Matiu 15

1Farisiima ale Sinsak sagrɔma gela yaa nyini Jerusalem tɛŋka a tigsi chaab a jam Yeezu jigi a bek wa ayen, 2<<Ka boa ate fi ŋaaŋviirɔma a zɛri ti kokpieŋsaŋa sinsaŋŋa vaka? Ba kan nari ba nisimaŋa a magsi alege a dɛ ŋandiinta.>> 3Yeezu yaa weeni ba ayen, <<Nama kasim a va ka nidek kisitaŋa, alege a kan va Wen sinsaŋŋa. 4Diila Wen a jam weeni ayen, <A zuli fi ko ale fi ma.> (Nyinika 20:12) ale <Waai a dan le wa ko yaase wa ma, ba ko kula nyɔnɔ.> (Nyinika 21:17) 5Nama nyiem kasim a sak nuruba ni kokpieŋsaŋa suiku ayen nuru waai a dan weeni wa ko ale wa ma ayen jabuui ate wa ayen wa pai a maari wa la ka Wen ale soa. 6Nama a kan basi ate nuru wala a maari ba. Ni daa nye dila, nama a va ka ni kokpieŋsaŋa suiku ale ge a kaasi Wen wieŋa. 7Nama ka sakpaŋ zula nyam! Wen biisiteerɔwa Azaya ale ŋmarisi nama wie dii Wen gbaŋka po la ka wensie. Wa ŋmarisi ayen, 8<Nuruma de a pai ka ba noa nyiini a zuli mi, alege ba suiniimaŋa a ka mi jigi ya. 9Ba pai ka nurubiik kisita a sak nuruba ale a weeni ayen ti ka Wen kisita. Ka dila nyiŋ ale soa ate ba puusaŋa chim kinla mi jigi.> (Azaya 29:13)

10Yeezu yaa ŋman wi nuru boanni ate ba jam wa jigi. Wa yaa weeni ba ayen, <<Ni lagri ni tueŋa a wom ate ni miŋ dii ate mi a yaali ayen m weeni a sak ni la. 11Ŋan baai ale a jo ni noaŋa po la a kan te ni daŋta, alege ŋan baai ale nyini ni noaŋa po a nyini la, ale a te ni daŋta.>>

12Wa ŋaaŋviirɔma yaa weeni wa ayen, <<Fi ale a weeni diila, Farisiima sue an peenti ya.>> 13Yeezu yaa weeni wa ŋaaŋviirɔma ayen, <<Mi Kowa waai ale bo wenŋmazuk la a nye se ka kpaarɔ waai a nyiem ale kasim a bori wa ŋanta la. Dai yeŋ po wa le weeni wa tomteerɔma ayen ba ga voori ŋan baai meena ate wa an bori la. 14Ni kan basi ate Farisiima ale a biisi diila a daani ni. Ba a nye se ka yeeba ale a dari chaab diila. Ba meena ale ga lo ka goluk po.>>

15Piita yaa weeni wa ayen, <<Be weeni wamagsini de kiri a sak ti.>> 16Yeezu yaa bek ba ayen, <<Nama mɛ a ka yammoa? 17Nama a zɛ ayen ŋan baai ale va ni noaŋa po a jo ni puusaŋa po la mɛ a va ka ni bitagifiisa mɛ a nyiini? 18Ni an miŋ ya? Ni noaŋa po biika a nyini ka ni suiniimaŋa po a nyini ale a basi ate ni a ta daŋta. 19Ŋan baai ale bo nuru suinum po la ale a basi ate wa a poli wabaata ale a ko chaab ale a tom kaboŋsa ale nipok yaalik tuima ale a zu ale a velim a te chaab ale a kaasi chaab yue. 20Tuimaŋa de meena ale a basi ate nuruba a ta daŋta. Nuruba a dan kaa nari ba nisima ale ge a dɛ ŋandiinta a se Farisiima kisiku ale a va diila, kula kan basi ate ba a ta daŋta.>>

