Kumsa 5
5
1Naawen yaa, teeri dii meena ale nye ti la abe fi nya chivie ŋaai ale a dɛ ti la. 2Ti tɛŋka nicham yaa le soa, ti yeeŋa mɛ nicham yaa le tuesi. 3Ti a nye ase ka kpiŋsa la a ka koba. Ti mama a nye ase pukɔga la. 4Nya buui ate ti a nyu la se ti da, abe ti da daata mɛ. 5Baai ale a vi la a yaali ayen ba yik ka ti ŋeeŋa. Ti jiak kama yɔgla a kan nya vuusum. 6Ti nye ka nɔiyeŋ ale Ejipiti ale Assiria ayen ti nya ŋandiinta jɔk vuuk.
7Ti kokpieŋsaŋa a tom kaasi fu kama, alege ba ŋman ka. Yɔgyɔgla de tama a nam ka ba wabaataŋa nyiŋ. 8Yɔm yaa le chim tama kpaga, nuru be karo a vari ti ba nisa po a basi. 9Ti bola nya ka kum ale a jo bu po a gisi ŋandiinta. Ti kasim a tu ka kum gɔnni po. 10Ti nyiŋ gbaŋsaŋa yaa toliŋ kama ase boroborok seka dɔk la kom le a ko ti.
11Dachaasaŋa yik Zayon nipooma ale nipokbilisaŋa ale bo Juda tɛŋsaŋa po la. 12Ba bobi nabisa nisima a yik ate nisɔm kan ŋmaa nya zula. 13Ba yik nidoa paalukku ate ba a num zueta alege ate nidoabilisa ji da dobrita a cheŋ a ja. 14Nisɔmma an ŋmaa kali nansuiŋtaŋa noa, nidoa paalukku mɛ an ŋmaa yi yiila.
15Ti ŋman ka suipeentiga. Ti gɔgtaŋa yaa tulim chim ka kumsa. 16Naam zutɔgsaŋa yaa lak ti zuimaŋa po. Ku yaa bie ti jigi ka nna yegayega ti le tom kaasi la nyiŋ. 17Kude nyiŋ ti ka yiila. Ti nina kan ŋmaa nya. 18Zayon Guuku yaa doa ka koruk ate gɔi baasa yaa boro nyiem cheŋ a gilim.
19Naawen yaa, a dɛ naam taam wuu. Fi le chim ti naab yɔgyɔgla de a cheŋ. 20Ka boa ate fi baŋ ti wie ate ku beni nna? Fi basi ti kama? 21Naawen yaa, ta ti ŋman, ti ŋman jam. Basi ate ti daaŋa ŋmaa nye ase ŋa le jam ka diila, 22yaa fi din chiib zɛri ti kama? Fi sui ale daa puuri ale ti?
Currently Selected:
Kumsa 5: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
