Wamagsima 30

1Jakey biika Agur wieŋa ale nna. M Wen yaa m jiak kama. M dek Wen yaa, m sum a jiak kama ate pagrim a ka m po.

2M ka beruk, ate m ka m dek yam mɛ. 3Mi an zamsi yam yaase m seba Waai Ale Welema la wari ya. 4Ka wana ale jueli wenŋmazuk ale siŋ ya? Ka wana ale baga a gum vioku a ta wa nisima po? Ka wana ale baga a kpamsi nyaataŋa a nyo wa garuk po? Ka wana ale nye tɛŋka kpeglimka meena? Wa yue ale boa, wa biika mɛ yue ale boa. Weeni a sak mu ase fi a nin seba.

5Naawen wari meena ka wensie. Wa chim ka ligrɔ a te baai ale a jam wa jigi ayen wa a nya ba zuk la. 6Kan yaali wari a gum wa wieŋa po, fi dan nye dila fi ka velimvendik, wa le toariŋ fu.

7M Naawen ya, mi a yaali ka wie ŋaye ayen fi nye a te mu. Basi ate m nya ŋa abe m ge a kpi. 8Dii ale a dɛ niŋ la ale maari mu ate m kan velim. Dii ale a saari buye la ale kan te m jaŋ yaase m jigsi. Te ate mi a nya a magsi ate m kan silimu. 9Dii nyiŋla m dan jigsi, m le zɛri fu abe m weeni ayen, <<Ka wana ale Naawen?>> Ate m dan jaŋ, da dii dai m le cheŋ ga zu ate ku ta leeta a jam Naawen yuei weleŋka jigi.

10Kan weeni tomteerɔ kaasuŋ a sak wa kpagi ya. Wa ale ka a te fu ate ku ale sum a va fu. 11Nuruba gela a ka a te ba koba kama ale kan nye ba maba jiamoa. 12Ba nye cheri ka badek nimbie po, alege ba daŋ kama ale an poom sugri ba dega. 13Ba a poli kama ayen ba ka nuru maŋsa, alege ba daa jaaboa. 14Ba nyinaŋa a nye ase ka gebik woŋsa ale gebi fiisa la, a nɛ ŋanjaksa tɛŋka zuk ale baai ale a silim a maa bo nuruba po la.

15Jumbaleok a ta ka noa ŋaye a dari ziim ale a kum a weeni ayen, <<Yegayega>> Ŋanta bata ale boro a kan maara a chagi. Aaya, banaansi ale boro a weeni ayen, <<Ku an magsi ya.>> 16Boosuku ale kirika ale tɛŋ kaai ale kaa jo nyiamoa ale bolim ŋiak. 17Numbiri dii ale a nye ko a la la ale a zɛri ma sinsaga la, tagaarutaŋa ale bo viaka po la ale yeeri bu ate duinsa a dɛ.

18Ŋanta bata ale cha mi. Aaya, ŋanta banaansi ate mi a kan miŋ ku kiri ya. 19Ku ale nye dii ate jiiruk nyiem bo chiŋmaaŋa po ale ku ale nye dii ate waab a bo pina po ale ku ale nye dii ate ŋaaruŋ a cheŋ nyakpiemu zuk ale ku ale nye dii ate nidoa a yaali nipok.

20Nipok kaboŋ nyeerik ale dɛ nidoa kama, a yaa duisi wa nɔnni ale weeni ayen, <<Kaasuŋ boa ale bo nya kude po?>>

21Wie ŋata ale basi ate tɛŋka a choa, aaya, ŋanaansi ale kan baga a zaani. 22Ase yɔma a nin chim naab, ate beruk puuk a sueri ale ŋandiinta, 23nipok waai nyeka ale toa la a nyiem yaa jam nya chorɔ a yali, ate dɔklie nyiem yaa jam tagri wa kpagni.

24Wie ŋanaansi ale fiisa a bo tɛŋzuk de alege a ta yam nna yegayega. 25Nankeriŋsa, si ka pagrimoa, alege si a dueni ŋandiinta fanɔi wen. 26Suensa, ka pagrimoa alege si a nye si yieŋa ka pina po. 27Tintue ŋa ka naaba alege ŋa a va ka chaab. 28Baŋsa, si yikka an toa, alege si bo nalima yie po.

29Ŋanta bata ale boro ate ŋa chelim a nala, aaya, ŋanta banaansi ale a nyiem. 30Gbeŋli ale ka duŋsaŋa naab la, ate di kan viriŋ ayen wari nyiŋla, 31ale kpadiak ale buduk ale naab waai ale de wa tugurik tɔŋdɔma niŋ la.

32Ase fi dan chim beruk ale ta kanjanta yaase fi nye biem, kan nak kuusidi dila nyiŋŋa, pai fi nisaŋa a lik fi nɔnni ale chivie. 33Ase ba ale a nak biisim ate bu a goa diila, ale a tak nyue ate ziim a nyini diila, ka dila ate fi dan nye ate nuruba sue a puuri wɔkwɔk a jam la.

Currently Selected:

Wamagsima 30: BWU

Highlight

Compare

Copy