Wamagsima 21

1Naab suinum ka buboalik nyiam Naawen nisa po, wa te bu a va ka juijui ate wa a yaali la. 2Nurubiik suita po wie meena a nala ka wadek nina po, alege ka Naawen ale a kpesi suiniima meena a nya. 3Ate fi tom wayɔrisima ale wensie tuima la a nala a te Naawen a gaam kaab te ka kama. 4Kayeruk ale kanjanta ale biem nyeela meena ka wabaata. 5Popola maŋsa ale nyiŋbiiri ale ta a cheŋ jigsika po, alege yientika a ta fu tuak ka jaŋsa po.

6Fi dan velim a jigsi, ŋantaŋa a muriŋ a bɛ kama a nyini fi jigi ase pik la ale ŋman a chim kum baruk. 7Gaasa nyama dek wɔkwɔk ale vaari ba ta cheŋ, dii nyiŋla ba zɛri kama ayen ba kan nye dii ale ta wensie la. 8Nye kaasirɔwa a va ka suik goantika, alege waai ale kan seba wari nɔi po la a va ka suik kuui ale yoarisi la. 9Fi gboŋ gugoruk po a zunchoŋŋa ase fi nin bo yeri po ate nipok kpaliŋ kpaliŋdɔ a boro. 10Nuru baata a yaali ka biem, ba vaanchaab a kan nya jiirim a nyini ba jigi ya.

11Ase ba dan dari waai ale koosi nuruba a la la turi, a jɔk po yiila nyama ale ta yam. Fi dan sak yam nyam ba ale ŋmasi a ta yam. 12Wayɔrisima Nyɔnɔwa a kpesi gaasa nyɔnɔwa yenni kama. Wa ale dari gaasa nyɔnɔwa a lɔnsi tɛŋ ate wa kaasi. 13Waai ale kaa lak tue a wom ŋanjaksa kumsa la, wa mɛ ale kum a yaali maarika alege waai a kan wom wa. 14Susugi tiirim a yɔk ka suipuurum, fi deri suk te waai jaab dila a kpimsi ka suipuurum yegayega. 15Chekki tuima ka masim a te wayɔrisima nyɔnɔ, alege ku chim daanika a te biem nyam.

16Nuru waai ale kaa miŋ wie kiri la ale nya wadek ale ka kpilima. 17Baai ale a yaali masim la jaŋsa ale yik ba. Baai ale a yaali daam ale masim ŋanta la a kan jigsi. 18Ba a namsi gaasa nyam a tagri ka wayɔrisima nyam ale a namsi bumbobrɔba a tagri baai ale chim wensie nyam la. 19Fi dan bo gɔi po fidek fi nyiini a zunchoŋ fi ale bo ale nipok waai ale a yaali kpaliŋsa ale funfɔbla. 20Yam nyama a ta ka ŋanta ale masim, alege betta a dɛ ka jaab meena ate ba a nya la.

21Waai ale a gisi wayɔrisima ale yaali maŋ la ale nya ka nyuvuri ale wayɔrisima ale zula. 22Yam nyɔnɔwa a nya nakdeka pagrɔwa tɛŋka zuk kama ale a lɔnsi ba yie pagraŋa ate ba ta mariŋka ale ŋa la. 23Waai ale a yik wa nɔnni ale wa giŋgeluŋku la, a yeeri ka wadek a nyini daanika po. 24Koosi laarɔba ka kanjanta ale nyanueriŋ nyam, jaab karo a kasi ba ate ba kan kuulim. 25Nyiŋworuk nyam ale a yaali diila ale a ko ba, diila ba kan siagi ayen ba pai nisa a tom tuini.

26Nuruba gela a ta ka butuem a yaali yega ayen ba gum ba ale ta diila po, alege baai ale ka Naawen nuruba a yaali ka teka. 27Nuru biok kaabka ka kisuk, be poom ka wa nin ta popola baata a nye kaabka. 28Venta seerɔ ba le gebi wa a basi, alege wensie seerɔ ba le te wa suik ate wa biisi. 29Gaasa nyam a sak ka badek ale ba tuima, alege waai ale za dekki la a poli kama ale a tom wa tuima. 30Nurubiik yam ale sebika ale zɔga an baga a nye Naawen wari ya.

31Wusummu a gomsi magsi kpaliŋka kama, alege nak dɛka bo ka Naawen jigi.

Currently Selected:

Wamagsima 21: BWU

Highlight

Compare

Copy