Wamagsima 3

1M biiga kan baŋ mi ale sak fu diila. Pai m sinsaŋŋa a nyo fi suinum po. 2Fi dan nye dila, fi ale boro a paari bena nna yegayega, ate fi ale boro ale masim. 3Kan te wensie ale jiirim a basi fu. Pai ŋa a su ase ŋiri baŋ la ŋmarisiŋa a nyo fi suinummu po. 4Ate fi ale nya ŋmanteka Naawen ale nuruba jigi ate fi nya yuei maŋ.

5Ta sebchakka ale Naawen ale fi suinum meena, abe fi kan ta sebchakka ale fidek miŋka. 6Gisi wa yaalika dii meena ate fi a nye la po, ate wa dak fi suitaŋa a sak fu.

7Kan poli ayen fi seba kama, a chali Naawen, abe fi cheem ŋaaŋ a te biem. 8Kude ale te fi nyiŋka nyiŋyɔgsa abe ku te fi kobaŋa pagrim.

9Te Naawen zula ale fi nitalimu ale fi ŋankpaanta baai meena ate fi dɛ niŋ a che la. 10Ate wa ale sueri fi booŋa ale ŋan bie, abe da maŋ a sueri fi samɔnsaŋa a nyini.

11M nidoabili yaa, kan zɛri Naawen waalika yaase fi sui kaasi wa le a toariŋ fu la nyiŋŋa, 12ale Naawen a sak ka waai ate wa a yaali la, ase ko ale a sak biik kaai ate wa a yaali la.

13Suipeentik a bo ale ka waai ale a nya yam la ale waai ale a nya miŋka la jigi. 14Yam nyuenta a gaam kpana kama, ate bu tutunaŋa a gaam ligmɔniŋ. 15Yam a nye tuilum kama a gaam tintain mɔnuŋ, ate jabuui ate fi a yaali la a kan magsi chaab ale di. 16Yam a te fu ka nyuvuri woŋ a nyini bu juga nisaŋa po ale a te fu jigsika ale zula a nyini bu gala nisimaŋa po. 17Bu ale gani fu a ta va suipeentik suita, bu suitaŋa meena a magsi kama. 18Yam a chim ka nyuvuri tiib a te baai ale a gbaari bu la. Baai ale a yik bu giŋgiŋ la sue a peenti kama.

19Naawen a pai ka yam a nya tɛŋka, ka yam miŋ chakka nyiŋ ate wa nye wenŋmazukku. 20Wa yam wie miŋka nyiŋ, a basi kama ate nyiam a tɔŋ nyini buli limisitaŋa po a nyini, ale basi ate maglim a lo.

21M biiga, kan jɔk poyiila ale wie kpesi miŋka, gbaari seeri ŋa, 22diila ŋa ale te fi chiika pagrim. Ate ŋa ale nye ase ka sotta a bo fi ŋinni po. 23Ŋa a ta fu ka nalimnyiini fi suiku po ate fi kan nak naŋŋa. 24Fi baga a cheŋ goom kama alege ate yɔgsum a ka fu. Fi ale duak kama a goa nalimnyiini. 25Kan chali yɔgsummoa ase kaasuŋ ale biem ale cheena nuru baata zuwa. 26Ale ka Naawen ate fi le ta sebchakka ale wa ate ba a kan baga a bari yik fu.

27Kan peri nalim a nyini baai ale magsi bu la, ase fi nin ta a maari ba. 28Fi dan baga a maari fi sɔmoa yɔgyɔgla, kan weeni wa ayen, <<Cheŋ abe chum fi jam ate m maari fu.>>

29Kan poli ayen fi nye fi vaanchoa biemmoa, diila baai ale kali moata la a ta mariŋka ale fu kama. 30Kan nye kpaliŋ kosiga, alege ate waai an poom a nye fu wariya.

31Kan dɛ nyuri ale wɔkwɔk nyɔnɔ, yaase fi tomsi wa suitaŋa. 32Naawen a kisi nuru waai ale a tom biem tuima la kama, alege wa ta sebchakka ale waai ale a nye wamaŋsa la kama.

33Naawen kikaasaŋa a bo gaasa nyɔnɔ yenni zuk, alege wa a niak wayɔrisima nyɔnɔ yenni kama. 34Naawen a la baai ale nye nuruba a la la kama, alege wa ta ŋmantiik a te baai ale ta badek a siŋ tɛŋ la kama. 35Zula a chim ka yam nyɔnɔ nitalim, alege betta ale nya ka chivie.

Currently Selected:

Wamagsima 3: BWU

Highlight

Compare

Copy