Wamagsima 12
12
1Ate fi zamsi la, nye ate fi baga a fɛ fidek. Ku ka betta ase fi ale kan a yaali sinsaga.
2Nuru maŋ a nya ka niauŋ a nyini Naawen jigi, alege wa a kaasi nuru waai ale ta popola baata la kama.
3Gaasa a kan yik fu a zaani alege nye maŋ a ta ka naŋsa a feri a paari tɛŋ.
4Nipok waai ale ta zula la ka wa chorɔwa zuk zak zaanika, alege waai ale ta chivie a jam la a nye ase ka nyiŋdomma a te wa chorɔwa.
5Wayɔrisima nyɔnɔwa popolaŋa a nala kama. Gaasa nyɔnɔwa sinsaŋŋa ka pimpaasima.
6Gaasa nyam wie doa a limisi ka ziim, alege wayɔrisima nyam nɔi a vari ba a basi kama.
7Gaasa nyama a kpi kama a muriŋ a bɛ alege Naawen bisaŋa a za kama giŋgiŋ.
8Nuru yam nyiŋ ate ba a weeni wa maŋsa a va wa nyiŋ, alege ba a zɛri waai popola ale kan bo jigi yeŋ la kama.
9Fi dan ta fidek a siŋ tɛŋ a tom tuima, a zunchoŋŋa fi ale nye fidek ase nuru kpioŋ la alege a goa kɔm.
10Baai ale ka wayɔrisima nyam la niŋ a bo ba duŋsa po kama, alege nuru baataŋa a kasim ta ka gaasa.
11Waai ale a tom wa talim po la ale nya ŋandiinta yegayega, alege waai ale chali a vi wakayaata la a ka yammoa.
12Zueba a de ka nyuri ale chaab ba ale zu ŋan baai la nyiŋ, alege wayɔrisima nyama a feri paari kama a za a yɔn yɔna.
13Gaasa nyama nɔi po wie ale chim baruk a yik ba, alege Wen nuruma a kan nya wie ŋala chaaba.
14Nuruba ale nya ba le a biisi diila tutuna kama, abe ba nya ba le a tom diila tutuna.
15Betta suita a nala ka badek nina po alege yam nyam a wom ka sinsaga.
16Betta a kan suk ba suipuurumu, alege yam nyam a kan nya leeta ase wari la.
17Waai ale a weeni wensie la a weeni ka wensie wie, alege velimvendik a weeni ka venta wie.
18Nuruba gela biisa a gebi ka zuzugta alege yam nyama wie a te ka tebika.
19Wensie a boro kama taam wuu, alege venta a kan boro a beni.
20Pimpaasima a bo baai suiniima ale sueri ale biem popola kama, alege baai ale a poli suiyɔgni la a ta ka masim.
21Biem a kan jam nuru maŋsa jigi ya alege gaasa nyama a ta ka daanika nyiini.
22Venta nɔngban ka kisuk a te Naawen, alege wa ta yaalika ale wensie nyam kama.
23Yam nyɔnɔ a kan sak wadek ale wa sebika alege betta a jalisi ba bettaŋa kama.
24Tom ale nyiŋbiiri ate fi ale chim niŋdeerɔ. Chim nyiŋworuk nyɔnɔ ate fi ale chim yɔma.
25Sui kaasuŋ a dan bo nuru suinum po wa baga a bɛ kama, alege nyiŋbiiri a basi ate ka wa sui a peenti.
26Wen nuruma a sak ba doama ka sinsak maŋsa. Gaasa nyam ale ta ba a cheŋ bɛ.
27Nyiŋworuk nyam a kan nya ba ale a yaali diila, alege waai ale ta nyiŋbiiri la a nya wa ŋan silimta ŋanta meena kama.
28Wen nuruma suiku a ta fu a cheŋ ka nyuvuri po. Suik kula a kan ta fu a cheŋ kum po.
Currently Selected:
Wamagsima 12: BWU
Highlight
Share
Compare
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
