Wamagsima 23

1Fi dan boro a dɛ ale niŋdeerɔ, kpesi nya ba ale pai jabuui a zaani fi niŋ la. 2Fi dan ka waai ale baga a dɛ, pai gebik a tiik fi tutɔk. 3Kan basi ate fi popola meena a bo ŋandiin maŋsaŋa jigi ya, da dii dai wa a yaali wa nye fu nya kama.

4Kan jiak fidek ayen jigsika nyiŋŋa. Miŋ yam ate fi seba diipo ale magsi ayen fi pai a basi la. 5Jigsika a muriŋ a bɛ ka nna yilibi ase nina kamsika la. Diila ku ale tom ka kinkaŋŋa a yaa yiti jueli wen ase jiiruk la.

6Kan dɛ ŋandiinta ale butuem nyama. Kan te fi kɔrisa a bo ale ba ŋantaŋa. 7Butuem nyam nyiem kasim a poli ka ŋandiinta nyaka wari ale toa diila ate ku a daani ba. Ba le weeni fu ayen a dɛ abe fi a nyu alege ba suinummu po ku daa dila. 8Fi ale chiiri mag kaai ate fi dɛ la a basi ate fi jiirim wieŋa a kan ta kiri.

9Kan biisi wari a basi beruk tue po dii nyiŋla, wa ale yuk fi yam wieŋa a basi.

10Kan zu niwoba yaase kpiŋsa tɛŋsa a yeeri ba kokpieŋsaŋa banaŋa. 11Dii nyiŋla ba Da Tuesirɔwa a pagra kama, wadek ale za wa zaani a biisi a te ba.

12Pai fidek a te sinsaga abe fi chiib a wom yam wie.

13Kan basi fi bisaŋa waalika. Fi dan te ba waalika, ba kan kpi. 14Fi dan pai fiŋ a miiri ba, fi ale vari ba chiisaŋa a nyini kum po.#23:14 Teerika 21:18-21

15M biiga, yam a dan bo fi suinum po, mi mɛ suinummu ale nya masim. 16Fi dan weeni dii ale nala la, jaab meena ale bo mi po la ale dɛ masim.

17Kaa dɛ nyuri ale wabanyeerisa, alege kasim a chali Naawen. 18Fi ale nya tutuna nyakude nyiŋ. Fi yiilaŋa a kan chim kinla.

19Wom de m biiga, ate fi ta yam, ate fi suinummu a va suiku. 20Kan bo ale danyuirisa yaase baai ale baga a dɛ la, 21diila ba bo ka ba suik po a cheŋ jaŋsa po, ate goom yegayega ale chim garuchaasa a lik ba.

22A wom fi kowa waai ale te fu nyuvuri la, abe fi kan zɛri fi mawa ase wa nin jam kpaŋmu. 23Tuesi wensie abe fi kan pai ŋa a da. Be ŋman tuesi yam ale waalika ale wensie buusa boka. 24Ko waai bisa ale bo wayɔrisima po la, ku ka masim a te wa. Ku ka masim ase fi nin ta bisa ate ba ta yam. 25Te fi kowa ale fi mawa masim. Te waai ale biak fu la sui a peenti.

26M biiga te mu fi suinummu, abe fi basi ate fi ninaŋa a kpesi nya m suitaŋa. 27Nipok waai ale pai wadek a te nidoaba a tuesi ŋanta la ka baruk pagrik. Nipok kaboŋ a nye ase ka vili miglik ate nuru a lɔ di po la. 28Wa suk kama ale a limisi ase zue la, a yaali ayen wa nye ate nidoaba yegayega a kan chim wensie nuruba.

29Ka wana ale ta nyiŋdomma? Ka wana ale ta suipuurummoa? Ka wana ale kasim a fɔbili? Ka wana ale ta mula alege zɛ ku kiri ya? Ka wana nimbie ale muni ya? 30Ka baai ale a kali daam zuk a beni la. Baai ale a lam da paalisa a nya la. 31Kaa nya daamoa, a nya bu ale muni dii ya, bu ale a tɔŋ chiima beerika po dii ya, bu ale nyu a siŋ dii ya. 32Ku nueri ka po, bu a dom ase ka waab biok la. Bu be ŋman a dom ase ka waab piik la. 33Fi ale nya ŋanchaŋsa ate fi ale weeni yesiŋsa wie. 34Fi ale nye ase waai ale doa nyakpiemu suŋsuŋ, ate fi kpari maŋ diok woŋ ate ba pai ti zaani ŋaaruŋ zuk diila. 35Ate fi ale weeni ayen, <<Ba nak mu kama, alege ku an jo m nyiŋŋa. Mi a poom zɛ diipo ate ba nak mi la. Mi ale yiti ka dimpo ate m ŋman gisi daam bu choa?>>

Currently Selected:

Wamagsima 23: BWU

Highlight

Compare

Copy