Pa Sakka 5

1Mi ale nya waai ale wa kali wenŋmazuk naamu zukpaglika zuk la, wa jam ta ka gbaŋ wa juga po, ba jam ŋmarisi ka wie a dueni ka niŋ ale ka ŋaaŋ alege pai ŋanta a bobi buyopɔi a lik gbaŋka. 2Ate mi yaa nya maarɔ wanyi ate wa yaa mooli ale lueluk kpioŋ ayen, <<Ka wana ale baga a foli bobika buyopɔiwa alege a lak gbaŋka nna.>> 3Alege nuru jam ka wenŋmazuk yaase tɛŋzuk yaase kpiluŋ a baga a lak gbaŋka a nya ka po.

4Mi ale nya ale nuru karo a baga a lak gbaŋka a nya ka po la, mi yaa deri a kum. 5Nisɔmma wanyi a yaa weeni mi ayen, <<Kan fi a kum. Gbeŋli dii ale nyini Juda demma po la, wa ka Naawa Deevid ŋaaŋbiik. Wala ale nakdeerɔ. Wa le foli bobika buyopɔiwa a lak gbaŋka.>>

6Mi yaa nya ale ka Pabiik ale za du. Ka jam za moata ka wenŋmazuk naamu zukpaglika ate ŋanvuta tinaansiwa ale nisɔm pisiye ale banaansiwa a za gilim ka la. Ka jam a nye ase ba ko ka kama la. Pabiika a jam ta ka nyiila ŋayopɔi ale nina ŋayopɔi. Ka nina ŋayopɔiwa ale ka nyiila ŋayopɔiwa ka Wen chiisa siyopɔiwa sii ate Wen a tom a basi tɛŋka meena po la. 7Pabiika yaa cheŋ ga tuesi gbaŋka waai ale kali wenŋmazuk naamu zukpaglika zuk la juga nisaŋa po. 8Pabiika ale tuesi gbaŋka la, ŋanvuta tinaansiwa ale nisɔm pisiye ale banaansiwa a yaa yiti a duak tɛŋ wa niŋ. Nisɔmma meena jam ta ka ŋanta ate ba a neensi kpanta ale maa ta china, ate ŋa a nyaksi ase ligmɔniŋ la. Nyum masik ale bo ŋa po. Nyummu de ka Wen nuruma puusaŋa. 9Ba yaa jam yi yipaali ayen, <<Fi ka nuru waai ale magsi gbaŋka pai ka abe fi foli bobika buyopɔiwa. Ba le ko fu la, fi jam pai ka fi ziimu a da tuesi nuru boari a basi Wen jigi. Fi ale lueri ba a ta nyini satɛŋsa meena ale nuruba meena po a nyini ate ba meena a biisi biisa tɔgatɔga. 10Fi ale bobi ba nalima a lueri ba ayen ba chim kaabteerɔma abe ba a tom tuima a te ti Wenni. Ba ale soa tɛŋka meena nuruma.>>

11Mi yaa ŋman pilim nya ale Wen maarɔma a bo dula. Ba jam piisi kama a paari tusa ale tusa, tusa piisa ale tusa piisa. Ba yaa gilim ŋanvuta tinaansiwa ale nisɔmma. 12Ate ba yaa a yi yiili ate ku jueli ayen, <<Pabiik kaai ate ba ko la ku magsi ka ti a zuli fu dii nyiŋla fi soa ka ŋanta meena ale ta yam ale pagrim ale zula ale nalim ale pimpauk.>> 13Ate mi yaa wom ŋan baai buuni meena ale bo wenŋmazuk ale tɛŋzuk meena ale kpiluŋ ale nyiam po meena ate ba jam a yi yiili ayen, <<Ni basi ate ti pak Waai ale kali wenŋmazuk naamu zukpaglika zuk la ale Pabiika, dii nyiŋla ba ta ka zula ale nalim ale pagrim yegayega taam wuu.>> 14Ba le yi yiini a nueri la, ŋanvutaŋa tinaansiwa a yaa weeni ayen, <<Ku be nye dila,>> ate nisɔmma yaa yiti a duak tɛŋ a puusi.

Currently Selected:

Pa Sakka 5: BWU

Highlight

Copy

Compare