Maika 1

1Naawen wa dii ale jan jam Maika ale nyini Moreset la jigi. Di jam ka va ŋaai po ate Jotam dɛ naam ate Ayazi a jam dɛ ate Azekaya mɛ a jam dɛ Juda la. Wa le jam nya wa dii a magsi chaab ale Samaria ale Jerusalem la ale nna:

2Nuruba, ni wom, ni meena abe wom, tɛŋzuk de ale baai meena ale bo ka po la, ayen Nyɔnɔwa Naawen a nya ni ale nye dii a kaasi la kama. Nyɔnɔwa a nyini ka wa yenni po. 3Nya! Naawen a nyini ka wa bo ka jigini a cheena. Wa siŋ cheen kama ayen wa tabi tɛŋzuk de guutaŋa zuk. 4Guutaŋa a nyaliŋ kama wa naŋtaata po, ate vaasaŋa a lab ase bolim ale paari zirima diila ase nyiam ale va churintika jigi a siŋ diila. 5Nya kude meena ka Jekob nye kaasuŋku ale Izirali wabaataŋa nyiŋ. Ka boa ale Jekob nye kaasuŋku? Ku daa Samaria? Ka boa ale Juda puusika jigini? Daa Jerusalem?

6<<Dila nyiŋ m le nye ate Samaria a chim guura, a chim kaduk ate ba a bori ŋanta ka po. M le kpiiri ka tanaŋa a basi viaka po ate ka nyubaŋa a doa jassi. 7Ka bɔgtaŋa meena ale ŋɔriŋ nna bunabuna. Ka yenni tiiritaŋa meena ale dɛ bolim. M le kaasi ka ŋanmɛɛntaŋa meena. Ka ale toalim a tigsi ka tiiritaŋa a nyini ka taabuksa tutuna jigi la, ase taabuksa tutuna la ate ba ale ŋman pai ŋa a tom.>>

8Nya kude nyiŋ m le kum abe m wooli. M le cheŋ naŋta bie ale chaboala. M le wooli ase gɔi biak la, abe m siŋti ase viuk la. 9Diila wa niraŋa a kan nueri. Ku cheŋ paarika Juda. Ku paarika m nuruma Jerusalem dek nansuiŋku nɔi. 10Kan weeni ku Gat po. Kan poom kum. Bilim fidek Bet Ofra paasuku po. 11Nama baai ale bo Safir po la, ni cheŋ chaboala ale chivie. Baai ale bo Zaanan po la a kan nyini peelim. Bet Ezel a bo ka kumsa po. Ba pai jabuui ale a nya ba zuk la kama ta cheŋ. 12Baai ale bo Marot la a viriŋ ale ka nyiŋdomma a limisi nyiŋyɔgsa, dii nyiŋla kaasuŋ a nyini ka Naawen jigi a jam, a poom ga paari Jerusalem nansuiŋku nɔi. 13Nama baai ale bo Lachis la, ni bobi wusumaŋa a maŋ torokowa. Nama ale piilim a nye Zayon Liewa biem. Dii nyiŋla ba nya Izirali wabaataŋa ka fi po. 14Dila nyiŋ ni ale te Moreset Gat basika tiirita. Akzib tɛŋka ale paasi Izirali nalimaŋa. 15M le basi ate nakdeerɔ a jam nama baai ale bo Maresa po la zuk. Waai ale ka Izirali zula la ale jam Adullam. 16Ni poni ni zuimaŋa abe ni a kum ni bisaŋa ate ni ta suipeentik ba nyiŋla. Ni nye ate ni zuimaŋa a kpa ase duiŋ la, diila bisaŋa ale nyini ni jigi kama a cheŋ tɛŋ yoŋ po.

Currently Selected:

Maika 1: BWU

Highlight

Copy

Compare