Pa Sakka 14

1Ate mi yaa nya ale Pabiik ale nuruba tusa kook ale pisinaansi ale banaansi (144,000) a za guuk kpioŋku Zayon zuk. Ba jam ŋmarisi ka Pabiika ale ka Kowa yue a dueni nuruma de nyiŋ. 2M jam wom ka lueluk kpioŋ mɛ a se nyiam ale nyini pina zuk a wuuri a siŋ la, yaa a se ŋmoruk ale a na la. Lueluk kpioŋku de jam nyini ka wenŋmazuk. Lueluk mɛ jam a nye ase nuru boari ale jam a nak kpanta la. 3Ate ba yaa jam yi yi paali wenŋmazuk naamu zukpaglika niŋ ale ŋanvuta tinaansiwa ale nisɔm pisiye ale banaansiwa niŋ, ate waai an jam baga a zamsi yiini ka nuruba tusa kook ale pisinaansi ale banaansiwa (144,000) nyiini ale nya da tuesika a nyini tɛŋzuk la. 4Ba de ale baai ale kan jam taŋ badek ale nipooba, diila ba jam yik badek ka cheri. Ba jam va Pabiika kama juijui meena ate ka a cheŋ la. Ba jam da ba kama nuruba po a pai ba a te Wen ale Pabiika ase yɔna ŋaai ale dɛ niŋ la. 5Nuru an jam baga a weeni ayen ba velim venta. Ba jam ka kaasuŋ ale kunyi mɛ la.

6Ate mi yaa ŋman nya maarɔ ale wa bo wenŋmazuk niŋniŋa a yaa yiri a cheŋ. Wa ta ka Wen wamaŋsaŋa ayen wa ta cheŋ ga a te tɛŋsa meena ale buura meena ale biisa meena ale nuruba meena. 7Wa yaa weeni ba ale lueluk kpioŋ, ayen, <<Ni a te Wen zula abe ni a pak wa, dii nyiŋla, wa ka pagrim nyɔnɔ. Diipo ate wa ayen wa bo nuru meena buusa la a paari kama. Wa nye wenŋmazuk ale tɛŋka ale nyakpiemu ale bulisa meena. Dila ale soa ate ku a fɛ ayen ni a puusi a te wa.>>

8Wen maarɔ wa choa mɛ yaa yiri a vi maarɔwa ŋaaŋ ale a weeni ayen, <<Tɛŋ kpieŋka Babilon, a lo kama. Kaboŋsa tuim ŋaai ate ka nuruma a jam a tom la, a nye se ka da pagrik ate ka fɛ ba ate ba nyu la.>>

9Wen maarɔ wa choa a yaa ŋman yiri a vi nwala ŋaaŋ ale a weeni ale lueluk kpioŋ ayen, <<Baai meena ale a puusi a te duŋ kperikaliik kaai ale jam nyini nyakpiemu po a nyini la, yaase baai meena ale basi ate ka bɔglukku a ŋmarisi ba nisa ale ba dee nyiŋ la. 10Wen ta ka suipuurum ale ba ate wa ayen wa le te ba waalika. Wa suipuurumu a nye ase ka da pagrik la. Wa suipuurumu a nye ase ka da bula ate wa yaa fɛ ba ayen ba nyu la. Wa le basi ate ba pai ba a nyo ka bolim po ate ba nam nna yegayega Pabiika ale ka maarɔma baai ate ka lueri a te ka dek la niŋ. 11Bolim buui ate ba le nam bu po la nyuisaŋa a kasim a jueli ka wenŋmazuk taam wuu. Baai ale jam puusi a te duŋ kperikaliika ale ka bɔglukku ale ŋman basi ate ku pai ku yuenni a ŋmarisi ba nyiŋ la, bala dek ale ba kasim a nam alege kan nya vuusum.>>

12Dila ale soa ate Wen nuruma baai ale a siak a te Wen sinsaŋŋa alege kan zɛri Yeezu vaka la, ku a fɛ ayen ba va yɔgyɔgla ale chichiiba.

13Ate mi yaa ŋman wom lueluk ale ku nyini wenŋmazuk siŋ jam a yaa weeni ayen, <<Ŋmarisi dii ate m le weeni la a dueni. Baai ale a tom tuima a te Naawen alege a kpi yɔgyɔgla la, ba sue le peenti kama.>> Wen Chiika mɛ a maa weeni gum du ayen, <<Fi biisi ka wensie. Wen le tuni ba abe wa basi ate ba vuusi ale ba tuim pagrisa yegayega abe wa basi ate ba sue peenti.>>

14Mi ŋman gaa nya la ale waai ale a nye ase saalɔbiik la, ale wa kali chiŋma peeluk zuk. Wa jam vuk ka zutɔk kaai ale a nye ase ligmɔniŋ ate ba pai nye la. Wa jam ta ka gɔtuk kuui ale ta nɔi la wa nisa po. 15Wen maarɔ a yaa nyini Wen yenni po a nyini a biisi ale lueluk kpioŋ a yaa weeni ayen, <<Ku paari tɛŋka ŋantaŋa ŋarika kama. Pai fi gɔtuku a nyini.>> 16Ate waai ale jam kali chiŋmanni zuk la a yaa misi wa gɔtuku a ŋari tɛŋka ŋantaŋa.

17Wen maarɔ wa choa mɛ yaa jam nyini Wen yenni dii ale bo wenŋmazukku la. Wa mɛ jam ta ka gɔtuk kuui ale ta nɔi la.

18Wen maarɔ waai ale a nya bolimu zuk la, yaa nyini kuŋkuŋku jigini a weeni maarɔ waai ale ta gɔtuku la ayen pai fi gɔtuku a ŋari tiisaŋa diila yɔnaŋa a muni kama. 19Maarɔwa yaa misi wa gɔtuku a ŋari tiisaŋa yɔnaŋa a lɔnsi tɛŋ a yaa tigsi ŋa a dueni juijui ate ba a ŋmiak ŋa nyiamu la. Dula jigini ale Wen suipuurumu ka bunyi. 20Ŋa nyiamu ŋmiaka jigini a jam bo ka tɛŋka ŋaaŋnyiŋ. Ba yaa le ga ŋmiak yɔna ŋaai ate maarɔwa a tigsi dueni la, ziim nna yegayega ale jam nyini ŋa po a nyini. Ziimu meena ale jam nyini la, bu jam chali tɛŋka kama a wɔŋa ase mɛɛla kobsiye la a yaa doa jueli a lim nuru zuk.

Currently Selected:

Pa Sakka 14: BWU

Highlight

Copy

Compare