potim nyeka yaase badek yaalika ate ku nye dila, alege ka Wen yaalika ate wa basi ayen ba chim dila. Alege yiilaŋa de a jam diem boro kama 21ayen, ŋantaŋa dek dai yeŋ po le soa ka badek nna fasiyaa ate ŋan baai ale a basi ate ŋanta a poak la a kan ŋman soa ba. Ba le soa ka badek a yaa nya zula ŋaai ate Wen le pai te wa bisaŋa la. Soa m dekka de ate Wen bisaŋa le nya. 22Boan nyiŋŋa, ti seba kama ayen a zaani dipo a ta jam paari jinla, ŋanta meena ate Wen nye la a ŋusi kama ase nipok a nyiem ale boro a biak a ŋusi diila. 23Daa bala nyiini ale a ŋusi dila, tama dek baai ale ta Wen Chiik kaai ale ka Wen tiiritaŋa bunyi a liŋ jam tama jigi ayen ku sak ayen tiirita ti chaab a bo ŋaaŋ a cheena la,#8:23 Kaabka 23:10 tama mɛ a ŋusi kama ti puusa po ase ti ale a limisi ayen Wen pai ti a chim wa nidoabilisa a yaa da tuesi ti ti wanyi wanyi nyiŋka a basi ate ti soa tidek nna fasiyaa la. 24Boan nyiŋŋa, ti ale jam nya varibasika la ate ti yaa ta yiilaŋa de. Alege ni basi ate m weeni ayen ti be dan a yiili ale jabuui ate ti ta ti nisima po la, yiila ŋala chaab abe sum daa yiila. Dii nyiŋla, ka wana ale a yiili ayen wa le nya jaab ate wa dan ga nya jaamu wa nisima po abe wa ŋman a yiili? 25Alege tama a dan ta yiila ayen ti le nya jabuui ate ti ka la, ti a limisi kama ale chichiiba ayen ti le nya.

26Wen Chiika mɛ a maari ti kama ale ti wobsimu meena. Boan nyiŋŋa, ti zɛ ti le ti puusi Wen ka dii ate ku magsi la. Wen Chiika dek ale tagri tama zuk a ŋusi a biisi a saalim dii ale Wen la, nuru an baga a weeni. 27Wen dii abe ale seba nurubiik suinum po ale ka diila, ale seba Wen Chiika popola ale ka diila. Dii nyiŋla, Wen Chiika ale tagri Wen nuruma zuk a saalim wa a magsi chaab ale wadek, Wen ale a yaali dii a te wa nuruma la.

28Tama be seba kama ayen baai ale ta yaalika ale Wen ate wa wi ba a magsi chaab ale wadek popolaŋa ale ka diila, wie meena ale a nye ba jigi la wa a basi kama ate ŋa a ta wamaŋsa a jam. 29Dii nyiŋla, Wen poom liŋ jam seba ba kama a ta nyini ku piilimka po baai ale baai ate wa lueri ayen ba ta nye kaai choa ate wa nidoabinni ta la. Wa nye dila kama ayen nidoabinni ta suata nna yegayega a yaa chim ba sua kpagi. 30Baai meena ate wa lueri la, wa wi ba kama mɛ. Baai meena mɛ ate wa wi la wa nye kama ate ba chim nyemagsika nyam. Baai mɛ ate wa nye ate ba chim nyemagsika nyam la, ka zula ate wa te ba.

31Ti be le weeni ka boan wari a magsi chaab ale nya kude? Wen abe dan za tama ŋaaŋ, ka wana le baga a nye ti wari ya? 32Wen abe ale kan zɛri wadek nidoabinni nyiŋ alege wa lak ka poi a pai wa a te tama meena la, ku a fɛ kama mɛ ayen ti be seba chak ayen wa be dan baga a nye wanni de, wa kan mini ti jabuui meena ate wa ta la. 33Nuru boro le toariŋ nuru baai ate Wen lueri la ayen ba kaasi wari ya? Aaya. Ka Wen ale weeni ayen ba ka wayɔrisima nyam. 34Nuru be boro a baga a ta biisigaamka ale ba? Aaya. Yeezu Kirisita waai ale kpi a yiti kum po a yaa kala zula jigini Wen tɛŋ la, tagri ka tama zuk a saalim wa a te ti. 35Ka boa ale baga a nye ate Kirisita yaalika a basi tama? Ka daanika yaa ninammoa yaa nuruba a nin basi ate ti nya ninam ti siaka nyiŋŋa yaa kɔm yaa chaboala yaa nyigsika yaase kummoa? 36Ase ba ale ŋmarisi Wen gbaŋka po ayen, <<Alege fi nyiŋ, ti a tu kum danni meena. Tama a nye ase ka pa ŋaai ate ba ayen ba tɔgri la.>> (Yiila 44:22) 37Alege nyaŋa de meena ale a nye ti jigi la, Yeezu Kirisita waai ale ta yaalika ale ti la, maari ti kama ate ti nak kpaliŋka a de nna chaalima. 38Dii nyiŋla, mi seba chak kama ayen kum yaase vum yaase Wen maarɔba yaase vioku po pagrita yaase jinla wie yaase chum wie yaase wenzuk pagrita 39yaase jaab wenŋmazuk yaase kpiluŋ tɛŋ yaase jabuui meena ate Wen nye la ale baga a poori tama Wen yaali ka ale bo Yeezu Kirisita ti Nyɔnɔwa po la a basi.

Currently Selected:

Aroom 8: BWU

Highlight

Copy