Matiu 18

1Dila po Yeezu ŋaaŋviirɔma yaa jam wa jigi a bek wa ayen, <<Ka wana ale kpagi Wen naamu po?>> 2Yeezu yaa yik biik wanyi a ta jam zaani ba niŋ, 3Wensie ate mi a weeni ni, <<See ka ni pai nidek a chim a se bisa la, kan daa di ni kan jo Wen naamu po. 4Nuru waai ale yik wadek ale a nye ase biik la ale a chim kpagi Wen naamu po. 5Nuru waai ale a tuesi biika de mi nyiŋla, wala a tuesi ka mi dila. 6<<Nuru waai abe dan nye ate bisaŋa de wanyi a jɔk wa siaka, ku le zunchoŋ kama a te kula nyɔnɔwa ase ba nin pai ni kpienni a bobi yik wa ŋiri a ta wa ga yuk basi nyakpiemu po.

7<<Nuruba gela a nyiem kasim a yaali kama ayen ba a paasi nuruba ate ba a va tuim kaasima suik. Ku ale jam bie baai ale a nye dila la jigi.

8<<Nuru waai a dan pai wa nisima yaase wa naŋtuok a tom wabiok, ku a fɛ ate wa gebi wa nisimaŋa yaase wa naŋtuoku a yuk basi. Nuru waai a dan ta ni yeŋ yaase naŋ yeŋ ale nya nyuvuri dii ale kan ta kpeglimka la, kula ale zunchoŋŋa a gaam wa ale ta nisima siye yaase naŋsa siye alege a ga jo bolim buui ale kan maara kpimsi la po. 9Nuru waai a dan pai wa num a tom wabiok, ku a fɛ ate wa yeeri bu a yuk basi. Nuru waai ale ta num bunyi ale ge a ta nyuvuri dii ale kan ta kpeglim la, kula ale zunchoŋŋa a gaam wa le ta nina ŋaye ale ge a jo bolim buui ale kan maara kpimsi la po.

10<<Nama kpesi nidek abe ni ka a nya bisaŋa de a se ba daa nuruba la. Ni basi ate m weeni ni ayen ba maarɔma a bo ka m Kowa waai ale bo wenŋmazuk la jigi. 11Mi Saalɔbiika a jam ayen m gisi ka baai ale bɛ la a vari ba basi.

12<<Nuru waai a dan ta piisa kook ate kunyi a bɛ, nama a poli ayen nuru wala ale nye ka sɛ? Wa a basi ka nŋala guutaŋa zuima ale ge a gisi kunyiwa. 13Mi a weeni ni kama ayen wa dan nya ku, wa sui ale peenti nna yegayega ku nyiŋ a gaam nŋala meena. 14Suik kula po ni Kowa waai ale bo wenŋmazuk la, a kan yaali ayen bisaŋa de po wanyi a bɛ.

15<<Fi suok a dan nye fu a kaasi, cheŋ wa jigi a ga weeni wa ayen wa nye fu kaasi kama. Wa dan siak wa le kaasi la, fi ale wa ale ŋman niak chaab. 16Alege wa dan kan wom ya, yik nuru yeŋ yaase baye ate wari meena ni a biisi la seerɔba baye yaase bata a siak ayen ku ka wensie.#18:16 Teerika 19:15 17Wa dan ŋman zɛri ba mɛ ta ba a cheŋ ate ni ga weeni a sak Wen nuruma meena. Wa be dan ŋman zɛri ba mɛ, nama a kan ŋman ta wari ale wa ase nama ale kan ta wari ale lampoo cheesirɔma ale baai ale kan seba Wen la. 18Wensie ate mi a weeni ni ayen, dii meena ate fi a kisi tɛŋzuk de la a kisi kama wenŋmazuk, ate dii meena ate fi a siak tɛŋzuk de la a siak kama wenŋmazuk.

