Wamagsima 22

1Yuei maŋ luerika a gaam jigsika. Fi yuei dan yiti a gaam kpana ale ligmɔniŋ. 2Jigsirɔma ale ŋanjaksaŋa meena, ka Naawen ale nye ba. 3Yam nyɔnɔ a nya dii ale ta kum cheen la kama a suk wadek, alege beruk a gaa jo du kama a nam. 4Zaab m dek ale Naawen yɔgsum chalika, tutuna ale jigsika ale zula ale nyuvuri. 5Muŋsa ale batta ale bo baai ale za venta suita po la. Waai ale a yik wa chiik la ale yeeri wadek a nyini ŋa po.

6Dak suik maŋka a sak fi bisaŋa ate ba dan jam pak, ba kan pai ku a basi. 7Ase jigsirɔ ale a nya jajak zuk diila, dila mɛ ate peemdɔwa a chim yɔma a te peemteerɔwa. 8Baai ale a bori venta la a che ka kaasuŋ, ate ba wɔkwɔkka ale jam kpeglimka. 9Nuru waai ale a te la ale nya niaka, dii nyiŋla wa a te ŋanjaksaŋa ka ŋandiinta. 10Yiak waai ale a la nuruba la ate wa cheŋ, ate kpaliŋ a maa va cheŋ. Kpaliŋsa ale leeta ale muriŋ bɛ.

11Waai suinum ale peela la, ate yaalika a bo wa biisa po la, ale ta ka naab ase wa doa la. 12Naawen a nya wensie nyama zuk kama, alege wa a yiak venta nyama a basi. 13Nyiŋ wɔrukku nyɔnɔwa a weeni kama ayen, <<M dan nyini peelim, m le zik gbeŋli suiku po ate di ko mu.>> 14Nipok kaasuŋ nɔi ka baruk pagrik. Baai ate Naawen sui a puuri ale ba la a lɔ ka ku po. 15Biik suinum po a sueri ale ka betta, alege ka turi darika ale a yeeri dila a nyini wa po.

16Nuru waai ale a namsi ŋanjaksa ayen wa jigsi yaase wa a te jigsirɔba tiirita la ale kpeglim ale jaŋsa.

17Lak fi tunni a wom yam nyam wieŋa, abe fi basi ate fi suinummu a ta m miŋka. 18Diila ŋa nala ayen fi ta wieŋa de fi suinum po, abe ŋa kasim bo fi nɔi po. 19Jinla danni de po, mi nye kama ate fi a miŋ yam nyama kiri, ate fi ale ta mariŋka ale Naawen. 20M ŋmarisi ka yam wie pisita a te fu, ate sinsaga ale yam wie miŋka a bo ŋa po. 21Suiku de po, fi ale miŋ wensie ate baai ale tom fu la, fi ale ga weeni ba fi ale nya diila.

22Kan vari jajak ŋanta ayen wa jaŋ nyiŋŋa, yaase fi vari waai ale a silim a jam bo buusa dɔkku po la. 23Naawen ale tuesi ba biisaŋa a biisi a te ba, abe wa kɔni waai ale kɔni ba la.

24Kan dɛ doata ale suipuurum nuruba yaase fi a nye wari ale nuru baai sue ale kpabi a puuri la, 25dan kan daa di fi ale zamsi wa suitaŋa a ta fidek a ga jo baruk po.

26Kan siagi ayen fi zaani ate a waai a pai fi nyiŋ a de pami ya, yaase wa dan kan baga a tuni fi ga a tuni a te wa. 27Fi kan jam baga a tuni, ba ale poom a pai fi gaduokku a nyini fi jigi.

28Ni kan yeeri banaŋa ate ni kokpieŋsaŋa a dueni la ate ni baga a zu ni vaanchaama nitalimu.

29Fi nya nuru baai ale seba tuima la a nya ya? Ba ale tom a te ka nalima alege daa nuruba kinla.

Currently Selected:

Wamagsima 22: BWU

Highlight

Compare

Copy