Yiila 140

140

1Naawen yaa, vari mu nuru baata po a basi, lik mu gaasa nyam po, 2baai ale ta biem ba suiniima po a siti kpaliŋsa daa meena. 3Ba basi ate ba noaŋa a tua ase waab la, ate waapiisa yaam a bo ba noaŋa po.

4Lik mu, Naawen yaa, wabaata nyam nisima po, lik mu a ta nyini gaasa nyam baai ale a zɔk ba nye ate m lo la. 5Kanjanta nyam a bari ka baruk a magsi mu, ba dueni ba battaŋa, suiku po ba dueni batta ayen ti yik mu.

6Naawen yaa, mi a weeni fu ayen, <<Fi ka mi Wen.>> Naawen yaa, wom m le kum a yaali jiirim la. 7Nyɔnɔwa waai ale ka Naawen yaa, Naawen dii ale m varibasidɔ pagrɔ, waai ale a lik m zukku kpaliŋ dai, 8Naawen yaa, kan te wabaata nyama ba le a yaali diila. Kan basi ate ba le a zɔk diila a nye, dan kan daa di ba le ta kanjanta.

9Basi ate baai ale gilim mu la zuima a lik ale daani kaai ate ba noaŋa a nye la. 10Basi ate bolim kaala a lo ba zuk, ba yuk ba a basi bolim po, a basi bagta goluk po, ate ba kan yiti diipo. 11Baai ale velim a te nuruba la kan te ba kali tɛŋka po, kaasuŋ a jam kaasi baai meena ale ka gaasa nyam la.

12Mi seba ayen Naawen a maari niwomma ale a nya ŋanjaksaŋa wensie zuk. 13Wensie wayɔrisima nyama ale pak fi yuenni ate nuru maŋsaŋa ale bo ale fu.

Currently Selected:

Yiila 140: BWU

Highlight

Compare

Copy