Wamagsima 27

1Kan nak kuusidi chum nyiŋŋa, fi zɛ danni ale ta ka dii cheen la. 2Kan pak fi dega, basi ate nuru yoŋta a nye dila. 3Tana a dobra kama ate tanta a dobra gaam di ate beruk ale a daani diila a dobra a gaam ŋala meena. 4Suipuurum a bie kama ale ŋman a kaasi tuima alege nyuri a pagra a gaam ŋa kama. 5Fi dan toariŋ nuruwa nimbie po a zunchoŋŋa fi le suk a yaali wa.

6Fi doa a dan te fu tuem a zunchoŋŋa fi dachiak ale a gbaari fu.

7Fi dan dɛ chak siita mɛ an poom masa a te fu, alege kom a dan ta fu jabuui ale toa la a masa kama. 8Ase nuim ale a nyini bu tuk po a cheŋ diila, nidoa waai ale a basi wa yeri la mɛ ka dila. 9Kpaam ale ŋan baai nyum ale masa la a basi ate ka fi sui a peenti, doa masim a nyini ka wa sinsak maŋsa jigi. 10Kan baŋ fi doa yaase fi kowa doa wari ya. Ate diipo ate fi a silim la, fi kan bek mabiik ayen wa maari fu. Fi dan cheŋ waai ale moata fu la jigi a zunchoŋ fi le cheŋ fi mabiik waai ale yalima la jigi.

11M biiga, be ta yam, abe fi nye ate m sui a peenti. Ate m baga a tulisi baai ale kan biisi mu a magsi la. 12Waai ale ta yam la nyiem de ka niŋ a nya ayen daanika a cheena ate wa kpesi wadek. Alege beruk nyiem kala a basi du kama ate di jam a diiri wa ate wa yaa ŋma wadek. 13Waai a dan chim beruk ayen wa zaani ate nichaanɔ a tuesi pami jaab, wa magsi wa pai ka wadek nitalim a zaani a magsi pamini tuesika. 14Fi dan tue na puusi waai ale moata fu la saluik yokyokwa, ku a nye ase ka kikaasa la. 15Nipok kpaliŋ kpaliŋdɔ nyeka a puuri ka sui ase ŋmoruk kuui ale kasim a minisi a kan vɔssi la. 16Fi dan ayen fi nye ate wa basi wa funfɔblaŋa, ku a nye ase ka waai ale a yaali ayen wa nye ate vioku a basi la, yaase waai ale a yaali wa yik jaab alege ate kpaam a bo wa nisa po la.

17Ase ba le pai kuta a saasi chaab diila, nuruba mɛ a maari chaab ka dila. 18Ase tuimtomdɔ waai ale a nya tiib zuk a baga a dɛ bu yɔna diila, dila mɛ ate tuimtomdɔ waai ale a nye wa kpagi ale a yaali diila ale nya wa tutuna. 19Ase nuru ale a nya wa nimbidiaka nyiam po diila, dila mɛ ate wa suinummu a dak wa a sak.

20Ase Kum ale Kaasuŋ ale kaa chak diila, dila mɛ ate nuru a kan chak ale ŋanta. 21Bolim ate ba pai chamsi kpana ale ligmɔniŋ a nya, alege ba chamsi nuru a nya ale ka pimpauk. 22Fi dan poom a nak beruk ase ba ale a kuri zaa diila, wa kan basi wa bettaŋa.

23Seba fi piisaŋa ale ka diila a chak, abe fi te ate fi suinum a bo fi niiŋa zuk nyaasim. 24Diila jigsika a kan boro taam wuu, ate naam zutɔk a kan boro a ga paari gaŋ kaai ale pai a saŋ la. 25Ate ba dan ŋari wuuta, ate ŋan bulaŋa ate ba bori laŋsaŋa bo la a nyini, ate ba tigsi guuta wuutaŋa a ta jo dueni, 26ni piisaŋa ale te kɔbta a magsi gatta, ate ni booŋa ale tuni laŋsaŋa nyiŋ. 27Ate ni ale nya booŋa biisim yega ate ku paari ni ale ni dɔkdem ale ni tomteerɔma nipokbilisaŋa.

Currently Selected:

Wamagsima 27: BWU

Highlight

Compare

Copy