Yiila 147

147

1Pak Naawen. Ku le nala dii ate ti le yi yiila a pak ti Wenni, ku le nala dii ale magsi ayen ti pak wa.

2Naawen ale yik Izirali a zaani, wa le a tigsi Izirali dem baai ate ba yik ta cheŋ la. 3Wa a tebi baai sue ale kaasi ale a bobi ba mula.

4Wa le seba chiŋmarisaŋa nɔi ale a wi kanyi meena yuei. 5Ti Nyɔnɔwa a zuak kama ale ta pagrim nna yegayega, wa miŋka a ka bain ya. 6Naawen a maari baai ale a yik badek la kama, alege yuk wabaata nyama a lɔnsi tɛŋ.

7Ni yi yiila a te Naawen ale jiam teka, pai kpanuŋku a nak yiila a te Wen. 8Wa lik wenzukku kama ale chiŋma, wa a te tɛŋka ŋmoruk ale nye ate wuuk a chim guuta zuk. 9Wa le a te niiga ŋandiinta, ale tagaaruk bisa ase ti nin wi.

10Wa mariŋka a ka le wusum pagrimoa, yaase wa mariŋka a bo ale nurubiik naŋsa, 11Naawen a mariŋ ka baai ale a chali wa la, baai ale pai ba yiila a basi wa ŋmanteka po la.

12Jerusalem, ni zak Naawen yuenni a zaani, Zayon, ni pak ni Wenni, 13diila wa basi kama ate ni nansuiŋtaŋa ku ti biŋŋa a pagra, ale a niak ni nuruma ale bo ale ni la. 14Wa basi ate suiyɔgni a bo ni tɛŋ banaŋa alege a te ni ŋanbie maŋsa.

15Wa a te wa wieŋa tɛŋka, ate wa wanni a chali nna nwuli. 16Wa a pati ŋmoruk tanaŋa a waaŋ ase buntuem la. 17Wa basi ate viok a jam ase ziŋa la, waai a kan baga a tu chaab ale ŋootaŋa ate wa tom la. 18Wa tom wa wanni ate di nyaliŋ ba, wa dam wa maglimu, ate nyaataŋa a chali.

19Wa pai wa wanni a sak Jekob, wa ŋmarisika ale wa buusaŋa a te Izirali. 20Wa an nye nna a te tɛŋ yoŋŋoa, ba zɛ wa buusaŋa Pak Naawen.

Currently Selected:

Yiila 147: BWU

Highlight

Compare

Copy