Maika 2

1Ku ale toa a te baai ale a zɔk wabaata ale baai ale a zɔk biem ba gaduata zuk la! Saluiku po ba nyiem yaa ji kama a ta nyini dii nyiŋla ba ta pagrim kama a nye di. 2Ba nina a muni ale nuruba kaduksa ale a vari ba yieŋa. Ba a vari nuru wa yeri po ale a vari wa vaanchoa nitalim.

3Dila nyiŋ, Naawen a weeni kama ayen, <<M boro a zɔk ka kaasuŋ nuruma de zuk ate ba kan baga a vari badek a basi. Ni kan ŋman cheŋ kanjanta po, diila va ŋala ale chim ka kaasuŋ. 4Dai dila danni nidoaba ale nye fu a la. Ba ale nye ate ni sue a puuri ale kumsa yiini de ayen, <Ti kaasi kama. Ba lab m nuruma ŋantaŋa a te ka chaab. Wa pai a nyini m jigi! Wa pai ti kaduksaŋa te bumbobrɔba.>> 5Dila nyiŋ fi kan nya waai Naawen nuruma po ate wa nak gbaŋ a lab tɛŋka.

6Ba biisiteerɔma a weeni kama ayen, <<Ni kan biisi. Ni kan biisi ŋantaŋa de wie. Chivie a kan bag ti.>> 7Jekob yenni ale weeni ayen, <<Naawen Chiika sui a puuri kama? Wa a nye ŋade chaab kama? Mi wieŋa kan nye nalim a te waai suita ale nala la? 8Mi nuruma a yiti ka yɔgyɔgla de ase dachiak la. Ni vari jigsika garukku a nyini baai ale va suiku a taam la ate ni niŋ a poom ka ba po nna se nidoaba ale nyini kpaliŋ po a cheena la. 9Ni yiak m nuruma nipooma a nyini ba yie naliŋsaŋa po. Ni pai m niauŋku a nyini ba bisaŋa jigi taam wuu. 10Ni yiti zaani, cheŋ niŋ! Diila dela daa ni vuusum jigi ya, dii nyiŋla ka daŋ kama. Ka kaasi kama ate jaab karo a yik ka nye a magsi. 11Ase velimvendik ale pimpaasirɔ a dan jam weeni ayen, <Mi le mooli ate daam ale buui ale a buk la a jam ni jigi.> Wa le chim ka biisiteerɔ waai ate nuruma de a yaali la!

12<<Jekob, m le sum a tigsi ni meena. M le sum a ta Izirali dem baai ale tali la a jam jigi yeŋ. M le ta ba a jam jigi yeŋ ase piisa ale bo zɔŋ po diila. Ba ale bo jigi yeŋ ase piisa ale bo wuyɔgsuk po diila. Nuruba ale sueri jigini. 13Waai ale wɛ a nyini la ale wa lak suiku a ga dɛ ba niŋ. Ba ale wɛ nansuiŋ tuoku a ga nyini. Ba naawa ale taam a ga dɛ ba niŋ. Naawen ale bo ba zuk.>>

Currently Selected:

Maika 2: BWU

Highlight

Copy

Compare