Kumsa 4
4
1Nya ligmɔniŋka le kan ŋmaa nyaksi diila. Ligmɔniŋ maŋka dek an ŋmaa nyaksi. Naawen yenni tanaŋa a waaŋ ka tɛŋka po meena. 2Zayon bi paalukku meena a jam gaam ligmɔniŋ kama, alege yɔgyɔgla de ba yaa nye nna se samɔnsa ate mɛɛrɔ a mɛ la.
3Gɔi baasa a basi ate si bisa a ŋoosi kama alege mi nuruma Izirali demma a je ba bisaŋa a basi ate ba a kaari ase poi niiga ale bo gɔnni po la. 4Nyanyuila ale a ko buluataŋa ate ba giŋgeluŋtaŋa a maŋ ba laŋtisaŋa. Bimbaansa a juisi ŋandiinta alege waai kan te ba. 5Baai ale jam a dɛ ŋandiin maŋsa la yaa juisi. Ka suitaŋa niŋ ayen ba tin nya jaab. Nuru baai ale jam yiti a jo garuk naliŋsa la a yaa gisi ka yaata kpiirika jigi ba dan nya jaab ba pai.
6Mi nuruma ninammu a gaam Sodom ale jam nam diila kama. Sodom tɛŋka a jam kaasi kama alege ba an nya maarika. 7Nabisaŋa jam a nyaksi ase ka ŋmoruk tana la, a peenti gaam biisim. Ba nyiŋsaŋa a jam muni kama gaam tintain munta, a nye ase tintain sobta la. 8Alege yɔgyɔgla ba sobi gaam kaala ate waai an ŋman nya ba a miŋ suitaŋa niŋŋa. Ba nyiŋsaŋa a yaa maŋ ka ba kobaŋa, si yaa ko ka nna chekchek ase daata la.
9Baai ate ba ko ba kpaliŋka po la a zunchoŋ baai ate kom a ko ba la. Kom a viiri ba kama ate ba kpi ale nyiŋdoma, dii nyiŋla jadiim jam ka kaduksaŋa po. 10Nipok baai ale ta jiirim a pai badek bisa a dik ŋɔbi ayen ba jɔk vuugi.
11Naawen a jɔk wa suinni ate di kasim a dom ate wa moak bolim a ju Zayon ate bu dɛ jaab meena a ga paari wa kiri. 12Nalima ale tɛŋzuk nuruba meena a kan jam a siak ayen dachaasa ale baga a jo Jerusalem po. 13Ku nye dila kama dii nyiŋla biisiteerɔma ale wa kaabteerɔma a jam tom ka biem. Ba jam ko baai ale a tom wamaŋsa la. 14Ba jam nyiem a tuinti kama ase yioba la nuruma ziimu a jam daŋ ba kama ate waai kan yaali wa tiri ba gattaŋa. 15Nuruba yaa na ba, <<Ni cheŋ du, ni daŋ kama.>> <<Ni cheŋ du! Ni cheŋ du! Ni kan tiri tama!>> Ate ba yaa chali bɛ a tuinti a cheŋ. Tɛŋ yonsa a weeni ba ayen, <<Ba kan bo ni ba.>>
16Naawen dek ale yiak ti waaŋ chaab an ŋmaa nya ti zuwa. Nuru kan ŋmaa zuli kaabteerɔma yaase niŋdeerɔma. 17Ti kasim za ka ti gbirimaŋa zuk a nya ase tɛŋ kaai ale vari ti basi ya, alege ti nya ti nina ga feligi maarika kan jam. 18Ti dachaasaŋa a vi ti, ti an baga a cheŋ suitaŋa po. Ti kpeglimka a moata. Ti daaŋa a paari ya. Ti kpeglimka a jam ya.
19Baai ale a vi ti la a kpabi a gaam jiiritaŋa ale bo wenzuk la. Ba vi ti ti ga jo guutaŋa po ate ba gu doa gɔnni po a limisi ti. 20Naawen ale lueri naab waai ate wa jam ka tama dek nyuvuri la, ba bari yik wa. Ti jam weeni wa wie kama ayen, wa le wa a lik ti ate tɛŋ yonsa kan nya ti pagrimoa.
21Edom Liewa ale bo Uz tɛŋka la, ni sue peenti kama ate ni a naŋŋi. Naawen suipuurum beerika ale sueri a jam ni jigi ate ni nyu buk a cheŋ chaboala. 22Zayon Liewa ni ninammu a kpegli ya. Wa kan ŋman te ni jo ninam po. Alege Edom Liewa, ni ninammu diem a piilim kama. Wa le lak ni wabaataŋa.
Currently Selected:
Kumsa 4: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
