Wamagsima 14
14
1Nipok waai ale ta yam la, a gomsi wa yenni kama a ta di, alege beruk ale waai ale pai wa nisa a dari di a lɔnsi.
2Baai ale a va suik maŋka la a chali Naawen kama. Baai ale kaa va suik maŋka la a zɛri wa kama.
3Dii ale nyini beruk kanjanta biik po la ale basi ate ba nak wa ale doari, alege yam nyam nɔi a vari ba a basi kama.
4Fi dan kan ta lalik ate ka pagra, fi a ta ka bui koruk, alege fi dan ta lalik pagrik fi ale nya ŋandiinta nna yegayega.
5Wensie nyɔnɔ a kan velim, alege venta seerɔ a vuusi ka venta wie.
6Waai ale koosi a la nuruba la a gisi yam ka kinla, alege sebika a nye ka moali a te nuru waai ale ta miŋ chakka la.
7Basi betta ale bo juijui la, dii nyiŋla fi a kan nya wie miŋka yam ba jigi ya.
8Yam nyɔnɔ yammu ale wa kpesi nya wa suiku, alege betta betta ale ba paasika.
9Betta a pai nye kaasuŋ ate ku a chim ka laata wari, alege wayɔrisima nyɔnɔ a pai ku a chim ka ninmuna wari ale ŋman a yaali nyemagsika.
10Suinum meena a seba bu biem kama, ate waai a kan maari a dɛ ku masimu.
11Gaasa nyɔnɔwa yenni ale kaasi, alege wayɔrisima nyɔnɔwa viuku ale nala.
12Suik kuui a boro kama a nye ase ku nala la a te nuru, alege ku nuerika ku ka kum suik.
13Laata a suk ka sui kaasuŋ, alege laataŋa a dan nueri sui kaasuŋku a ŋman boro kama.
14Nuru baata ale nya dii ale a niak ba la, ate nuru maŋsa ale nya dii ale a niak ba la.
15A jɔk po yiila a ta siaka ale ka wari meena, alege yam nyɔnɔ a poli wari meena zuk kama.
16Yam nyam a kpesi badek kama ale a yik badek a nyini daanika po, alege betta niŋ ale kan bo wari po la ale soa ate ba a jɔ wie po.
17Baai sue ale kaa daliŋ puurika la, a nye ka dii ale kan nala, waai ale a zok biem la ba kisi wa.
18A jɔk po yiila a ta ka wa bettaŋa nyiini, alege yam nyɔnɔ nyuenta ale miŋka.
19Nuru baata a kpi ka duna nuru maŋsa niŋ. Gaasa nyama ale kpi duna Wen nuruma nansuiŋta nɔi.
20Jajak dek sɔm a poom ka yaalika ale wa, alege jigsirɔwa a ta ka doaba a piisi.
21Fi dan zaab fi vaanchoa ku ka wabiok, niaka ale baai ale a maari ŋanjaksa.
22Fi dan poli ayen fi nye biem, fi ale bɛ. Fi be dan poli ayen fi nye nalim, fi ale tuesi yaali kaai ale kan a nueri la ale wensie.
23Tuima tomka a ta ka nyuenta a jam, alege daluŋ kama a ta ka jaŋsa a jam.
24Paaruŋ ale yam nyɔnɔ naam zutɔk. Betta wie meena a chim ka betta.
25Wensie seerɔ a vari ka nuruba nyuvoa a basi, alege venta seerɔ ka bumbobrɔ.
26Naawen yɔgsum chalika a basi ate nuru a ta ka sebchakka wa po, ate wa bisaŋa a nya sukka jigi.
27Naawen yɔgsum chalika ka nya buui ale buli a te nyuvuri, ale basi ate fi a nyini kum baruk po.
28Tɛŋ kaai nuruba ale piisi la ka naawa pimpauk. Tɛŋka nuruma a dan kan piisi ya ka wa chivie.
29Nuru waai sui ale kan kpabi a puuri la a ta ka miŋ chakka nna yegayega, alege waai sui ale kpabi a puuri la a sak ka betta yegayega.
30Suiyɔgni suinum a basi ate ka nyiŋka a ta nyiŋyɔgsa, alege nyuri a nye ase ka nyiŋtuila ale bo kobaŋa po la.
31Baai ale a namsi ŋanjaksa la, a lɛ ka Waai Ale Nye Ba La, alege baai ale a maari baai ale a silim la a zuli ka Waai Ale Nye Ba La.
32Kaasuŋ a ŋɔriŋ ka gaasa nyam alege nuru maŋsa a nya likka kama ase ba nin kpi. 33Yam a bo ka nuru waai suinum ale a miŋ wie kiri la, alege betta a zɛ yam wie.
34Wayɔrisima a zak ka tɛŋ a zaani, alege wabiok a chim ka chivie a te nuru meena.
35Naab a nya masim a nyini ka tomteerɔ baai ale ta yam la jigi, alege wa sui a puuri ale baai ale pai wa a nyo chivie po la.
Currently Selected:
Wamagsima 14: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
