Wamagsima 28

1Gaasa nyɔnɔwa a chali kama alege ate waai an poom a vi wa, alege wayɔrisima nyɔnɔwa suinummu a pagra kama nna se gbeŋli la. 2Tɛŋ nuruba nyeela a dan kan nala, niŋdeerɔma a jɔk ba naamu kama. Alege yam ale sebika niŋdeerɔba a ta ka zaana nalimnyiini. 3Nuru jak waai ale a namsi jajak la, a nye ase ka ŋmoruk ale ni kaasi ŋankpaanta diila. 4Baai ale a zɛri sinsaŋŋa la, a pakka gaasa nyam, alege baai ale ta sinsaŋŋa la a kpaliŋ ale ka gaasa nyama. 5Nuru baata a kan miŋ wensie kiri ya, alege baai ale a gisi Naawen la a miŋ ku kiri ka nalimnyiini.

6Jajak a dan a cheŋ wa wensie suik po, ku gaam jigsirɔ ale va venta suik po. 7Nuru paalisa baai ale a nye tuewomma a te sinsaŋŋa la, ka yam nyam. Baai ale a va doa baai ale waara la a ta ka chivie a jam ba nyam zuk. 8Waai ale a gebi ligra a nya nyuenta la ale jɔk ŋa. Ku kpeglim ka ŋa le jo ka waai ale ta jiirim ale ŋanjaksa la nisima po. 9Waai ale lik turi a kan wom sinsaŋŋa la, kula nyɔnɔ puusa ka leeta a te Naawen. 10Baai ale a paasi nuru maŋsa a ta ba a jo biem po la ale lɔ ka badek baruk po, alege baai ale za dekki la ale nya ŋan maŋsa.

11Jigsirɔ ale poli ayen wa ta yam ka wadek nina po, alege waai ale jaŋ ale ta miŋ chakka la a seba dii ale nala la kama. 12Ase Wen nuruma a dan nya nyeboka, waai meena sue a peenti kama. Alege gaasa nyam a dan nya pagrim nuruba ale jo ŋooma vie. 13Nuru baai ale a lik ba wabaata la a kan nya ba dega, alege ba dan weeni ale basi ŋa ba ale nya jiirim. 14Niauŋ a bo ale waai ale a chali Naawen diipo meena la jigi, alege waai ale ta tukpari la ale jo ninam po. 15Niŋdeerɔ biok a nye ase ka gbeŋli yaase gɔi biak ale waara diila nuru waai ale jaŋ la jigi.

16Niŋdeerɔ waai ale kan ta miŋka la a namsi ka wa nuruba, alege waai ale kaa yaali venta ŋanta la daaŋa ale wɔŋa. 17Nuru koorik popola a ta wa a daani ka dila a ga a paari wa kum. Kan nya wa zuwa. 18Waai ale a cheŋ wensie suik la ale nya varibasika, alege waai ale kan va wensie po la ale deri lɔ tɛŋ. 19Tuimtomdɔ waai ale ta nyiŋbiiri a kpa la a ta ŋandiinta ka nna yegayega, alege nuru waai ale a va wie kayaata la ale kpeglim ale ka jaŋsa. 20Wensie nuru ale nya niauŋ yegayega, alege nuru waai ale a yaali ayen wa kpabi a jigsi la ale ga jo ka daanika po.

21Fi daa sak lukka ku an nala, alege dɛka nyiŋ nuru a bag nye a kaasi kama. 22Nuru baai ale a yaali de gaamka la a yaali kama ayen ba kpabi a jigsi, alege zɛ ayen ba a cheŋ tuak ka jaŋsa po. 23Waai a dan toariŋ nuru ku ŋaaŋnyiŋ wa le nya pimpauk a gaam waai ale a paasi la. 24Waai ale a zu wa ko ale wa ma alege a weeni ayen, <<Kaasuŋ boa ale bo nya kude po?>> Wa ale nuru koorik ka bunyi. 25De gaamka nyɔnɔ a siti ka kpaliŋ, alege waai ale ta sebchakka ale Naawen la ale nya wadek kama.

26A waai ale ta sebchakka ale wadek popola la ka beruk, alege waai ale a cheŋ yam po la a nya varibasika kama. 27Nuru waai ale a te ŋanjaksa ŋanta la, a kan silim jaaboa, alege waai ale kan cheem a nya ba la ale nya kikaasa yegayega. 28Gaasa nyam a dan bo pagrim po, nuruba a suk kama. Ba dan ta chaab ale kaasuŋ Wen nuruma a piisi kama.

Currently Selected:

Wamagsima 28: BWU

Highlight

Compare

Copy