Matiu 16

1Farisiiba ale Sajusiiba yaa jam Yeezu jigi ayen wa tom wakperikaliik a sak ba ate ba miŋ ayen wa pagrimu a sum nyini ka Wen jigi. 2Wa yaa weeni ba ayen, <<Wenbinni a daa siŋ ate chiŋmaaŋa a muni ni seba kama ayen ŋmoruk a kan ni. 3Wenbinni dan pusi a jueli ate chiŋmaaŋa a sobri, ni seba kama ayen ŋmoruk ale ku ni. Ni dan poom seba ayen ŋmoruk le ni yaa se ku kan ni alege nama an baga a seba wie ŋaai ale ŋa nye jinla la kiri ya.>> 4Yeezu yaa ŋman weeni ba ayen, <<Nama jinla demma a zɛri Wen ka nna yegayega ale a tom wabaata. Mi a kan siak a tom wakperikaliik a te nama yɔgyɔgla de. Wakperikaliik kaai ate nama ale nya dai yeŋ po la ale dii ate Wen a tom ale wa biisiteerɔwa Jona dipo la.>> Wa yaa basi ba ale ge cheŋ.

5Ba ale bo ŋaaruŋku po a taam nyakpiemu kauk kunkula la, Yeezu ŋaaŋviirɔma yaa baŋ ba ŋandiintaŋa a basi ŋaaŋ. 6Yeezu yaa weeni ba ayen, <<Ni a limisi abe ni kpesi nidek ale Farisiima ale Sajusiima dabintaŋa.>> 7Ba yaa bek chaab ayen, <<Ka tama ale kan ta boroborok la ale soa ate wa a weeni dila?>> 8Yeezu yaa seba ayen ba an jam miŋ ayen wa a sak ba ka Farisiima sinsaŋŋa wie. Ka dila nyiŋ ale soa ate wa yaa bek ba ayen, <<Ka boa ate boroborok kuui ate nama a baŋ la a daani ni ate nama a biisi ku wie? Nama a ka siaka ale mi nalimnyiini? 9Nama an diem a miŋ ya? Nama a kan teeri diipo ate mi a pai borobotta tinuwa a wɛ chari ate nuruba tusa ŋanuwa (5,000) la? Ka busisa si dina ate ni pai a sueri?>> 10Wa yaa ŋman bek ba ayen, <<Mi ale ŋman pai borobotta tiyopɔiwa a wɛ a chari ate nuruba tusa ŋanaansiwa (4,000) la, ka busisa si dina ate ni pai a sueri? 11Mi a poom weeni ni kama ayen ni kpesi nidek ale Farisiima ale Sajusiima sinsaŋŋa. Mi a poom kan biisi ale ni ka boroborok kuui ate ni baŋ basi ŋaaŋ la wie.>> 12Yeezu ŋaaŋviirɔma ale ga wom dii ate wa biisi la, ba yaa deri miŋ ayen wa a sak ba kama ayen ba kpesi badek ale Farisiima ale Sajusiima sinsaŋŋa. Daa ayen wa jam a weeni ba kama ayen ba kpesi badek ale ba dabin tii ate ba pai a nyo ba boroboroku po la.

13Ku ŋaaŋnyiŋ Yeezu ale wa ŋaaŋviirɔma yaa cheŋ tɛŋ kpaŋ sii ale jam gilim Siizariya Filipai tɛŋka la. Dula jigini, wa yaa bek ba ayen, <<Nuruba a weeni ayen Mi Saalɔbiika ka wana?>> 14Ba yaa weeni wa ayen, <<Ba gela a weeni ayen fi ka Jɔɔn Sokateerɔwa. Mba mɛ a weeni ayen fi ka Wen biisiteerɔwa Elaja,#16:14 Malakai 4:5 ale ge ate mba mɛ a weeni ayen ka Wen biisiteerɔwa Jeremaya, yaase wa biisiteerɔma po wanyi ale ŋman pilim jam.>> 15Wa yaa weeni ba ayen, <<Nama dek a weeni ayen mi ka wana?>> 16Simon Piita yaa tulisi wa ayen, <<Fi ale Kirisitawa, Wen dii ale boro la Nidoabinni.>> 17Yeezu yaa weeni wa ayen, <<Fi Simon, Jɔɔn biika, Wen ale basi ate fi sui a peenti nna yegayega. Nurubisa an sak fu wensie ŋaai ate fi biisi la, alege m Kowa waai ale bo wenŋmazuk la, le sak fu. 18Dila nyiŋ ate mi a weeni fi Piita, baai ate Wen a soa la a nye se ka yeri ate mi a boro a se la, ate fi a chim yenni nyubini. Sitaana ale wa chichirik baataŋa meena a kan baga a kaasi di diipo diipo. 19M le pai Wen naamu chaafiisaŋa a te fu. Dii meena ate fi a kisi tɛŋzuk de la a kisi kama wenŋmazuk, ate dii meena ate fi a siak tɛŋzuk de la a siak kama wenŋmazuk.>> 20Wa yaa weeni wa ŋaaŋviirɔma meena ayen ku a fɛ kama ate nama dek a kan weeni a sak nuru waai ya ayen ka wa ale Kirisitawa.

21A nyini va ŋala po a ta a cheŋ, Yeezu yaa weeni wa ŋaaŋviirɔma a lagri ayen, <<Ku magsi kama ayen m cheŋ Jerusalem tɛŋka. Dula jigini tɛŋka kpaŋŋa ale kaabteerɔ kpaŋŋa ale Sinsak sagrɔma meena ale basi ate mi a nam nna yegayega abe ba ge, a ko mu, alege ku dan paari daa ŋata dai m le yiti kum po.>> 22Piita yaa le wom wa wieŋa la, wa yaa yik wa a ta taam nakpiak nyiŋ a toariŋ wa ayen, <<M Nyɔnɔ Yeezu Kirisita, Wen dek ale maari ate dila a kan jam fi jigi ya.>> 23Yeezu yaa viriŋ a weeni Piita ayen, <<Cheŋ du mi tɛŋ dii nyiŋla fi ta ka Sitaana popola. Fi a daani mu kama ale m tuima tomka. Fi la biisi diila an nyini daa Wen jigi ya, alege di nyini ka nuruba jigi.>>

24Yeezu yaa ŋman weeni wa ŋaaŋviirɔma ayen, <<Nuru a daa yaali ayen wa va mi ŋaaŋ, basi ate wa liŋ a zɛri wadek yaalika, abe wa pai wa jabarimu a jam va mi. 25Nuru waai nina a dan muni ayen wa vari wadek nyuvuri a basi, kula nyɔnɔwa le jɔk di kama, alege nuru waai a dan jɔk wa nyuvuri wa le va mi la nyiŋ, kula nyɔnɔwa le vari di a basi. 26Ka boan jaab nyuenta ate nuru le nya ase wa nin nya tɛŋzuk meena masimu alege jɔk wa nyuvuri ya? Jaab karo ate kula nyɔnɔwa le pai tagri a nya wa nyuvunni ase wa nin jɔk di. 27Mi Saalɔbiika ale ŋman pilim a jam ale m Kowa zulaŋa ale wa maarɔma. M dan jam m le tuni waai meena a magsi wa tuima le ka diila. 28Wensie ate mi a weeni ni, nama baai ale bo dela la, gela a kan kpi ka ni nin nya Saalɔbiika a cheena ale wa naamu.>>

Currently Selected:

Matiu 16: BWU

Highlight

Copy

Compare