Ezekiel 1

1Ben dii ate mi nya bena pisita la, chiisa sinaansiwa po, ka daa ŋanu dai ate mi jam maa bo baai po ate ba yik ta cheŋ Babilon la, Chebar Benni nɔi, wenzukku yaa lagri ate mi nya Wen wie. 2Ku jam ka ba le yik naab Jeyoiachin lik la, chiisa sinu po, ku daa ŋanu dai. 3Naawen yaa biisi wa wanni te Buzi nidoabinni Ezekiel waai ale ka kaabteerɔwa Kaldiya demma tɛŋka po, Chebar Benni nɔi. Dula jigini wa yaa nya Naawen pagrimu.

4Mi yaa nya ale vamuniŋ a nyini wiiluk geŋka a cheena. A nya chiŋmari mɛ ate nyaksi ka a gilim di ate bolim mɛ nyaksi nyini di po a nyini. Jaab mɛ a nye nna ase kutuk mɔnuŋ la a nyaksi di suŋsuŋ. 5Chiŋmanni suŋsuŋ ku jam a nye nna ase ka ŋanvuta ale bo du la. Ba jam a nye nna mɛ ase nuru bisa la, 6alege ba wanyi a jam ta ka nimbidaasa sinaansi ale kiŋkaŋŋa ŋanaansi. 7Ba naŋsaŋa jam yɔrisi kama. Ba naŋtaataŋa a nye ase naabiik naŋsaba la ale a nyaksi ase kutuk ate ba soa ti ku a nyaksi la. 8Ŋanvutaŋa de jam ta ka nurubiik nisima ba kiŋkaŋŋa suŋsuŋ kabta tinaansiwa. Banaansiwa meena jam ta ka nimbidaasa ale kiŋkaŋŋa, 9ate ba kiŋkaŋŋa a tiri chaab. Ba dan jam a cheŋ, ba kan cheemu alege ba yɔmisi kama a cheŋ. 10Ba nimbidaasaŋa ale jam ka diila ale nna. Ba wanyi meena a jam ta ka nurubiik nimbidiak ale gbeŋli nimbidiak juga geŋ ale naab nimbidiak gala geŋ. Ba wanyi meena mɛ a ta ka jiiruk nimbidiak. 11Ba nimbidaasaŋa ale jam ka diila ale la. Ba kiŋkaŋŋa a lak kama a nyini a jueli. Ba wanyi meena a ta ka kiŋkaŋŋa ŋaye ate ŋa a tiri mbala ate kiŋkaŋŋa ŋaye a lik wa nyiŋka. 12Ba wanyi meena yɔmisi ka niŋ a cheŋ. Wen Chiika ale a cheŋ juijui la ŋanvutaŋa mɛ a cheŋ ka dula alege kan cheen ŋaaŋŋa. 13Ŋanvutaŋa de a nye ase ka bolim kaala ale a dɛ la. Bolim ale kasim a cheŋ niŋ ale ŋaaŋ ba suŋsuŋ. Ku jam a nyaksi kama alege a nya nna cheri. 14Ba kasim a chali a ga ka niŋ ale ŋaaŋ nna yilibi yilibi ase bolim ale a nyaksi la.

15Yɔgyɔgla de mi yaa le a nya ŋanvutaŋa la, mi yaa nya wiili a za ba wanyi meena ale ta nimbidaasa sinaansi la tɛŋ. 16Ba le nye wiilima diila ale nna. Ba jam a nyaksi kama ase tintain salima la. Wiiliba banaansiwa meena jam a neesi ka chaab, a nye nna ase ba bari jo chaab la. 17Ba daa cheŋ ba a va jiga bunaansiwa kama alege kan viriŋ. 18Wiilima noawaaŋa a jueli kama alege ta nina a gilim a nak kpaziim. 19Ŋanvutaŋa a daa cheŋ, wiilima mɛ a cheŋ sali va. Ba dan yiti wen wiilima mɛ maa yiti. 20Chiika ale a cheŋ juijui la, ŋanvutaŋa a cheŋ ka dula. Ate wiilima nyiem zak sali va diila ŋanvutaŋa chiika a bo ka wiilima po. 21Ŋanvuta a dan cheŋ, wiilima mɛ cheŋ. Ba dan zaani wiilima mɛ zaani. Ba dan yiti wiilima mɛ yiti, dii nyiŋla chiika bo wiilima mɛ po kama.

22Ŋanvutaŋa zuima a nye nna ase jagigiluk ale boro la a nyaksi nna kpelim kpelim a nak kpaziim. 23Jagigiluku tɛŋ ba yaa teeri ba kiŋkaŋŋa a tuk chaab. Ba wanyi meena a ta ka kiŋkaŋŋa ŋaye a lik wa nyiŋka. 24Ba le a cheŋ la mi yaa wom nuemka nna ase nyakpiemu ale a wuuri la. Nuemka nna ase Wen Dii Ale A Niak La, a wuuri mɛ ase tugurik tɔŋdɔba ale a nuem la. Ba le ga zaani la, ba basi ate ba kiŋkaŋŋa a siŋ tɛŋ. 25Lueluk yaa nyini ba zuimaŋa jagigiluku po. Ba dan ga zaani, ba te ti ba kiŋkaŋŋa a siŋ tɛŋ.

26Jagigiluku ale bo ba zuima la jaab ale a nye nna ase naam zukpaglik la. Ate ka a nyaksi ase tintain sobta la. Zukpaglika zuk a nye ase nuru ale kali du la. 27Mi ya nya wa chiaka ta jueli a nye nna ase kutuk ate bolim boro la. Zaani wa chiaka a siŋ a nye nna ase bolim la ate nyaksika a gilim bolimu. 28Wa gilagilawa a nye nna ase ŋmoruk nika dai nagoritom la. Ku a nye nna ase Naawen zula ale wa nalimu la. Mi ale nya la, mi yaa lo poi nyiŋ a wom lueluk ale a biisi ale mi.

Currently Selected:

Ezekiel 1: BWU

Highlight

Copy

Compare