Maika 3

1Ate mi yaa weeni ayen, <<Nama Jekob niŋdeerɔma ale Izirali yenni kpaŋŋa ni wom. Ni kan seba nyemagsika, 2nama baai ale kisa nalim ale a yaali biem la. Nama baai ale a puli nyiŋ gbaŋ a nyini m nuruma jigi ale ba nyiŋ lammu a nyini ba kobaŋa po la. 3Nama baai ale a ŋɔbi m nuruma nyiŋlanta ale a puli ba nyiŋ gbaŋsaŋa ale a che ba kobaŋa nna bunabuna a magsi dikka, ase lam ate ba dik la?>>

4Ate ba yaa le kaari a te Naawen, alege wa a kan wom ba. Dila po wa ale suk wa nimbidiaka a nyini ba jigi, dii nyiŋla biemu ate ba nye la nyiŋ.

5Nya kude ate Naawen a weeni ayen, <<Dan ka biisiteerɔ baai ale ta mi nuruma a cheŋ a bɛ la, ase ba wanyi a dan te ba ŋandiinta, ba a mooli ka suiyɔgni. Ate wa dan kan nye ya, ba a gomsi kama ayen ba nye kpaliŋ ale wa. 6Dila nyiŋ yok ale jam fi zuk, ate fi kan nya, ate legi ale nye ate fi kan baga a porisi. Wenbinni ale siŋ biisiteerɔma zuk, ate danni ale chim legi a te ba. 7Chivie ale yik biisiteerɔma ate kanpiinta ale dɛ sampoporisaŋa. Ba meena ale lik ba nimbidaasaŋa dii nyiŋla tulisika a kan nyini Wen jigi ya.>> 8Alege dan ka mi, mi sueri ale ka pagrim ale Naawen Chiika ale nyemagsika ale zuaka ayen m weeni Jekob nye kaasuŋku ale Izirali wa biemu. 9Wom de, Jekob yenni niŋdeerɔma ale Izirali yenni kpaŋŋa baai ale a zɛri nyemagsika ale yik dii meena ale magsi a tagri la. 10Baai ale a ko nuruba a sɛ Zayon ale ziim ale a sɛ Jerusalem ale gaasa la. 11Wa niŋdeerɔma a tuesi ŋanta nuruba jigi alege a bo buusa, ate wa kaabteerɔma a tuesi ŋanta alege a sak, ate wa biisiteerɔma a tuesi ligra alege a porisi. Alege ba a sali ka Naawen ale a weeni ayen, <<Naawen an bo ale ti? Kaasuŋ a kan jam ti zuwa.>> 12Dila nyiŋ nama nyiŋ, ba ale kpa Zayon ase ka laŋ la. Jerusalem ale nye ase ka guura la, Naawen yenni a chim guuk ate tiisa a chim lik.

Currently Selected:

Maika 3: BWU

Highlight

Copy

Compare