21Yeezu yaa ŋman basi dula jigini ale ge cheŋ Taaya ale Saidon tɛŋsaŋa. 22Nipok wanyi ale nyini Keenan bo dula jigini. Wa yaa jam saalim Yeezu ayen, <<M Nyɔnɔ Yeezu Kirisita, fi waai ale ka Deevid Nidoabili la, ta jiirim ale mu, dii nyiŋla chichirik biok ale bo m lie zuk po a daani wa.>> 23Yeezu yaa sina. Wa ŋaaŋviirɔma yaa jam weeni wa ayen, <<Ti a saalim fu ayen fi yiak nipowa de ate wa ŋmani ti ŋaaŋ, dii nyiŋla wa va ti kama a nuemu.>> 24Yeezu yaa weeni ba ayen, <<Wen ale tom mu ayen m cheŋ Izirali baai ale a nye ase piisa ale bɛ la, nyiini jigi.>> 25Nipowa ale wom dii ate wa weeni la, wa yaa kpi dunduna tɛŋ Yeezu niŋ a weeni wa ayen, <<M Nyɔnɔ Yeezu Kirisita, mi a saalim fu kama ayen fi maari mu.>> 26Yeezu yaa weeni wa ayen, <<Ku an magsi ayen ba pai bisaŋa ŋandiinta a te baasa.>> 27Nipowa yaa weeni wa ayen, <<Mm, m Nyɔnɔ Yeezu Kirisita, dii ate fi a weeni la ka wensie, alege baasaŋa a nyiem a dɛ ka ŋandiin tii ate bisaŋa a dɛ ale tali la.>> 28Yeezu yaa weeni wa ayen, <<Fi ta siaka ale mi ka nna yegayega. M le nye dii ate fi a yaali la a te fu.>> Wa ale weeni dila la, nipowa liewa yaa deri nya nyiŋyɔgsa.

29Yeezu yaa ŋman basi dula jigini ale ge a ga bo Galili nyakpiemu nɔi a nyeemu a yaa ga paari jigi a jueli a kala guuk kunyi zuk. 30Wa le kala dula jigini la, nuru boari yaa jam wa jigi ale ba yɔgnyieŋsa. Yɔgnyieŋsaŋa de jam ka gbansa ale yeeba ale gbatta ale gauŋta. Yeezu yaa puusi ate ba nya nyiŋyɔgsa. 31Nuru boanni meena ale nya ale gauŋtaŋa a biisi ate gbattaŋa a cheŋ, ate gbansaŋa mɛ naŋsaŋa a teenti ate yeema mɛ a nya la, ku yaa cha ba nna yegayega. Ba yaa pak Izirali Wenni ale a te wa zula wieŋa de meena nyiŋ.

32Yeezu yaa wi wa ŋaaŋviirɔma a weeni ba ayen, <<M jiirim a bo ale nuruma de meena kama, dii nyiŋla ba kasim bo ale mi kama daa ŋata, alege ba an diem a dɛ ŋandiinta. M dan basi ayen ba kuli ale kommu, ba le viiri suiku niŋ.>> 33Wa ŋaaŋviirɔma yaa bek wa ayen, <<Dela ka sagi po. Te ti nya ŋandiinta ka bɛ ate ba paari nuruma de a soa nna?>> 34Yeezu yaa bek ba ayen, <<Ka borobotta ti dina ate ni tara?>> Ba yaa weeni wa ayen, <<Ka borobotta tiyopɔi ale juma maga ale boro.>> 35Wa yaa weeni nuru boanni meena ayen ba kali tɛŋ. 36Wa yaa pai borobottaŋa tiyopɔiwa ale jumaŋa a puusi a te Wen ayen wa niak ti, a yaa le ge a wɛ a te wa ŋaaŋviirɔma ayen ba pai a chari nuru boanni. Ba yaa pai a chari ba meena. 37Ba meena yaa ŋɔbi a chak a yaa le ge ate Yeezu ŋaaŋviirɔma a pai boroborok tii ale tali la a sueri busisa siyopɔi. 38Nuru baai ale ŋɔbi boroboroku ale jumaŋa la, nidoama meena nyiini a jam ka tusa ŋanaansi (4,000). Ba an jam chiini nipooma ale bisaŋa a gum du.

39Yeezu yaa banti ba ayen ba kuli, ale ge ate wa ale wa ŋaaŋviirɔma a ga jo ŋaaruŋ po a cheŋ a ga paari Magdala tɛŋka.

Currently Selected:

Matiu 15: BWU

Highlight

Copy

Compare