Wamagsima 24

1Kan dɛ nyuri ale nuru baata yaase fi poom yaali ayen fi bo ale ba. 2Diila ba a zɔk ka wɔkwɔk ba suiniimaŋa po, ate ba wieŋa a siti kpaliŋ.

3Yam ate ba pai a sɛ yeri ale a ta pagrim a nyini yam maŋ po. 4A nyini yam wie miŋka ate bu diinaŋa a sueri le jigsika ale ŋan baai ale ta dobrim.

5Yam nyama a zuak a gaam pagrɔba, ate baai ale ta yam wie miŋka la ale kasim a chim ale pagrim. 6Dila nyiŋ kan cheŋ kpaliŋ alege ate ba an sak fu dii ate fi ale nye la. Nakdeka a nyini ka sagrɔba jigi.

7Yam a ka kiri a te betta. A bo niŋdeerɔba tɛŋka nansuiŋku nɔi ba ka wari a weeni.

8Nuru waai ale a poli biem la ba ale nya wa ase ka waai ale a ta daanika a jam la. 9Beruk popola ka biem. Waai meena a kisi waai ale nye nuruba a la la kama.

10Ase ku dan jam miri fu, fi pagrimu an soa dii ya.

11Baai ate ba an va wensie a bo mini ba ayen ba ko ba la vari ba a basi, vari ba a basi ase ba le tuak kum jigi la. 12Kan yaali wari a weeni ayen, <<Nya tama jam zɛ.>> Diila Naawen a miŋ suiniima meena kiri kama, wa abe a nya fu kama. Waai ale a nya fi chiika zuk la a seba ayen fi seba kama. Wa le tuni nuru meena a magsi wa nyeka ale ka diila kama.

13M biiga, a dɛ siita ale ku nala kama, ate samparimaŋa lamka a masa. 14Suik kula dek mɛ po, yam a nala kama a te fi chiika. Fi dan nya bu, fi chumwa ale jam a nala. Ate fi le goa a yiili diila ale sum a nye.

15Kan gu doa nuru maŋ yeri po ayen fi nye wa biem, be kan ga yik nuru maŋka wa yenni po. 16Nuru maŋsa ale sati lɔ naŋtuok nɔi buyopɔi, alege ba ale ŋman yiti. Alege kaasuŋ bunyi nyiini ale te ate gaasa nyam a muriŋ bɛ.

17Kaa dɛ masim ase fi dachaasa nin lɔ. Kan te fi sui a peenti ase ba nin nak naŋŋa. 18Diila Naawen sui a kan peenti ale fu, ate wa ale yeeri wa suipuurumu a nyini ba zuk. 19Kan te wabanyeerisa wie a daani fu. Kaa dɛ nyuri ale gaasa nyama. 20Diila nuru baata a ka chum. Gaasa nyama bolimu ale kpi.

21M biiga, a chali Naawen ale Naawa. Kan pai fidek a gum tukpari nyam po, 22diila kaasuŋ ale kpabi a jam ba zuk. Ka wana ale seba namsi kaai choa ale nyini Naawen ale Naawa jigi a cheen ba zuk la?

23Yam wie gela ale nna ŋmana: Ku an nala ase fi nin boro a bo buusa ate fi luk a sak jiirim ale baai ate fi a yaali la. 24Boteerɔ waai ale a weeni gaasa nyɔnɔwa ayen, <<Fi zɛ wari nɔi po la,>> nuruba yegayega ale ka kikaasa a te wa, ate tɛŋ kpieŋsa ale biisi zɛri wa. 25Alege ku ale cheŋ nalimnyiini a te baai ale basi ate waai ale nye kaasi la a siak wa kaasuŋku la kama. Niaka ale bo ba zuk.

26Wensie tulisika a nye ase ka doaba ale a gbaari chaab diila.

27Nye fi zɔŋŋa abe fi gomsi fi tɛŋka abe fi ge piilim fi yenni sɛka. 28Kan biisi kaasi fi vaanchaab alege ate ba an nye fu wari ya. Kan velim a te ba. 29Be kan weeni ayen, <<Yɔgyɔgla de m le tuni ba dii ate ba pai nye mu la! M le yik ba.

30Mi va ka nyiŋworuk nyɔnɔ laŋ po a taam, nuru waai ale kan ta wadek yam a bo wa kaduk po la. 31Mi jam nya ka muŋsa ale chim ka po, ate wuuta a lik ka, ate ka parisaŋa a lɔ. 32Ate mi ale nya ale poli ka wari la, mi yaa zamsi wanni de: 33Goom nna maga ale goajɔgsika nna maga ale nisa gurumka nna maga ayen fi vuusi, 34ate jaŋsa ale jam fi zuk ase zueba la. Silimka ale jam fi zuk ase varidɔba la.

Currently Selected:

Wamagsima 24: BWU

Highlight

Compare

Copy