Pa Sakka 3

1<<Ŋmarisi wieŋa de a te Wen maarɔwa waai ale a nya Kirisita bisaŋa ale a tu chaab Sardis la zuk. Wieŋa de a nyini ka waai ale ta Wen Chiisa siyopɔiwa ale chiŋmarisa siyopɔiwa la jigi ayen, <M seba ni ale a tom dii ate nuruba a weeni ayen ni a va mu nalimnyiini alege ni kan va mu nalimnyiini la kama. 2Ni yiti zaani ale ninmuna a va mu nalimnyiini, mi nya ayen tuim ŋaai ate ni tom la an diem magsi Wen nina po. 3Ni teeri ba ale sak ni dii ale ni ale wom diila ate ni basi ni wabaataŋa abe ni a zuli wa. Ni dan kan yiti a zaani ya m le jam diiri ni ase zue la, ni kan seba diipo ate m le jam la. 4Ni ba gela ale bo Sardis la an diem tom tuimbaata tii le ti nye ate ni suiniima a daŋ la. M le te ni garuk peelita ate ni jo a be m basi ate nama ale mi a cheŋ ale chaab diila ni magsi ka dila. 5M le basi ate nuru baai ale ŋmasi yik nalimnyiini ate ku ga a paari ku kpeglimka la a jo garuk peelita m be kan yeeri ba yueŋa nyuvuri dii ale kan ka kpeglimka la gbaŋka po. M le weeni a lagri m Kowa niŋ ayen m soa ba kama. 6Ni lak ni tueŋa a wom dii ate Wen Chiika a weeni Kirisita bisaŋa ale a tu chaab a bo Asia la.>

7<<Ŋmarisi wieŋa de a te Wen maarɔwa waai ale a nya Kirisita bisaŋa ale a tu chaab Filadelfia la zuk. Wieŋa de a nyini ka waai ale ka nuru weleŋ ale wensie nyɔnɔ ale ge ta Deevid safiika la. M dan pai ka a lak tuok nuru karo a baga a lik ku. M be dan pai ka a kpari, nuru karo a baga a lagri ku. 8<M seba ni ale a tom diila kama. M be seba ni ale ta pagrim magadek la kama. Ni va m sinsaŋŋa kama ale ta siaka ale mu. Mi be lak tuoku kama ni niŋ geŋ. Nuru kan lik ku. 9Ni a wom. Baai ale a velim ayen ba ka Juuba la, Sitaana ale soa ba. M le basi ate ba jam a kpi duna ni niŋ a zuli ni, ate ba seba ayen mi a yaali ni kama. 10Ni ale va mi sinsaŋŋa ale chichiiba la nyiŋ, mi mɛ ale lik nama mɛ a tara ate ninam buui ale cheena tɛŋzuk ayen bu choa nuruma a nya la a kan paari ni. 11M cheena kama, ku kan beni. Ni be chiib ta ni nak dega tiirimu ate waai a kan vari ni jigiya. 12Baai ale baga a yik ku a ta paari ku kpeglimka la, m le basi ate ba a nye ase ka zaŋŋa la Wen yenni po taam wuu. M le ŋmarisi Wen yuenni ale wa tɛŋka yuenni a dueni ba nyiŋ. Wa tɛŋka ka Jerusalem paalik kaai ate Wen ayen wa basi ate ka jam tɛŋzuk meena chum diipo la. Mi mɛ le ŋmarisi m yuei paani a dueni ba nyiŋ. 13Ni lak ni tueŋa a wom dii ate Wen Chiika a weeni Kirisita bisaŋa ale a tu chaab a bo Asia la.>

14<<Ŋmarisi wieŋa de a te Wen maarɔwa waai ale a nya Kirisita bisaŋa ale a tu chaab Laodisia la zuk. Wieŋa de a nyini ka waai ale basi ate wie a nye ale ta wensie la ale chim wensie seerɔ la ale a nya Wen ŋan nyientaŋa zuk la ayen, 15<M seba ni ale a tom diila kama. M seba kama ayen ni an yɔgsa, ni be an tuila. Mi a yaali ka ni yɔgsa yaase ni tuila. 16Alege ni abe le bo suŋsuŋsaŋa po nna, ni an tuila, ni abe an yɔgsa la, m le chiiri ni kama m nɔnni po a basi. 17Ni a weeni nidek kama ayen, <<Tama ka jigsirɔba, ti kan yaali jaab jaaboa.>> Alege ni zɛ ayen ni ka niniga nyama. Ni ka ŋanjaksa a cheŋ chaboala ale chim yeoba. 18Ni da ligmɔniŋ mi jigi, ŋaai ale chim ligmɔniŋ dek la ate ni chim jigsirɔba. Ni da garuk peelita mɛ mi jigi a lik ni chivieŋa. Ni be da nina kpaam mɛ m jigi a nyo ni ninaŋa po ate ni a nya. 19Mi a toariŋ baai meena ate m ta yaalika ale ba la kama, ale ŋman a yaali ayen m dak ni tuimbaataŋa a sak ni. Ni basi dii ate ni a tom la a be ni va mu nalimnyiini. 20Ni be wom, mi kasim za ka dɔkku nɔi a nak ale ge a wi. Baai ale a wom m lueluku ale ge a lak tuoku la, m le jo, ate ba ale mi a maari chaab a dɛ ŋandiinta. 21Baai ale ŋmasi yik di nalimnyiini ate di a paari kpeglimka la, m le te ba suik ate ba kali m tɛŋ m naamu jigini. Mi daam ŋmasi yik kama a ta di a paari di kpeglimka. Dila ale soa ate m Kowa basi ate mi kali dula. 22Ni lak ni tueŋa a wom dii ate Wen Chiika a weeni Kirisita bisaŋa ale a tu chaab a bo Asia la.> >>

Currently Selected:

Pa Sakka 3: BWU

Highlight

Copy

Compare