Wamagsima 18
18
1Nuru baai ale kaa yaali nuruba maŋka la, niŋ a bo ale ka badek nyiini wie. Waai a dan poom seba wari ate ku nala ba kan siagi.
2Wari miŋka a ka kiri a te beruwa alege wa a sak ka wa popola ale ka diila.
3Fi nye jaab a bɛ la, a ta ka chivie a jam, ate nye buloarik a te fu valiŋsa.
4Nuru nɔi po wie a baga chim nyuvuri nyiam kama. Wie ŋaai ale ka wensie ate yam a boro la a te nyiŋ pagra ase ka beli naŋ nyiam ale chali a taam diila.
5Ku an nala ayen fi maari waai ale nye kaasi la, yaase fi bo mini waai ale kan seba wari nɔi po la.
6Betta nɔi po wie a kasim ta ba a jo ka kpaliŋ po, ba a bek a yaali ka nakka.
7Beruk nɔi po biik a kaasi wa kama, ate wadek nɔi po wie a chim baruk a yik wa.
8Ŋaaŋzum nyɔnɔ wie a nye ase ka ŋandiin masa ale a siŋ a waai suinum po diila.
9Nyiŋworuk nyɔnɔ a bie ase ka waai ale a kaasi tuima la.
10Naawen yuenni ka yie pagrik, ate wayɔrisima nyam a chali a nya sukka di po.
11Nuru baai ale jigsi la a poli ayen ba jigsika a lik ba kama ase parik woŋ ale gilim tɛŋ diila.
12Ate kaasuŋ a jam nuru zuk la ka kanjanta ale bo wa suinum po, alege zaab m dek ale ta zula a jam.
13Ka boan chivie, ka boan koansa, ate fi tulisi alege a bek ayen fi miŋ wanni kiri ya.
14Nuru chiik ale yik wa a tara nyiŋtuila po alege chiik kaai sui ale kaasi la ka wana ale baga a pigi?
15Yam nuru baai ale seba la a yaali ka zamsika, ba lak ka tue a yaali wie miŋka.
16Fi daa te tiirita ti a lak ka suik a te fu ate fi baga a paari nuru kpienta.
17Waai ale dɛ niŋ a biisi buusa dɔk po la, a nye nna se wa ta wensie kama la, ka fi nin wom a nyini nwala mɛ jigi.
18Gbaŋ nakka a ta ka nanpaga nakka a jam nuerika. Kula ale a gaari nuruba baye kpaliŋ.
19Doa waai ate fi nye kaasi wa la, ku toa kama ate fi nye wa a magsi. Nanpaga a poori ka nuruba ase tuok ate ba pai kuta a lik diila.
20Yam wie a te ka chakta ase ŋandiin maŋsa la. Wie maŋsa a ta ka chakta a jam.
21Nɔi biik a ta ka kum yaase nyuvuri a jam. Baai ale a yaali biik la a che ka ninam.
22Waai ale a nya nipok la, a nya ka ja maŋ ale ŋman nya ŋmantiik a nyini Naawen jigi.
23Jajakka a saalim a yaali ka jiirim. Jigsirɔwa a tulisi ale ka leeta.
24Doaba gela a boro kama a kaasi chaab, alege doa maŋ a gaam ma biik suata kama.
Currently Selected:
Wamagsima 18: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
