Matiu 17

1Daa ŋayuebi ale jam taam la, Yeezu yaa wi Piita ale Jeemsi ale wa suoku Jɔɔn a ta ba jueli guuk kpioŋ kunyi zuk a bo dula badek ba nyiini. 2Ba ale jam a bo dula la, Yeezu nimbidiaka a yaa tagri ba niŋ ale a nyaksi a se wenbinni la. Wa gattaŋa mɛ a tagri ale peenti ale a nyaksi nna yegayega. 3Ba yaa nya Moosis#17:3 Teerika 34:5-6 ale Elaja#17:3 2 Nalima 2:11 a boro a biisi ale Yeezu. 4Piita yaa weeni Yeezu ayen, <<M Nyɔnɔ Yeezu Kirisita, tama ale bo dela la a nala kama. Basi ate ti ti viita tita a te ni ate fi a soa kunyi, Moosis mɛ a soa kunyi abe Elaja a soa kunyiwa.>> 5Piita ale diem boro a biisi la, chiŋma nyaksini yaa deri jam a lik ba. Ba yaa wom lueluk chiŋmanni po ate ku weeni ayen, <<Ka Mi Nidoabinni ate mi a yaali la ale nna. Wa a nye ate m sui a peenti. Dila nyiŋla ni be wom wa.>>#17:5 Teerika 18:15 6Yeezu ŋaaŋviirɔma ale wom lueluku la, yɔgsum yaa deri yik ba nna yegayega, ate ba nyiŋsa a gɔk ate ba yaa lo tɛŋ a pai ba lɔga a vuk tɛŋ. 7Yeezu yaa jam ba jigi a tiri ba ale weeni ba ayen, <<Ni yiti ŋmai abe ni kan te ni kpaziim a nak.>> 8Ba ale yiti ŋmai a gisi nya la, ba an jam nya waai ya, alege ka Yeezu nyiini ale jam za ba tɛŋ.

9Ba ale nyini guuku zuk a siŋ la, Yeezu yaa weeni ba ayen, <<Dii ate ni nya la, ni kan weeni sak waai ya, ka da dii danni ate Mi Saalɔbiika a yiti kum po la.>> 10Ba yaa bek Yeezu ayen, <<Ka boa ale soa ate Sinsak sagrɔma a weeni ayen ka Elaja ale wa liŋ jam?>> 11Wa yaa weeni ba ayen, <<Ku ka wensie ate Elaja liŋ a jam a gomsi jaab meena. 12Mi a weeni ni kama ayen Elaja a poom jam kama. Nuruba a jam zɛ ayen ka wa ale la ate ba yaa nye wa dii ate ba a yaali la. Ba abe le nye Mi Saalɔbiika mɛ ka dila dekdega.>> 13Wa ŋaaŋviirɔma ale wom dii ate wa biisi la, ba yaa deri miŋ ayen wa a biisi ka Jɔɔn Sokateerɔwa wie.

14Ba ale ŋmani cheŋ nuru boanni jigi la, nuru wanyi yaa jam kpi dunduna tɛŋ Yeezu niŋ. 15A yaa weeni wa ayen, <<M nyɔnɔ, ta jiirim ale m nidoabinni, dii nyiŋla kpinkpinsa ale ta wa ale a daani wa nna yegayega. Wa nyiem kasim a lo ka botta po ale nyaata po a nye ayen wa ko wadek. 16M saalim ka fi ŋaaŋviirɔma ayen ba tebi wa, alege ba an baga a tebi wa.>> 17Yeezu yaa tulisi ayen, <<Nama gaŋ kaai ale kan ta siaka ale potim seba ale a nye, mi ale bo ale nama a beni ka sɛ abe mi a ŋmagli ale ni? Ta fi nidoabinni a jam de.>> 18Ba yaa ta wa a jam Yeezu jigi, ate wa yaa weeni chichirik bioku ayen ku nyini biika jigi a nyini. Wa ale weeni dila la, nidoabinni yaa deri nya nyiŋyɔgsa.

19Yeezu ŋaaŋviirɔma yaa nya wa badek ba nyiini a bek wa ayen, <<Ka boa ale soa ate tama an poom baga a yiak chichirik bioku ate ku nyini biika jigi ya?>> 20Wa yaa weeni ba ayen, <<Nama siaka an zuak ya. Ni basi ate m weeni ni ayen a se ni siaka a dan fiisa ase mastad#17:20 Mastad ka biri fiik. biri la, nama ate baga kama a weeni guuk kpioŋku de ayen ku yiti dula jigini a cheŋ. Ku le sum a yiti. Ku dan ka dila, ni baga kama a nye jaabuuri meena. 21Alege chichirik bioku de choawa dan kan daa nɔi bobika ale puusa nalimnyiini, ni an baga a yiak ate ku a nyini.>>

22Yeezu ale wa ŋaaŋviirɔma yaa basi dula jigini ale ge cheŋ Galili. Ba ale ga paari dula la, wa yaa weeni ba ayen, <<Ba ale jam yik Mi Saalɔbiika a nyo nuruba nisima po, 23ate ba ko mu alege daa ŋatawa danni m le yiti kum po.>> Ba sue yaa kaasi nna yegayega.

24Yeezu ale wa ŋaaŋviirɔma ale ga paari Kapernaum tɛŋka po la, Wen yenni lampoo cheesirɔma yaa jam Piita jigi a bek wa ayen, <<Fi sagrɔwa a tuni Wen yenni lampoowa?>> 25Piita yaa weeni ba ayen, <<Mm, wa a tuni kama.>> Piita ale jo yenni po ayen wa weeni wa dii ale nye la, Yeezu yaa dɛ niŋ a bek wa ayen, <<Simon, ka bana ale a tuni lampoo a te tɛŋka kpaŋŋa? Ka nichamma yaa ka tɛŋka demma? Fi a poli ka sɛ?>> 26Piita yaa weeni wa ayen, <<Ka nichamma ale a tuni.>> Yeezu yaa weeni wa ayen, <<Ku kiri ale tɛŋka demma a kan tuni. 27Alege tama a kan yaali ayen ti daani nuruma de. Cheŋ nyakpiemu a ga pai fi ŋmiaka a yuk a yik juma nyiamu po. Jum buui ate fi liŋa a yik la, fi le nya ligri bu nɔnni po dii ale a magsi mi ale fi Wen yenni lampoowa tutuna la.>> Ta di a cheŋ ga tuni a te lampoo cheesirɔma.

Currently Selected:

Matiu 17: BWU

Highlight

Copy

Compare