Pa Sakka 16

1Ate mi yaa wom ale lueluk kpioŋ a nyini Wen yenni a yaa weeni Maarɔba bayopɔiwa ayen, <<Ni pai Wen suipuurum yegayega ale bo chinaŋa po la a cheŋ ga kpiiri basi tɛŋka zuk.>>

2Maarɔma wanyi a yaa dɛ niŋ nyini ga kpiiri suipuurumu wa chinni po a basi tɛŋka zuk, ate niri kperikaliisa a yaa nye nuru baai ate duŋ kperikaliika a ŋmarisi ba nyiŋsa ate ba jam a kaab ka bɔglukku la ate ba jam a nam nna yegayega.

3Wen maarɔ waai ale jam saari bayewa la jam kpiiri suipuurumu wa chinni po a basi nyakpiemu po. Nyiamu a yaa jam muni nna ase kpio ziim la ate jaabuuri ale jam bo bu po la a yaa kpi.

4Wen maarɔ waai ale jam saari batawa la mɛ yaa kpiiri suipuurumu wa chinni po a basi belaŋa ale bulisaŋa po ate nyaataŋa a chim ziim. 5Mi yaa wom ale maarɔwa a weeni ayen, <<Fi ka waai ale ka Weleŋsa Nyɔnɔ la. Fi ale piilimka, fi be boro kama taam wuu, fi ka Weleŋsa Nyɔnɔ, dii nyiŋ la fi buusaŋa ate fi bo la ka wensie. 6Ba jam ko fi nuruma ale biisiteerɔma ate ba ziimu a yaa nyini tɛŋ. Ku magsi kama ale fi ale pai ziimu ayen ba nyu yɔgyɔgla la.>> 7Ate mi yaa wom ale lueluk a nyini kuŋkuŋku jigini a yaa weeni ayen, <<Naawen dii ale ka Wen la, fi ka Waai Ale Soa Ŋanta Meena Pagrim, ku magsi kama ale ŋman chim wensie mɛ fi ale a bo nuruba buusa diila.>>

8Wen maarɔ waai ale jam saari banaansiwa la yaa kpiiri suipuurumu wa chinni po a basi wenbinni zuk ate di kantueŋka a yaa nya suik a dɛ nuruma. 9Kantueŋka ale jam dɛ ba la, ba yaa ka a te Wen, dii nyiŋ la, wa le basi ate ninammu a yik ba la. Alege ba an jam basi ba tuimbaataŋa tomka alege tagri ba popola a te Wen zula.

10Wen maarɔ waai ale jam saari banuwa la a yaa kpiiri suipuurumu wa chinni po a basi duŋ kperikaliika naamu jigini. Wa jigini ate wa jam boro la a yaa jam sobri ate wa ŋaaŋviirɔma sue a jam a puuri ate ba jam a dom ba giŋgeluŋta. 11Ba yaa jam ka a te Wen dii ale bo wenŋmazuk la ba niraŋa ale ninammu nyiŋ, alege ba an jam basi ba tuimbaataŋa tomka.

12Wen maarɔ waai ale jam saari bayuebiwa la yaa jam kpiiri suipuurumu wa chinni po a basi beli kpienni Yufiretis po. Nyiamu a yaa jam kpeeri alege ate nalima ŋaai ale nyini kori nummu po a cheena la a nya suik a taam jam. 13Ate mi yaa nya chichirik baata tita ale ti a neensi buntua. Chichirik baataŋa de a jam nyini ka jaab waai ale a neensi waamu a jam yiak nipowa ale duŋ kperikaliik kaai ale jam nyini nyakpiemu po a nyini la ale venta biisiteerɔwa nɔi po a nyini. 14Chichirik baataŋa a jam ta ka pagrim a tom wakperikaliisa yegayega. Ba jam nyiem kama a yaa tigsi tɛŋzuk nuruma meena nalimaŋa ale ba nuruma a nyo jigi yeŋ ayen Wen Kpienni dai kpienni danni ate wa le jam a bo buusa la a dan paari, ba le tu chaab ale wa a nye kpaliŋ.

15Ni wom ti Nyɔnɔwa Yeezu Kirisita ale a weeni ayen, <<Nya, m kan beni m le jam ase ka zue la. Niauŋ a bo le ka waai ale a limisi ale basi ate wa gattaŋa a bo le wa la, ate wa kan cheŋ chaboala ate ba nya wa chivie.>>

16Ate chichirik baataŋa a dɛ nalimaŋa niŋ, a ta ba jam jigi ate ba a wi dula ale Juuma biika ayen Amagedon.

17Ate maarɔ waai ale saari bayopɔiwa la a jam kpiiri suipuurumu wa chinni po a basi wenŋmazuk. Mi yaa wom ale lueluk kpioŋ nyini wenŋmazuk naamu zukpaglika jigini Wen yenni po a siŋ a weeni ayen, <<Ku jam ya.>> 18Chiŋmaaŋa yaa nyaksi ale na ate tɛŋka a choa nna yegayega. Diipo ate Wen a nye nuruba ate ku ta dila a jam paari jinla, tɛŋka an diem choa nna la. 19Tɛŋ kpieŋka a jam poori ka buta ate tɛŋzuk tɛŋ kpieŋsaŋa a kaasi meena. Wen yaa teeri Babilon wari a yaa basi ate ka nuruma a nyu wa suipuurumu wa beerika po ase daam la. 20Guuk kpientaŋa meena a yaa muriŋ bɛ ate tɛŋsaŋa meena ale nya tii ale jam doa gilim tɛŋ sii meena la mɛ a muriŋ bɛ. 21Ŋmoruk tana a yaa jam nyini wenŋmazuk a lo nuruma zuima. Ŋmoruk tanaŋa dinyi a jam dobra a se ka za boorik geli la. Nuruma yaa jam ka a te Wen dii nyiŋla, wa le jam basi ate ŋmoruk tanaŋa a dobra la.

Currently Selected:

Pa Sakka 16: BWU

Highlight

Copy

Compare