19<<M be ŋman a weeni ni kama a gum du ayen nama baye a dan tu chaab a puusi a te Wen wari nyiŋ ale ta siaka mi Kowa waai ale bo wenŋmazuk la, ale pai a te ni. 20Nuruba baye yaa se nuruba bata a dan tu chaab mi yuenni nyiŋ mi ale bo ale ba.>>

21Ate Piita yaa jam Yeezu jigi a bek wa ayen, <<M Nyɔnɔ Yeezu Kirisita, a se m suok a dan kasim a nye mu a kaasi ka bu dina ate mi ale vɔŋ a te wa? Ku nɔi buyopɔi yaa?>> 22Yeezu yaa weeni wa ayen, <<Daa buyopɔi dekki, alege kasim a vɔŋ te wa a ta a cheŋ.

23<<Basi ate m weeni ku kiri ale ka diila a sak fu. Wen naamu a nye se ka tɛŋ kaai naab la. Dai yeŋ po ate wa yaa wi wa tomteerɔma ayen wa bek ba a wom ase ba tuimaŋa ka sɛ. 24Ba meena ale tigsi chaab a jam la, wa yaa wi wa tomteerɔma po wanyi a ta nyini a zaani ba niŋ. Nuruwa dɛ a jam piem ka ligra nna yegayega naawa jigi, 25alege wa an jam baga a tuni ŋa a te wa. Naawa ale ga wom nya kude la, wa yaa weeni wa nuruma ayen ba ga kɔlim wa ŋan baai meena ate wa ta la a da abe ba yik wadek ale wa dɔkdemma meena a ta ga da ate ba chim yɔm. Dila ale basi ate wa baga a nya wa ligraŋa meena. 26Tomteerɔwa ale wom dii ate naawa a weeni la, wa yaa deri kpi duna tɛŋ wa niŋ a saalim wa ayen, <M nyɔnɔ, yik fi suinni m le tuni fu ŋa meena.> 27Naawa a yaa jam ta jiirim nna yegayega ale wa a yaa vɔŋ wa pamini meena a te wa ale weeni wa ayen wa a cheŋ. 28Tomteerɔwa yaa le basi naawa yenni ale cheŋ la, wa yaa ga tu naawa tomteerɔma po wanyi. Nuru waai ate wa tu la a jam ta ka wa ligra nna maga dega. Wa ale ga paari nuruwa la, wa yaa deri bobi nuruwa a ŋmeeni ale a weeni wa ayen, <Tuni mu m ligraŋa meena>. 29Wa pamini nyɔnɔwa yaa kpi duna tɛŋ wa niŋ a saalim wa ayen, <Yik fi suinni m le tuni fu ŋa meena.> 30Alege tomteerɔwa a zɛri ale ta wa a ga lik dɔk po a ta ga paari diipo ate wa baga a tuni wa pamini meena la. 31Naawa tomteerɔma gela ale wom dii ale nye la, ku yaa daani ba nna yegayega ate ba yaa cheŋ naawa jigi a weeni wa ba ale wom diila. 32Naawa ale wom la, wa yaa wi tomteerɔwa ate wa jam wa jigi ate wa yaa weeni wa ayen, <Fi ka kiri ya. Fi ale jam saalim mi la, m vɔŋ fi pamini meena dii ate fi ta la kama a te fu. 33M ta jiirim ale fu kama. Fi mɛ ate poom a ta jiirim ale waai ale dɛ fi pamini la kama.> 34Naawa sui yaa jam puuri nna yegayega ale wa tomteerɔwa ate wa yaa basi ate wa nuruma a yik wa a ta ga lik dɔk po ale te wa waalika a ta ga paari diipo ate wa tuni wa pamini meena a nueri la.>> 35Yeezu biika ale moata kpeglimka la, wa yaa weeni baai meena ale a wom la ayen, <<Mi Kowa ale bo wenŋmazuk la ale nye fi ka dila dekdega ase fi a nin kan vɔŋ a te fi choa ale fi suinum meena.>>

Currently Selected:

Matiu 18: BWU

Highlight

Copy

Compare