Wamagsima 15
15
1Baliyaa tulisika a yiak ka suipuurum a basi, alege cheti basika a siti ka sue.
2Yam Nyɔnɔ sebika biika a ta ka mariŋka, alege beruk nɔnni a berinti betta.
3Naawen a nya jigi meena, wa a nya gaasa ale nuru maŋsaŋa meena kama.
4Wa baasima ka nyuvuri tiib, alege pimpaasima a ko ka chiik.
5Ka beruk nyiini ale kaa wom wa ko sinsaga, alege waai ale a wom sinsaga la ka yam nyɔnɔ.
6Tuilum ŋanta a bo wayɔrisima nyɔnɔwa yenni po kama, alege daanika ale chim tutuna a siŋ gaasa nyɔnɔwa yenni po.
7Yam nyɔnɔ biik a te ka wie yam miŋka. Ku abe daa dila ale beruwa.
8Naawen a kisi gaasa nyam kaabka kama, alege wa ta yaalika ale wayɔrisima nyama puusa kama.
9Gaasa nyɔnɔ suik ka kisuk a te Naawen, alege wa ta yaalika ale waai ale a gisi wayɔrisima la kama.
10Waai ale a zɛri suik maŋka la, le nya waalika. Ate waai ale a kisi sakka la ale kpi.
11Kum ale kaasuŋ an baga a yigi wasusuga Naawen jigi ya. Wa seba nurubiik suinummu a zuak kama!
12Baai ale nye nuruba a la la a kan yaali sakka. Ba a kan begi sinsaga a nyini baai ale ta yam la jigi ya.
13Laata a bo waai sui ale peenti la jigi kama, alege suinum buui ale a dɛ niniga la a kaasi ka chiik.
14Suinum buui ale a kpesi wie la a gisi ka wie yam miŋka, alege beruk ŋandiinta ale betta.
15Baai sue ale kan peenti la, dai meena a ta ka daanika a jam ba jigi, alege baai sue ale peenti la nyuvuri kasim ka tigi a te ba.
16Fi dan ta maga ale a chali Naawen yɔgsum a zunchoŋŋa jigsika ale butimka.
17Fi dan dɛ jenvaata juijui ate yaalika a boro la, a zunchoŋŋa fi ale a ŋɔbi lanta juijui ate kisika a boro la.
18Nuru waai sui ale kpabi a puuri la a nye ka kpaliŋ, alege waai ale a yik wa suinni la a kpimsi ka kama.
19Nyiŋworuk nyɔnɔ suiku a lik ale ka muŋsa, alege waai ale nye a magsi la suiku a yoarisi kama a cheŋ.
20Nidoabili kaai ale ta yam la a nye ate ka ka kowa sui a peenti, alege nuru beruk a zɛri wa ma kama.
21Berinni a ta ka masim a te baai ale kan ta yam la. Ate waai ale ta yam la a bo suik maŋka po.
22Wie a kan tom a magsi ka sakka ale kan boro la nyiŋ. Sagrɔba yegayega a nye kama ate wie a nye a niak.
23Waai meena a mariŋ tulisi magsika kama, ku nala kama ase fi nin biisi wamaŋ diipo ale magsi fi biisi la.
24Nyuvuri suiku a jueli kama a te yam nyam. Ate ba a basi kum ba ŋaaŋnyiŋ.
25Naawen a kaasi kanjanta nyɔnɔwa yenni kama, alege a lik pukɔga ŋanta.
26Gaasa nyɔnɔ popola ka kisuk a te Naawen, alege nalim wie a welema kama a te wa.
27Dɛ gaamka a ta ka daanika a jam dɔkdem meena zuk, alege baai ale kisa venta ŋanta tuesika la ale boro.
28Wayɔrisima nyɔnɔ suinummu a poli ka wa ale wa tulisi diila, alege gaasa nyɔnɔwa nɔi a biisi ka wakaasima.
29Naawen a yalima ale gaasa nyam kama, alege wa a wom wayɔrisima nyɔnɔ puusa kama.
30Suipeentik nyaasim a ta masim a jam suinum po, wapaala maŋsa a te ka nyiŋyɔgsa.
31Nuru waai ale a wom toariŋ kaai ale a niak la, wa le bo yeri ale yam nyama.
32Waai ale a zɛri sinsaga la a kaasi ka wadek, alege waai ale a wom toariŋka la a nya ka yam.
33Naawen yɔgsum chalika a sak ka yam, ate zaab m dek mɛ a de zula niŋ.
Currently Selected:
Wamagsima 15: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
