Pa Sakka 4

1Ku ŋaaŋnyiŋ ate mi ŋman pilim wom ale nya jaab ase m goadaasim kama la. Wenŋmazuk mi yaa nya tuok ale ku lak, ate lueluk kuui ate m liŋ wom nna ase damuniŋ la weeni mu ayen, <<Jueli jam dela ate m weeni fu dii ale ku jam nye la.>> 2Wen Chiika a deri de mi niŋ ate mi jueli ga a jo. Mi yaa nya Wenŋmazuk naam zukpaglik ale ka za ate nuru a kali ka zuk. 3Wa ninaŋa a jam a nyaksi ase ka tintain mɔnta la, ale tintain ŋaai ale a nye ase kpabunyiam la ate nagoritom a nye ase gunungoona la a gilim wa. 4Kalisa jiga pisiye ale sinaansi ale jam gilim wa. Nisɔm pisiye ale banaansi ale jam kali si zuk. Ba meena a jam jo ka garuk peelita ale vuk ligmɔniŋ zutɔgsa. 5Wenzukku a jam a nyaksi kama ale a na wenŋmazuk naamu zukpaglika jigini. Zeuŋta tiyopɔi ale jam toati a za wa niŋ. Ti jam ka Wen chiisa siyopɔiwa. 6Nyakpiemu ale jam a nyaksi ase nyaasuŋ la ale jam maa za wenŋmazuk zukpaglika niŋ. Ŋanvuta tinaansi ale jam maa za gilim gum du. Si ninaŋa a jam piisi kama a kali niŋ ale ŋaaŋ. 7Duŋsaŋa kanyi a jam a nye ase ka gbeŋli la, kanyi a jam a nye ase ka lalik la, kanyi zuk a jam a nye ase nuru zuk la, kanyi mɛ zuk a jam a nye nna ase jiiruk ale lak ku kiŋkaŋŋa a basi la. 8Si meena a jam ta ka kiŋkaŋŋa ŋayuebi alege ate si ninaŋa a sueri si nyiŋsaŋa meena. Si meena a kasim jam a yi ka yiila yok ale kantueŋ alege kan vuusi. Si jam yi a weeni ayen, <<Weleŋsa, Weleŋsa, Weleŋsa ale Naawen dii ale ka Wen a ta pagrim la, waai ale jam boro, ale boro, ale boro diipo meena la.>>

9Duŋsaŋa sinaansiwa a jam yi si yiilaŋa a pak ka waai ale jam kali wenŋmazuk naamu zukpaglika zuk la, dii nyiŋla wa jam ta ka zula ale nalim alege boro diipo meena. 10Si le jam a yi si yiilaŋa la, nisɔmma pisiye ale banaansiwa meena a kasim jam a duak ka tɛŋ ale a yiti wenzuk ale a puusi waai ale jam kali wenŋmazuk naamu zukpaglika zuk alege boro diipo meena la. Ba meena a kasim jam a lak ba zutɔgsaŋa a dueni ka wa niŋ alege a weeni ayen, 11<<Ti Naawen ale ti Wen yaa, fi ale nye ŋanta meena. Ka fidek yaalika ate fi basi ate ba boro. Dila ale soa ate ku magsi ayen ti a puusi fu, dii nyiŋla fi ta ka zula ale nalim ale pagrim.>>

Currently Selected:

Pa Sakka 4: BWU

Highlight

Copy

Compare