Matiu 14

1Da ŋala po Galili demma naawa Ayerod yaa wom Yeezu wie. 2Wa yaa wi wa tomteerɔma a weeni ba ayen, <<Jɔɔn Sokateerɔwa a yiti kum po kama. Ka dila ale soa ate wa baga a tom wakperikaliisaŋa de.>>

3Ayerod a jam yik Jɔɔn kama a bobi wa a ta ga lik wa suoku Filip powa Ayerodiasi nyiŋ. 4Jɔɔn a liŋ jam weeni Ayerod kama ayen, <<Ku an magsi ayen fi ta wa.>>#14:4 Kaabka 18:16, 20:21 5Ayerod a jam a yaali ayen wa ko wa kama, alege wa jam a chali Juuma yɔgsum, dii nyiŋla ba jam a poli kama ayen Jɔɔn a jam ka Wen biisiteerɔma po wanyi.

6Ayerod biamu benni danni ale jam paari la, wa yaa wi nuruba yegayega ayen ba jam a maa dɛ wa biamu danni ŋandiintaŋa. Ba ale jam a tigsi chaab a boro a dɛ la, Ayerodiasi liewa yaa jo dɔk kuui ate ba jam kala a dɛ la, a yaa gɔk. Wa gɔgtaŋa a jam te Ayerod ka suipeentik nna yegayega. 7Wa yaa pɛ a weeni wa ayen, <<Jaabuui meena ate fi a yaali la, weeni mu ate m te fu.>> 8Wa mawa ale weeni wa jabuui ale magsi wa bek la, <<Wa yaa weeni ayen gebi Jɔɔn zukku a dueni taasi tanlaŋ po a te mu.>> 9Ayerod sui yaa kaasi, alege wa an jam baga a zɛri ya, dii nyiŋla wa jam pɛ kama ale nipokbinni nuruma meena nimbie po. Wa yaa weeni wa tugurik tɔŋdɔma 10ayen ba cheŋ juijui ate ba lik Jɔɔn la a gebi wa zukku a ta jam. 11Ba yaa pai zukku a dueni taasi tanlaŋ po a ta jam te nipokbinni. Wa yaa tuesi ku a ta ga te wa mawa. 12Jɔɔn ŋaaŋviirɔma ale jam wom dii ale nye la, ba yaa cheŋ a ga pai wa nyiŋka a gu. Ba yaa ga weeni Yeezu.

13Yeezu ale wom dii ale nye Jɔɔn la, wa yaa cheŋ a ga jo ŋaaruŋ po a cheŋ sagni po wadek wa nyiini. A se wa ale jam a cheŋ la, nuruba yegayega yaa nya wa. Ba yaa basi ba tɛŋsaŋa ale yiti a dɛ niŋ a paari du ale ge ate wa yaa wari ŋaaŋ a jam. 14Yeezu ale nyini ŋaaruŋku po a siŋ tɛŋ la, wa yaa nya nuru boari nna yegayega ale ba za a limisi wa. Wa jiirim yaa jam bo ale ba ate wa yaa tebi baai ale a yuak la.

15Ku le paari junɔi la, wa ŋaaŋviirɔma yaa jam wa jigi a weeni wa ayen, <<Nya ti meena a za ka sagi po ate wenni me a siŋ ti dela. Basi ate nuru boanni a cheŋ tɛŋ kpaŋsaŋa po a ga da ŋandiinta a dɛ.>> 16Yeezu yaa tulisi ba ayen, <<M kan yaali ayen m basi ate ba cheŋ, alege nama dek a te ba ŋandiinta ate ba dɛ.>> 17Ba yaa weeni wa ayen, <<Tama a ta ka borobotta tinu ale juma ŋaye dela jigini.>> 18Wa yaa weeni ba ayen, <<Ni ta jam te mu.>> Ba yaa ta jam. 19Yeezu yaa weeni ate nuruma meena a kali tɛŋ dula jigini, ate wa yaa pai borobottaŋa tinuwa ale jumaŋa ŋayewa a zak wa zuk a nya wenŋmazuk a puusi a te Wen. Wa ale puusi nueri la, wa yaa wɛ boroboroku a pai te wa ŋaaŋviirɔma ayen ba pai a chari nuruma, 20ate ba meena yaa ŋɔbi chak. Ba ale ŋɔbi nueri la, Yeezu ŋaaŋviirɔma yaa pai busisa pi ale siye a pai ŋandiin talaŋa a sueri si. 21Baai ale jam ŋɔbi boroboroku ale jumaŋa la nidoama nyiini jam ka tusa ŋanu (5,000). Ba an jam chiini nipooma ale bisaŋa a gum du.

