Yiila 139

139

1Naawen yaa, fi kpesi nya mi kama a sebi mu. 2Fi sebi mu kama m nin kala ale m nin yiti, fi nyiem deri ŋaam sebi mi kama. 3Fi a nya m peelim nyinika ale m duaka, fi malim chaab ale m nyeka meena kama. 4Wari a dan ga bo m nɔi po ale fi poom seba di meena kama chessi Naawen yaa.

5Fi yik mu kama niŋ ale ŋaaŋ a tara, fi basi ate fi nisa a bo m zuk. 6Sebi kala ka nna kperikperik a te mu, a zuak gaam m taka.

7Mi ale cheŋ ka bɛ abe m ge fi chiika? Mi ni chali ga ka bɛ abe m ge fu. 8M dan jueli wenŋmazuk, fi bo ka dula, m dan siŋ tɛŋ a duak, fi bo ka dula. 9Mi dan poom yiti kali kantueŋka kiŋkaŋŋa zuk, m dan poom ga kali nyakpiemu po niŋniŋŋa, 10dula jigini fi nisaŋa ale gani mu, fi juga nisaŋa ale yik mu giŋgiŋ.

11Mi dan weeni ayen, <<Wensie legi ale lik mu ate bolimu a chim yok a gilim mu,>> 12legini a kan poom chim legi a te fu, yokku a nyaksi kama ase kantueŋ la, diila legi a nye ase ka bolim la fi jigi.

13Fi ale nye m popo meena, fi ale tom mu chaab m mawa ponni po. 14Mi a pak fu kama dii nyiŋla fi nye mu kama nna kperikperiga ale yɔgsum, fi tuimaŋa ka wakinkagla, mi seba dila a chak kama. 15Mi nyiŋ diokku an suk ale fu, fi le nye mi jigi susugi. Fi le nye mi a gum chaab m mawa ponni po, 16fi nina a nya mi nyiŋka ale kan diem nye la kama. Da ŋaai meena ale nye magsi mi la a jam ŋmarisi kama fi gbaŋka po alege ate dinyi mɛ la an jam ya.

17M Wen yaa, fi popolaŋa a ta tuilum kama. Ŋa piisi ka nna yegayega. 18Ase m dan poom ayen m chiini ŋa, ŋa le piisi a gaam tintain busuŋ. M dan poom yiti, m diem bo le ka fi.

19M Wen yaa, mi dek a yaali ayen fi ti ko m dachaasaŋa kama. Mi a yaali kama ayen gaasa nyama a basi mu m dek m nyiini. 20Ba biisi ka biem a te fu, fi dachaasaŋa a kaasi fi yuenni kama. 21Naawen yaa, mi an kisi baai ale kisi fu la kama yaa, ale kisi baai ale yiti a ta chaab ale fu la yaa? 22Mi din bola a kisi ba kama chekki. Mi a chiini ba ase ka mi dachaasa la.

23M Wen yaa, kpesi a nya mu, a seba m popolaŋa, chamsi mu a nya, ate fi seba m popolaŋa. 24Kpesi a nya ase biem a nin bo m po abe fi yaa gani mu fi suik kuui ale kaa kpeglim la po.

Currently Selected:

Yiila 139: BWU

Highlight

Compare

Copy