Jona 4
4
1Alege Jona sui a jam kaasi ate wa sui a puuri nna yegayega. 2Wa yaa puusi a te Naawen a weeni ayen, <<Naawen yaa, daa m ni poom bo yeri a weeni diila ale la? Ka fi nye ka de nyiŋ ale soa ate mi din banti ale chali a cheŋ Tarsis la. Mi seba kama ayen fi ka jiirim kpiem nyɔnɔ ate fi sui yirika a toa ate fi ŋmanteka mɛ a ka bain ya, fi ka Wen dii ale ka a daliŋ fi vɔŋ te la. 3Naawen yaa, dila nyiŋla ko mu yɔgyɔgla de. Ale m dan jɔk kpi, ku zunchoŋ kama a gaam m le boro.>> 4Alege Naawen a ya tulisi wa ayen, <<Ka din dek nyiŋ ale soa ate fi basi ate fi sui a puuri?>> 5Jona yaa nyini tɛŋka po a nyini a taam ka kori geŋ a ti viuk a yaa jo kali ku po a limisi ase Naawen ale kaasi tɛŋka ya.
6Naawen dii ale ka Wen la yaa basi ate tunuŋ a nyini chim yɔgsum a liŋ Jona zukku ate wa yaa kala. Jona sui jam peenti ka nna yegayega ale tunuku yɔgsummu. 7Vari ale veenti la, saluik yokyokwa Wen a yaa basi nanzuiri ate di dɛ tunuku kinni ate ku kpi. 8Wenbinni ale pusi la, Wen a yaa basi ate kantueŋ wuluk a ŋari nyini koni po a nak Jona zukku ate wa buk nna zana. Wa jaa yaa ka kum nyiini. Wa yaa weeni ayen, <<M dan jɔk kpi a zunchoŋ m le vua la kama.>>
9Naawen a yaa bek Jona ayen, <<Fi ta suik a basi ate fi sui a puuri ale tunuku ale kpi la nyiŋŋa?>> Jona yaa tulisi ayen, M ta suik kama. M suinni ale puuri diila m yaa a yaali ka kum nyiini.>> 10Naawen yaa weeni wa ayen, <<Tunuku ale nyini la, fi a kpa gilim ku, fi a nyo bibaam ku tɛŋa. Ku pai ka yok yeŋ a nyini, a ŋman pai yok yeŋ a kpi, alege fi basi ate fi sui a puuri ale ku kum. 11Alege Niineve a ta ka nuruba ate ba piisi gaam tusa kook ale pisiye (120,000) ate ba zɛ ba juga ale ba gala. Ba bi ta niiga mɛ kama a piisi. Ku a magsi ayen m basi ate m jiirim a dari tɛŋ kpieŋ ka dɛ?>>
Currently Selected:
Jona 4: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
