Wamagsima 4

1M bisa ni wom ase ni kowa nin sak ni. Ni chelsi a wom abe ni zamsi yam, 2diila vuuk naliŋsa ate m pai a sak ni. Kan cheem ŋaaŋ a te m sinsaŋŋa. 3Mi mɛ jam chim ka m kowa nidoabili ate m mawa jam a nya m zuk nalimnyiini ase wa bi yeŋ la.

4Wa sak mu ale biisi ale mu ayen, <<Basi ate fi suinummu a ta wieŋa, ta m wieŋa ate fi vua. 5Be ta yam. Te ate fi buusa boka a chim bo maŋsa. Kan baŋ m wieŋa yaase fi cheem ŋaaŋ a te ŋa. 6Kan cheem ŋaaŋ a te yammoa, dii nyiŋla bu ale lik fu. A yaali yam ale bu ale nya fi zuk. 7Jaab a karo a ŋman gaam yammoa. Fi baga a nya ŋanta kama, alege yam maŋ ale gaam jaab meena. 8Fi dan pai yam ate bu chim niŋ nyɔnɔ, bu le nye ate fi chim nuru kpioŋ. Gbaari bu, ate bu ale te fu zula. 9Yam ale nye fi jigi ase ka wuuk puuta ale zutɔk naliŋ ale bo fi zuku po la.>>

10M biiga, wom mu abe fi nye m le a weeni diila, ate fi ale ta nyuvuri woŋ abe fi boka po mɛ a nala. 11M le sak fu yam suitaŋa ale ka diila, abe m de fi niŋ a ta fu cheŋ suik tii ale teenti la po. 12Fi kan cheŋ chelim ate fi wari ŋaaŋŋa. Fi abe kan chali chala a nak naŋŋa. 13Yik m sinsaŋŋa a ta ŋmapi. Kan te ŋa vari a nyini fi jigi ya. Nya ŋa zuk, dii nyiŋla ŋa ka nyuvuri.

14Kaa nye ase gaasa nyama ale a nye diila, be kan va baai ale a tom biem la suitaŋa. 15Poom kan poli ku wari ya. Kan cheŋ suik kula po. Cheem ŋaaŋ te abe fi a cheŋ fi niŋ nyiŋ. 16Diila biem nyam a dan kan tom ba biem tuimaŋa danni po, ba an baga a goa. Ba a dan kan nye ate a waai a nak naŋŋa ba a kan vuusi. 17Ba a dɛ ka gaasa ŋandiinta ale a nyu wɔkwɔk.

18Wayɔrisima nyɔnɔwa suiku a nye ase ka vari ale boro a veenti dii ate ku ga a nye jassi la. 19Alege gaasa nyɔnɔwa suiku a nye ase ka legi kpienni la. Ba zɛ dii ale nye ate ba a nak naŋsa la.

20M biiga wom m le a weeni diila. Chelsi a wom m wieŋa. 21Kan yeeri fi nina a nyini ŋa zuwa. Basi ate ŋa jɔ fi suinummu po, 22diila ŋa ta ka nyuvuri a te baai ale a nya ŋa la ale ŋman ta tebika a te ba nyiŋsa meena.

23Wie meena po, yik fi suinum, dii nyiŋla ku baga a paari dii meena ate fi a nye la kama. 24Pai nɔi po biik galiŋsa a dueni nakpiak, abe fi te ate nɔi po biik poosisa a yalima ale fu.

25Basi ate fi nina a nya niŋ yɔrr, kasim a nya dii ale doa fi niŋ la. 26Dueni suik kuui ale teenti la a magsi fi naŋsaŋa. Bo suik kuui ale nala la po. 27Kan cheŋ bɛ. Yik fidek a nyini biem va ka po.

Currently Selected:

Wamagsima 4: BWU

Highlight

Compare

Copy