Wamagsima 19
19
1Fi dan jaŋ ale ta wensie a zunchoŋŋa fi nin kan ta wensie ale chim beruk.
2Fi daa yaali wari nye alege sebika an gum du ku an nala, yeentika a ta ka nye beka a jam.
3Nuruba a pai ka betta nyeka a kaasi badek ale basi ate ba sue a puuri ale Naawen.
4Jigsika ta ka doa paalisa a jam, alege jajak doaba a zɛri wa kama.
5Velimvendik a kan cheŋ kinla alege kan tu namsika, ate waai ale a velim la a kan bɛ.
6Nuruba yega a yaa ba nye ate ka niŋdeerɔba sue a yɔk, ate waai meena a de doata ale waai ale a te tiirita la.
7Jajak dek nuruba a dan zɛri wa. Wa doaba a yaa le zɛri wa a paari ka bɛ. Wa le poom a saalim ba alege ba ale cheŋ.
8Waai ale a miŋ yam la a yaali ka wadek chiika. Ate waai ale ta miŋka la a nya ka wamaŋsa.
9Velimvendik a kan cheŋ kinla alege kan tu namsika, ate waai ale a velim la ale kaasi.
10Ku an nala ayen beruk a bo masim po, yaase yɔma a nya nabisa zuwa.
11Nuru baai ale ta yam maŋ la a yik ba suipuurumu kama. Ate ku ŋman chim zula a te ba ase ba nin kan pai nye kaasuŋ a chim wariya.
12Naab suipuurum a nye ase ka gbeŋli ale na la alege wa ŋmanteka a nye ase ka maglim ale bo wuuk nyiŋla.
13Nidoabi beruk ka kaasuŋ a te wa ko, ate nipok kpaliŋ kpaliŋdɔ sui puurika a nye ase ka ŋmoruk ale kasim a minisi la.
14Koba baga a te ba bisa yie ale jigsika nitalim kama, alege ka Naawen nyiini ale a te nipok waai ale a miŋ wie kiri la.
15Nyiŋworuk a ta fu a jo ka goom po, ate a ka tuini a tom a ta kɔm a jam.
16Yik m sinsaŋŋa a tara ate fi nyuvunni ale bo fi jigi, fi dan zɛri ŋa fi a cheŋ ka kum po.
17Fi dan maari jajak, fi piem a te ka Naawen, ate wa ale tuni fu fi ale pai dii a te la.
18Te fi bisa waalika ale yiila a diem boro. Dan kan daa di fi ale kaasi ba.
19Baai sue ale kaa daliŋ puurika la ale nya ka badek tutuna, fi dan poom vari ba a basi bunyi, fi ale nye dila kama ŋmana.
20Ta kaamka ale sinsaŋŋa meena ate fi baga a ta la, ate fi ta yam fi boka po meena.
21Nurubiik ale a zɔk dii wa popolaŋa po la a piisi kama, alege ka Naawen yeŋka ale a nye.
22Wensie ale te ate nuru a ta kiri. Fi dan jaŋ a zunchoŋŋa fi nin chim venta nyɔnɔ.
23Naawen yɔgsum chalika a ta fu a cheŋ ka vum po, ate waai ale ta bu la ale vuusi a chak, ninam a chali wa kama.
24Nyiŋworuk nyam a pai ba nisa a nye ŋandiinta kama a kan ta jueli ba noa.
25Nak baai ale koosi a la nuruba la, ate a jɔk po yiila nyama a zamsi yam. Sak waai ale ta miŋ chakka la, ate wa ta yam.
26Bi sii ale a nye ba koba biem yaase ba a yiak ba maba a basi la, a ta ka chivie a nyini peelim.
27Fi dan zɛri sinsaga wom ka m biiga, fi pai ka ŋaaŋ a te yam.
28Venta seerɔ a nye wensie a la kama, ate gaasa nyɔnɔ nɔi a dɛ biem.
29Namsika a boro a te baai ale nye nuruba a la la, ate betta ŋaaŋsa a nye magsi nakka.
Currently Selected:
Wamagsima 19: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
