Wamagsima 13
13
1Bi kaai ale ta yam la a siak waali kaai ate wa nyam a te wa la kama. Waai ale a nye nuruba a la la, a kan wom toariŋka.
2Yam biik ale te fu ka ŋandiin maŋsa, alege velimvendik kɔrisa a bo ale ka wɔkwɔk nyeka.
3Baai ale seba ba giŋgeluŋtaŋa yikka la ale goa beni, alege waai ale kaa poli ale a biisi la a kaasi ka jaab meena.
4Nyiŋworuk nyam a yaali ka yegayega, alege ba a nya fii fiiga, alege baai ale a tom la a jigsi kama.
5Wayɔrisima nyam a kisi venta wie kama alege gaasa nyam a ta ka chivie ale niniga a jam.
6Wayɔrisima a maari nuruba ba boka po meena kama, alege baai ale bie la, ba gaasaŋa ale a kaasi ba.
7Ba gela a jaŋ kama alege a nye badek ase jigsirɔba la. Ba gela a jigsi alege a nye badek ase ŋanjaksa la.
8Jigsirɔwa ale pai ligra a tuni wa nyuvunni nyiŋ, alege jajakka kpaziim a poom kan nagi.
9Wen nuruma nyuvooŋa a sueri ale ka bolim ale masim, alege gaasa nyama bolimu ale kpi.
10Kanjanta a ta ka kpaliŋ a jam. Baai ale a wom sinsaga la ka yam nyam.
11Nwuli jigsika a muriŋ a bɛ kama. Alege nyiŋbiiri ŋanta a piisi kama.
12Yiila ŋaai ale ŋmani ŋaaŋ la a te ka suinum nyiŋtuila, alege gɔdaasima ŋaai ale a chim wensie la ka nyuvuri tiib.
13Waai ale a zɛri sinsaga wanni la a ta ka kaasuŋ a cheen wadek jigi, alege waai ale a teeri wanni a nye wamaŋsa la ale nya nyuenta.
14Yam nyɔnɔ sinsaga a nye ase ka nyuvuri nyiam bulik la. Baai ale siak a te bu la a liisi kum barukku kama.
15Nuru waai ale ta popola maŋsa la, ba a zuli wa kama. Waai ale ka venta nuru la a cheŋ tuak ka kaasuŋ po.
16Wari meena po yam nyɔnɔ a poli kama alege a nye, alege beruk a nye wa betta a sak kama.
17Tintomdɔ waai ale kan ta wensie la a jo ka daanika po, alege tintomdɔ waai ale ta wensie la a ta ka tebika a jam.
18Fi dan zɛri sinsaga, jaŋsa ale chivie ale a jam fi zuk. Fi be dan wom sakka, fi ale nya zula.
19Ku ka suipeentik ate fi nya gɔdaasima a nin jam chim wensie, alege betta a kan siak a basi biemmoa ale a tuesi ŋa.
20Cheŋ ale yam nyam ate fi ta yam, gum chaab ale betta ate fi jo daanika po.
21Daanika a vi wabanyeerisa kama, alege ate niauŋ a chim tutuna a te wayɔrisima nyam.
22Nuru maŋsa a basi ba nitalim a te ka ba ŋaaŋbisa, alege wabaata nyam a basi ba paaruŋ a te ka wayɔrisima nyam.
23Jajak laŋ ale nye ŋandiinta nna yegayega, alege ba ale va venta suik po a vari ba meena.
24Baai ale kan siak a pai fiŋ a te ba bisa waalika la, a kan nye ba a magsi. Baai ale a yaali ba bisa la a te ba ka waalika.
25Wayɔrisima nyama a dɛ ka ba suiniima ale a yaali diila, alege gaasa nyɔnɔwa a cheŋ ale ka poi kɔruk.
Currently Selected:
Wamagsima 13: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
