Pa Sakka 15

1Ate mi ŋman nya jakperikaliik tanjaŋini wenŋmazuk ate ku cha mi nna yegayega. Maarɔba bayopɔi ale jam ta ninam tɔgatɔga buyopɔi a jam bo dula. Ba le jam basi ate ninammu a yik ka tɛŋzuk nuruma a kpeglim. Dii nyiŋla, Wen sui ale jam a puuri ale nuruba diila ate wa ayen wa te ba waalika la a nueri kama yɔgla.

2Mi yaa nya Naawen nuru baai ale jam kan puusi a te duŋ kperikaliika yaase ka bɔglukku, yaase ka pai ka yuenni ale kobsiyuebi ale pisiyuebi ale bayuebi a ŋmarisi ba nyiŋ. Mi jam, nya ba ale za moata ka nyakpiemu ate bu a nyaksi nna ase nyaasuŋ la. Bolim ale jam bo nyiamu po. Nuruma a jam ta ka ŋanta nna a se kpanta la ate Naawen a jam pai a te ba. 3Ba yaa jam yi Moosis waai ale jam ka Naawen tomteerɔ la ale Pabiika yiili. Ba jam yi yiini ayen, <<Naawen dii ale ka Wen la, fi ka waai ale soa ŋanta meena pagrim la, ku chim ka wakperikaliik ti jigi, fi tuimaŋa nyiŋ. Fi ka waai ale ka tɛŋzuk meena nuruma Naab la. Tuim ŋaai meena ate fi a tom la, ŋa ka wensie. Ŋa daa wasusuga. 4Naawen yaa, fi nyiini ale nuru weleŋ. Dila ale soa ate ku a magsi ayen nuru meena a te fu zula abe ba a weeni a sak ba suata fi le ka Wen kpienni diila. Tɛŋzuk nuruma meena le jam za fi niŋ a puusi a te fu, dii nyiŋla ba seba ayen fi tuimaŋa meena a daa tuim susuga.>>

5Ba le jam yi yiini a nueri la, mi yaa nya ale Wen yenni nɔnni a lak ate pumpuulima viuku a boro. 6Maarɔba bayopɔiwa ale jam ta ninam tɔgatɔga buyopɔiwa la a yaa nyini dula a nyini. Ba jam jo ka garuk peelita ate ti nala nna yegayega. Ba jam maa ta ka garuk pali fiik sii ale a nyaksi a neensi ligmɔniŋ la yaa bobi gilim ba kuusa. 7Ba yaa cheŋ ga za ŋanvuta tinaansiwa wanyi niŋ. Ŋanvutaŋa a jam za gilim ka Wen naamu zukpaglika. Javuk kuui niŋ ate ba jam za la, a jam pai Wen dii ale kasim boro taam wuu la suipuurumu ale wa le wa te tɛŋzuk nuruma waalika la, a yaa jam pai Wen suipuurumu a nyo china ŋayopɔi po a te maarɔma wanyi wanyi. 8Wen zulaŋa ale wa nalimu ale wa pagrimu yegayega a jam a nye ase ka nyuisa la a yaa sueri wa Yenni. Ase ka maarɔma a nin basi ate ninam tɔgatɔga buyopɔiwa a yik tɛŋzuk nuruma a nueri, nuru an jam baga a jo Wen yenni po.

Currently Selected:

Pa Sakka 15: BWU

Highlight

Copy

Compare