22Yeezu yaa weeni wa ŋaaŋviirɔma ayen ba jo ŋaaruŋku po a taam nyakpiemu kauk kunkula ŋaaŋnyiŋ, abe ba ge ate wa banti nuru boanni ate ba kuli ba yeeŋa. 23Wa ale banti ba la, wa yaa cheŋ a ga jueli guuk kunyi zuk ayen wa puusi a te Wen. Tɛŋka ale jam a sobri la, Yeezu dek wa nyiini ale jam bo dula. 24Wa ŋaaŋviirɔma yaa jam bo ŋaaruŋku po nyiamu suŋsuŋ ate vioku a fɔbi ba ŋaaruŋku a basi kauk yoŋ. 25Ku ale jam paari vari kpadiaka kumka po la, Yeezu yaa nyini guuku zuk a ga siŋ nyakpiemu po a za nyiamu zuk a cheŋ wa ŋaaŋviirɔma jigi. 26Ba meena ale nya wa ale wa za nyiamu zuk a cheŋ cheena ba jigi la, yɔgsum yaa deri yik ba nna yegayega. Ba yaa kaari nna yegayega, dii nyiŋla ba jam a poli ayen wa ka kɔk. 27Yeezu yaa deri kpabi a weeni ba ayen, <<Ka mi. Ni yik ni dek abe ni kan chali yɔgsummoa.>>

28Piita yaa weeni wa ayen, <<M Nyɔnɔ Yeezu Kirisita, ku dan ka fi, be weeni mu ate m nyini ŋaaruŋku po a cheŋ nyiamu zuk a jam fi jigi.>> 29Yeezu yaa weeni wa ayen, <<Be nyini a jam.>> Piita yaa basi ŋaaruŋku ale nyini a cheŋ Yeezu jigi. 30Ase wa ale jam a cheŋ la, wa yaa nya ale vioku a jam pagra nna yegayega. Yɔgsum yaa deri yik wa ate wa a siŋ nyiamu tɛŋ. Wa yaa kaari a weeni ayen, <<M Nyɔnɔ Yeezu Kirisita, yik mu.>> 31Yeezu yaa deri teeri wa nisaŋa a yik wa ale weeni wa ayen, <<Ka boa ate fi ka siaka ale mi ale a chamu?>> 32Yeezu ale Piita yaa cheŋ a ga jo ŋaaruŋku po, vioku yaa deri basi. 33Wa ŋaaŋviirɔma baai ale jam bo ŋaaruŋku po la yaa pak Yeezu ayen, <<Wensie fi sum ka Wen Nidoabili.>>

34Ba yaa jam taam jueli nyakpiemu kauk kunkula a ga paari Genesaret tɛŋka. 35Dula jigini nuruma yaa nya Yeezu a deri miŋ wa. Ba yaa deri tom ayen ba ta yuarɔma a jam wa jigi. 36Ba yaa saalim wa ayen wa basi ate yuarɔma a tiri wa garukku nɔnni ate ba baga a nya nyiŋyɔgsa. Baai meena ale jam tiri wa garukku nɔnni la a nya nyiŋyɔgsa kama.

Currently Selected:

Matiu 14: BWU

Highlight

Copy

Compare