Wamagsima 17
17
1Fi dan de ŋandiin kosa ale ta suiyɔgni a zunchoŋŋa, kauk kuui ate ŋandiinta a sueri du alege kpaliŋsa a boro la kama.
2Tomteerɔ waai ale ta yam la ale nya wa kpagni bi kaai ale a nyo wa chivie po la zuk, abe wa maa nya wa bisaŋa nitalimu charuku.
3Ba pai ka bolim a chamsi ligmɔniŋ ale kpana a nya, alege ka Naawen ale a chamsi suiniima meena a nya.
4Tuim kaasirɔba a chiib a wom ka bumbobrum biik. Velimvendisa a wom biik sii ale a kaasi nuruba yue.
5Baai ale a nye ŋanjaksa a la la a lɛ ka ba nyeerɔwa. Waai ale a dɛ masim a waai zuk biok nyiŋla ale tu chaab ale ninam.
6Ŋaaŋbisa ka ŋan kpagsa zula ase bisa zula ale ka ba nyam la.
7Wamaŋsa biik a kan magsi beruk wa, venta biik a kan magsi kpagi ya.
8Nuru daka ka tinaŋ bobika a te waai ale pai a te la. Jigi meena ate wa a cheem la a niak a te wa kama.
9Yaalika a jigsi kama ase fi nin vɔŋ te kaasuŋ, alege fi dan ta di fi suinum po di a poori ka doaba.
10Toariŋka bunyi dekki a niak nuru waai ale a miŋ wie la kama, a gaam ba nin miiri beruk ŋaaŋ a paari kook.
11Nuru baata nyiŋsa a gɔk kama a yaali kpaliŋsa, alege ba le namsi ba ate ku jɔ ba nyiŋ.
12Nuru a dan tu gɔi biak kaai ate ba pai ka bisa la a zunchoŋ, fi nin tu chaab ale beruk wa betta po.
13Fi dan pai biem a tuni nalim, biem a kan basi fi yenni.
14Kpaliŋ piilimka a nye ase ka nyiam lakka la, dila nyiŋ basi wanni abe fi ge ate nanpaga a yiti.
15Waai ale nye kaasi la pai basika ale waai ale kan seba wari nɔi po la namsika, Naawen a kisi kula buyewa kama.
16Yam karo ase fi nin tuni ligra ayen ba sak beruk wa, wa toalim ka popola ŋaai ale a zamsi la.
17Doa a kasim a sak ka yaalika, ate ba biak suok ayen wa a maari diipo ale a silim la.
18Waai ale a silim yam la a puulim ayen wa ale tuni wa mabiik pami.
19Nuru waai ale a yaali kpaliŋ la, a yaali ka biem. Waai mariŋka ale bo parik woŋta jigi la a wi ka kaasuŋ.
20Nuru waai suinum ale kan daa ŋmam la a kan nya wa dega. Waai ale a velim la a yɔk a zi ka daanika po.
21Ku ka sui domsik ase fi nin chim beruk ko, fi dan chim tukpari nyɔnɔ ko masim a ka ku po.
22Waai sui ale peenti la ku a nye ase ka tiim maŋ la, alege sui kaasuŋ a kpeeri ka nyiŋ pagrim.
23Gaasa nyɔnɔwa a suk a tuesi ŋanta kama a nyiem yaa yik wensie boteka a tulim ate ku chim venta.
24Yam nyam a pai ba nina a basi ka yam wie zuk, alege beruk popola ale a weeni wa diila la ale wa a nye.
25Bi betta ta ka daanika a jam ba ko jigi alege ta sui domsik a jam waai ale biak ba la jigi.
26Ku an nala ayen fi namsi wayɔrisima nyɔnɔ wa tuimaŋsa nyiŋŋa, yaase fi yik niŋdeerɔba a miiri ba ayen ba wensie nyiŋŋa.
27Waai ale a yik wadek biik po la a ta ka yam, ate waai ale a yik wadek la a ta miŋ chakka.
28Beruk a dan poom sina an lak wa nɔi ya wa a nya ase ka yam nyɔnɔ la, Ba noaŋa mumka meena ba a nye ase ka sebrɔba la.
Currently Selected:
Wamagsima 17: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
