Wamagsima 5

1M biiga, wom m yammu. Chelsi wom m yam sinsaŋŋa. 2Ate fi ale seba fidek taka. Abe fi nɔnni ale sum sak dii ate fi zamsi la. 3Nipok kaasuŋ nɔngban po wie a masa ase ka siita la, ate wa nɔnni a saala a gaam kpaam. 4Alege ku nuerika po wa a toa ase ka choŋ la, ate wa ta nɔi ase gebik noa ŋaye la. 5Nipowa de choa ale ta fu a cheŋ ka baai ale kpi la jigi, ate wa laari tabika a ta wa a cheŋ vɔrumu po. 6Wa niŋ ka nyuvuri suiku po. Wa cheŋ tuiri kama alege wa zɛ.

7Dila nyiŋ, yɔgyɔgla de, wom mu. Kan zɛri m le za m weeni diila. 8Yalima ale wa. Kan cheŋ moata wa yenni tuoku. 9Fi dan nye dila, fi le jɔk fi zula, ate nuru baai ale kan ta jiirim la ale nye ate fi jɔk ŋan baai meena ate fi ta la. 10Nicham ale dɛ fi ŋanta meena, ate nuru yoŋ ale de masim a nyini fi ŋan baai meena ate fi tom a nya la. 11Fi nyuvunni nuerika po ate fi ale ŋuuni nyiŋdomma ŋuunika, ate nyiŋtuila a dɛ fi nyiŋka. 12Ate fi ale weeni ayen, <<Mi ale jam kisi tuiri darika diila. Ka mi a nin kan jam yaali m dek suikwa. 13Ka boa ale soa ate mi an wom m sagrɔma? 14M jueli paari ka kaasuŋ zuk, ate yɔgyɔgla de ku magsi kama ayen m tu peelim chivie.>>

15Bobi fidek powa nyiini a goa ase fi ale a nyu nyiam a nyini fidek liik po diila. 16Ku a magsi fi powa a nyini a yaali nidoaba? Ku a magsi nidoa yoŋta a bobi fi nipowa a goa? 17Ku a magsi ka fidek nyiini ale bobi nipok waai a goa la fi ta wa, wa kan chim nipok waai ate nuru yoŋta a maa goa ale wa nya la. 18Naawen abe niak fi powa ate fi faari wa la, abe fi a dɛ masim ale fi powa ate fi ta wa a nyini wa paalimu po la. 19Wa nala kama ate nuruba nina a doa wa zuk ase kab la. Fi baga a nya kama ate fi chiik a jɔ wa nna yegayega. 20M biiga, ka boa ale soa ate ba pai nipok kaasuŋ a yik fu, yaase fi a yik nipok yoŋ biisa? 21Naawen a nya juijui meena ate fi a cheŋ la kama, wa be le maasi fi zuk juijui meena ate fi le boro la. 22Nuru biok wabaata dek ale a yik wa. Ŋa ka miisa a yik wa a tara. 23Wa ale kpi wa le kan baga wadek a yik la nyiŋ. Wa bettaŋa nyiŋ wa ale cheŋ bɛ.

Currently Selected:

Wamagsima 5: BWU

Highlight

Compare

Copy