Wamagsima 29

1Nuru waai ale kaa wom sinsaga la ale deri kpi kama wa tukpanni nyiŋ ale kan nyini du a nyini. 2Wen nuruma a dan bo pagrim po, nuruma a de ka masim. Alege gaasa nyama a dan bo pagrim po nuruma a kum kama. 3Waai ale a yaali yam la a nye ate ka wa ko sui a peenti, alege waai ale a yaali nipooba la, a nueri ka wa nitalim. 4Naab waai ale chekki la a yik wa tɛŋka a zaani kama, alege waai ale te ate ba pai ŋanta a da wa la a lɔnsi ka kama. 5Baai ale ta nɔi masim la a bari ka nuruba.

6Wabaata nyam bari yik nuru baata kama, alege ku kan yik wayɔrisima nyama ate ba nyiem yaa nye masim nuemka. 7Wayɔrisima nyɔnɔwa a seba dii ale magsi jajakka la kama, alege gaasa nyɔnɔwa niŋ a poom karo ayen wa miŋ wari ya. 8Baai ale a la nuruba la a nye kama ate tɛŋ a chɔgsi bolim, alege baai ale ta yam la a kpimsi ka suipuurum. 9Ase yam nyɔnɔ a dan ta nanpaga ale beruk, beruku a biisi a basi kama ale a la, ate chim nyeka a kan boro. 10Nuru koorisa a kisa nuru baai ale kan ta ŋmiŋmaasa la kama, alege waai ale za dekki la a yaali ayen wa maari kama.

11Beruk a sak wa suipuurum ka nna nwuli alege yam nyɔnɔ a yik wadek kama. 12Niŋdeerɔ a daa wom venta wie, wa ŋaaŋviirɔma meena a chim ka gaasa nyam. 13Ŋanjaksaŋa ale ba namsidɔma meena ka Naawen ale basi ate ba a nya. 14Naab waai ale a bo ŋanjaksa wensie buusa bo ka la, wa naam zukpaglika ale boro taam wuu. 15Biik waalika a te wa ka yam, alege biik kaai ate ba a basi wa la a ta ka chivie a jam a te wa ma.

16Ase gaasa nyam a dan bo pagrim po, biem a piisi kama. Alege Wen nuruma ale boro a nya ba lueta. 17Te fi biika waalika, ate wa ale basi ate fi vuusi. Wa ale te ate fi chiika a dɛ masim. 18Juijui ate Naawen wanni a ka la, nuruma a nye a kaasi kama, alege waai ale ta sinsaŋŋa la ale nya niauŋ. 19Biik nyiini a kan tagri tomteerɔ, wa dan poom miŋ fi ale a weeni diila, wa kan nye. 20Beruk a ta yiila a gaam a waai ale a biisi ale kan poli la kama.

21Fi daa poagi fi tomteerɔ wa ale yiri a zɛri fi nɔi. 22Waai sui ale kpabi a puuri la, a kpabi a nye ka kpaliŋ ale a nye wie ŋaai ale bie la. 23Nuru kanjanta a ta wa siŋ ka tɛŋ alege nuru waai ale a yik wadek chiik la a te ka zula. 24Fi dan maari zue, fi a nye ka fidek. Ba ale namsi fu ase fi ale weeni kaasuŋ kuui ale nye la, alege kikaasa ale bo fi zuk ase fi a nin kan weeni ya.#29:24 Kaabka 5:1; Niŋdeerɔba 17:2 25Nurubiik yɔgsum chala ka baruk barika, alege waai ale ta sebchakka ale Naawen la a nya boka dek jigi kama.

26Nuruba yegayega a zak a nya ka kpaga, alege nuru a nya wensie boteka a nyini ka Naawen jigi. 27Wayɔrisima nyɔnɔ a kisi gaasa nyɔnɔwa kama, ate gaasa nyɔnɔwa mɛ a kisa wayɔrisima nyɔnɔwa.

Currently Selected:

Wamagsima 29: BWU

Highlight

Compare

Copy